កំពត ៖ នេះជាការរិះគន់ថ្មីមួយទៀតពីសំណាក់មហាជន មកលើផ្លាកយីហោ “កាស៊ីណូហាទៀងវេហ្កាស”ខណៈប្រមុខរាជរដ្ឋាភិបាលបានបញ្ជាឲ្យអាជ្ញាធរខេត្តកំពត និងស្ថាប័នជំនាញ រុះរើផ្លាកយីហោថ្មីរបស់ក្រុមហ៊ុនអូតែលបូកគោដែលលួចប្តូរឈ្មោះ ជារមណីយដ្ឋាន សុខា ឋានសួគ៌ កាលពីព្រឹកថ្ងៃទី២៣ខែកញ្ញា ឆ្នាំ២០១៧កន្លងមកនោះ។
ជុំវិញ ចំណាត់ការនេះ មហាជនគ្រប់ស្រទាប់ពិសេសប្រជាពលរដ្ឋបានសំដែងការអបអរសាទរនិងគាំទ្រយ៉ាងពេញទំហឹង ព្រោះតែប្រមុខដឹកនាំប្រទេស បានបញ្ជាឲ្យដកចេញនូវផ្លាកយីហោខុសច្បាប់នេះ ដោយរក្សាឈ្មោះដើម ជារមណីយដ្ឋាន ឋានសួគ៌បូកគោ ដដែល ។ ប៉ុន្តែស្របពេលចំណាត់ការទទួលបានវិជ្ជមាន មជ្ឈដ្ឋានទូទៅក៏បានបង្វែទិសមករិះគន់នូវផ្លាក យីហោកាស៊ីណូហាទៀង វេហ្កាស ដែលជាកាស៊ីណូលំដាប់ពិភពលោក មានទីតាំងស្ថិតក្នុងច្រកទ្វារព្រំដែនអន្តរជាតិ ព្រែកចាក ក្នុងភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច ខេត្តកំពត។ គេបានលើកឡើងផងដែរថា បើយើងសង្កេតមើលផ្លាកយីហោដែលដាក់ឈ្មោះថា ហាទៀងវេហ្កាស ក្នុងតំបន់នៃភូមិសាស្ត្រខេត្តកំពតនេះ ថ្វីត្បិតវាស្ថិតក្នុងច្រកទ្វារព្រំដែន តែទីតាំងខាងលើគឺជាទឹកដីរបស់កម្ពុជាសុទ្ធសាធ អីចឹងមិនគួរយកឈ្មោះ ស្រុកឬខេត្តរបស់ប្រទេសជិតខាងដាក់តាំងនៅទឹកដីកម្ពុជាឡើយ ព្រោះខ្លាចក្រែងថ្ងៃអនាគតនឹងអាចមានកូនចៅជំនាន់ក្រោយមានការយល់ច្រឡំ ព្រមទាំងជួបផលលំបាកនៅអំឡុងពេលណាមួយមិនខាន។
មហាជនបានលើកឡើងទៀតថា ឥឡូវនេះការរុះរើផ្លាកយីហោអត់ច្បាប់របស់ក្រុមហ៊ុន សុខាបូកគោ បានជោគជ័យហើយ ចុះកាស៊ីណូមួយដ៏ធំស្កឹមស្កៃដែលសាងសង់នៅ
ស្រុកខ្មែរ បែរជាដាក់ឈ្មោះយីហោថា ហាទៀងវេហ្កាសដែលជាឈ្មោះមិនមែនជាខ្មែរនោះ ពេលណាទើបមានការផ្លាស់ប្តូរឈ្មោះឬរុះរើចេញ ដូច”រមណីយដ្ឋានសុខាឋានសួគ៌”ទៅ?។
នេះជាមតិរិះគន់ និងជាប្រធានបទថ្មីមួយ ដើម្បីជួយជម្រុញនូវការរក្សាបូរណភាពទឹកដីរបស់ខ្លួន ជៀសវាងការភាន់ច្រឡំណាមួយ នាពេលអនាគតខាងមុខ ពិសេសដល់កូនចៅជំនាន់ក្រោយ ដែលងាយនឹងយល់ច្រឡំខណៈពួកគេមើលឃើញនូវ ផ្លាកយីហោកាស៊ីណូ ហាទៀងវេហ្កាសនេះ ៕
ណារិទ្ធ
