ប្រទេសថៃ ៖ ក្រុមតម្រួតថៃ រួមជាមួយនឹងកម្លាំងអន្តោប្រវេសន៍បានចាប់ឃាត់ខ្លួនពលករខ្មែរសរុបចំនួន៣២នាក់នៅក្នុងខេត្តស្រះកែវ ប្រទេសថៃ បន្ទាប់ពីរកឃើញមិនមានលិខិតស្នាមត្រឹមត្រូវ ។
បើតាមសេចក្តីរាយការណ៍បានឲ្យដឹងថា ៖ ពលករខ្មែរទាំង៣២នាក់ដែរត្រូវបានក្រុមតម្រួតថៃចាប់ឃាត់ខ្លួនដោយពួកគេបានជឿនិងទុកចិត្តទៅលើមេខ្យល់ ដោយសន្យាថា នឹងនាំអោយដល់ទីក្រុងបាងកក ដើម្បីធ្វើការងារនៅទីនោះ មិនចាំបាច់មានលិខិតស្នាមអ្វីទាំងអស់។
សេចក្តីរាយការណ៍ដដែរបានបន្តថា ៖ ការឃាត់ខ្លួនពលករខ្មែរទាំង៣២នាក់ខាងលើនេះបានធ្វើឡើងនៅល្ងាចថ្ងៃទី១៤ខែសីហាឆ្នាំ២០១៧ត្រង់ចំណុចខាងមុខវត្តស្រះហ្លួង ក្នុងឃុំណងសាំង ស្រុកអារញ្ញប្រាក់ថេត ខេត្តស្រះកែវ ប្រទេសថៃ។បើតាមរបាយការណ៍របស់សមត្ថកិច្ចថៃបានឲ្យដឹងថា៖នៅមុនពេលកើតហេតុដោយមានការសង្ស័យទៅលើរថយន្តតួរីសមួយគ្រឿងពាក់ស្លាកលេខ បាងកក៣២.០៨៤១ ដែលបានបើកបរក្នុងល្បឿនយ៉ាងលឿន ក្នុងទិសដៅចេញពីស្រុកគោកខ្យូង ឆ្ពោះទៅកាន់ទីក្រុងបាងកក និងដោយមានចេតនាចង់បុកទម្លុះបារ៉ាស់តម្រួតផងនោះទើបកម្លាំងសមត្ថកិច្ចតាមស្ទាក់ចាប់បានតែម្តងទៅ។
អ្នកបើកបរមានឈ្មោះ អ៊ុស្មាន ស៊ូឡុងភេទប្រុសអាយុ៣៦ឆ្នាំរស់នៅភូមិ៧ ឃុំតាលុពោធិ ស្រុកមឿង ខេត្តប៉ាតានី ប្រទេសថៃ។ចំណែកពលករខ្មែរនៅក្នុងរថយន្តខាងលើសរុបចំនួន៣២នាក់ក្នុងនោះមានស្រីចំនួ១៣នាក់ផងដែរដោយមានការញាត់ណែនតែម្តង។នៅចំពោះមុខសមត្ថកិច្ចអ្នកបើកបររថយន្តបានសារភាពថា៖ខ្លួនគ្រាន់តែជាអ្នកស៊ីឈ្នួលបើករថយន្តអោយគេតែប៉ុណ្ណោះដោយក្នុងមួយជើងៗទទួលបានប្រាក់ពី១៥០០បាតទៅ២០០០បាតប៉ុណ្ណោះគឺដឹកពីស្រុកគោកខ្យូងទៅកាន់ទីក្រុងបាងកក។
ដោយឡែក ពលករខ្មែរដែលគ្មានឯកសារអ្វីពាក់ព័ន្ធបន្តិចទាល់តែសោះនោះ បានសារភាពថា ៖ ពួកគេទាំងអស់គ្នាគឺធ្វើដំណើរមកពីខេត្តកំពង់ធំនិងខេត្តបន្ទាយមានជ័យក្នុងគោលបំណងទៅធ្វើការនៅក្នុងទីក្រុងបាងកកដោយមានការធានាពីសំណាក់មេខ្យល់ខ្មែរ ដោយពួកគេបានបង់លុយអោយទៅមេខ្យល់ក្នុងម្នាក់ៗ៣០០០បាត ។ បច្ចុប្បន្ន ទាំងមធ្យោបាយធ្វើដំណើរក៏ដូចជាអ្នកបើកបរព្រមទាំងពលករខ្មែរទាំងអស់ត្រូវបានក្រុមតម្រួតជំនាញ នាំយកទៅកាន់អធិការដ្ឋានស្រុកអារញ្ញប្រាក់ថេតដើម្បីធ្វើការសាកសួរបន្តទៅតាមនិតិវិធី ៕
