ខេត្តសៀមរាប៖ នៅថ្ងៃទី២៦ ខែកុម្ភៈ ឆ្នាំ២០១៥នេះ លោក ស៊ុន ចំណាន ប្រធានការិយាល័យបុគ្គលិក នៃស្នងការដ្ឋាននគរបាលខេត្តសៀមរាប បានថ្លែង ថា លោកពុំបានធ្វើកិច្ចការតាមតែអំពើចិត្តនោះឡើយ ដោយលោកបានលើកឡើងថា ស្នងការនគរបាលខេត្តសៀមរាប លោកឧត្តមសេនីយ៍ទោ សត ណាឌី ពុំមែនជាបក្ខពួកនឹងគ្នាទេ ក៏ប៉ុន្តែ លោក ស៊ុន ចំណាន និយាយថា លោកឧត្តមសេនីយ៍ទោ គឺជាមេកោយម្នាក់ ដែលស្គាល់អំពីតួនាទី ហើយមិនជ្រៀតជ្រែកការងាររបស់អ្នកដទៃនោះទេ ។
មន្ត្រីនគរ បាលម្នាក់ ក្នុងស្នងការ ដ្ឋាននគរ បាលខេត្តសៀមរាប បានបដិសេធចំពោះការ ចោទប្រកាន់ និងលើកឡើងថា លោកឧត្តមសេនីយ៍ទោ សត ណាឌី ជាស្នងការនគរបាលម្នាក់ ដែលចេះធ្វើការតាមតួនាទី ព្រមទាំងបានហៅ ការដាក់ពាក្យបណ្ដឹង របស់មន្ត្រីមួយចំនួន ទៅអង្គភាពប្រឆាំង អំពើពុករលួយថា ជារឿងអយុត្តិធម៌ និងជាការមួលបង្កាច់ ។
ការបដិសេធនេះ បានកើតឡើងបន្ទាប់ពីមានពាក្យបណ្ដឹងមួយ បានធ្វើឡើងទៅកាន់អង្គភាពប្រឆាំងអំពើពុករលួយ ហើយអង្គភាពនេះ ទើបបានចេញផ្សាយអំពីរបាយការណ៍របស់ខ្លួន នាពេលថ្មីៗនេះ ពាក់ព័ន្ឋនិងការចោទប្រកាន់ របស់មន្ត្រី ក្នុងខេត្តសៀមរាប ដែលនិយាយថា លោកឧត្តមសេនីយ៍ទោ ស៊ត ណាឌី ស្នងការដ្ឋាននគរបាលខេត្តសៀមរាប បានបើកដៃឱ្យលោក ស៊ុន ចំណាន ប្រធានការិយាល័យបុគ្គលិក នៃស្នងការដ្ឋាននគរបាលខេត្ត ធ្វើអ្វីៗតាមតែអំពើចិត្ត ។
ប្រធានការិយាល័យបុគ្គលិករូបនេះ បានថ្លែងបន្តថា ចំពោះការលើកឡើងថា ខ្លួនបានបើកដៃឲ្យមន្ត្រីខ្លះទៅរកស៊ីក្រៅ ក៏ជាការចោទប្រកាន់ខុសទំនងដែរ ដោយថាមន្ត្រីនគរបាល ឬមន្ត្រីស៊ីវិល ធ្វើការមានមេកោយ ហើយលោកក៏ពុំដឹង ពីភាពអសកម្មដូចមេកើយផ្ទាល់នោះដែរ ក៏ប៉ុន្តែប្រសិនបើរកឃើញថា មានភាពអសកម្មមែន នោះស្នងការ និងមានវិធានការ ។
លោក ស៊ុន ចំណាន លើកឡើងបន្ថែមថា “ចំពោះការប្រលងជ្រើសរើសមន្ត្រីនគរបាល បញ្ចូលក្របខ័ណ្ឌថ្មី២០១៤ គណៈកម្មការជ្រើសរើស គឺមានការចូលរួមពីមន្ត្រីក្រសួងមហាផ្ទៃផងដែរ លោកបានបដិសេធ ចំពោះការលើកឡើងថា បានលូកដៃទារលុយចំនួនចាប់ពី ៣,០០០ដុល្លារ ទៅ ៤,០០០ដុល្លារ ក្នុងម្នាក់ៗ គឺពុំអាចទៅរួចឡើយ ហើយការសរសេរលិខិតប្តឹង គឺជារឿងអយុត្តិធម៌ ដែលជាការបង្កាច់កេរ្តិ៍ ធ្វើឱ្យខូចកិត្តិយស និងខូចឈ្មោះរបស់គណៈកម្មការជ្រើសរើសមន្ត្រី បញ្ចូលក្របខ័ណ្ឌនគរបាលថ្មី សម្រាប់ ឆ្នាំ២០១៤ផងដែរ ។
ជុំវិញការចោទប្រកាន់ថា បានដំឡើងបុណ្យស័ក្តិ ឱ្យប្អូនធ្វើជាប្រធានផ្នែក និងដំឡើងបុណ្យស័ក្តិ មិនប្រក្រតីជាថ្នូរ នឹងលាភសក្ការៈនោះ លោក ស៊ុន ចំណាន បានលើកឡើងថា លោកពុំមានតួនាទី ដំឡើងស័ក្តិ ដាក់វិន័យ ឫបណ្តេញមន្ត្រីដទៃណាមួយ ចេញបាននោះទេ ក៏ប៉ុន្តែករណីនេះ លុះត្រាប្រធានអង្គភាពរបស់មន្ត្រីម្នាក់នោះ ធ្វើការស្នើសុំទៅគណៈស្នងការ និងអ្នកពាក់ព័ន្ឋ ហើយការិយាល័យបុគ្គលិក មានតួនាទីត្រូវរៀបចំឯកសារបែបបទប៉ុណ្ណោះ ។
សូមបញ្ចាក់ថា អង្គភាពប្រឆាំងអំពើពុករលួយ នាពេលថ្មីៗនេះ បានបង្ហាញនូវរបាយការរបស់ខ្លួន ពាក់ព័ន្ឋនិងពាក្យបណ្ដឹង របស់មន្ត្រីនគរបាលក្នុងខេត្តសៀមរាប ដែលបានចោទប្រកាន់ លោកឧត្តមសេនីយ៍ទោ សត ណាឌី ស្នងការនគរបាលថា បានបើកដៃឱ្យលោក ស៊ុន ចំណាន ប្រធានការិយាល័យបុគ្គលិក នៃស្នងការដ្ឋាននគរបាលខេត្ត ធ្វើអ្វីៗតាមតែអំពើចិត្ត ក្នុងនោះបានឲ្យមន្ត្រីនគរបាលពាក់ស័ក្តិ៣ ស័ក្តិ៤ ទៅរកស៊ីក្រៅអង្គភាពជាដើម ។ យ៉ាងណាក៏ដោយករណីទាំងអស់ ដែលបានចោទប្រកាន់ ត្រូវបានប្រធានការិយាល័យបុគ្គលិក នៃស្នងការដ្ឋាននគរបាលខេត្តសៀមរាប ច្រានចោលទាំងស្រុងផងដែរ ៕
