កំពត ៖ ក្រុមអនាធិបតេយ្យរួមជាមួយអ្នកកាសែតម្នាក់ ត្រូវបានកំលាំងកងរាជអាវុធហត្ថខេត្តកំពត ឃាត់ខ្លួនមកសាកសួរ បន្ទាប់ពីក្រុមនេះបានប្រើអំពើហិង្សាបង្កឲ្យគេរងរបួស និងបានវាយបំផ្លិច បំផ្លាញរថយន្តរបស់គេអស់ពីរគ្រឿង។
ហេតុការណ៍ប្រទូស្តរាយខាងលើបានកើតឡើងកាលពីវេលាម៉ោង៣និង០៥នាទីរសៀល ថ្ងៃទី១០ខែសីហា ឆ្នាំ២០១៧ ស្ថិតចំណុចដីក្រុមហ៊ុនមួយកន្លែង ក្នុងភូមិតេជោអង្កាញ់ ឃុំតេជោអភិវឌ្ឍន៍ ស្រុកឈូក ខេត្តកំពត ដោយករណីនេះក៏បានធ្វើឲ្យសន្តិសុខយាមដីម្នាក់ឈ្មោះ ឃឹម ឃន ភេទប្រុស អាយុ៥០ឆ្នាំ រស់នៅកន្លែងកើតហេតុរងរបួសធ្ងន់ធ្ងរ ដោយសារក្រុមអនាធិតេយ្យព្រួតវាយ ហើយការប្រឈមដាក់គ្នានេះ បន្ទាប់ពីក្រុមខាងលើបាននាំគ្នាមកសង់លំនៅដ្ឋាននៅលើទីតាំងដីក្រុមហ៊ុន។
តាមប្រភពផ្លូវការអះអាងថា មុនពេលមានករណីហិង្សា គេឃើញក្រុមអនាធិតេយ្យជាច្រើននាក់មកសង់លំនៅដ្ឋាន លើដីកម្មសិទ្ធរបស់ក្រុមហ៊ុនខាងលើ ដោយឃើញសភាពបែបនេះ សន្តិសុខយាមដីក៏នាំគ្នាមករេរាំង ទើបមានភាពតានតឹងកើតឡើងតែម្តង ហើយការប្រទង់ប្រទែងបង្កឲ្យមានរបួសស្នាមនេះ ក៏ត្រូវកំលាំងឃាត់ខ្លួនក្រុមខិលខួចបានម្នាក់ ឈ្មោះ ព្រឿន ប្រាន ភេទប្រុស អាយុ៤០ឆ្នាំ មុខរបរជាងសំណង់ មានទីលំនៅក្នុងភូមិ ឃុំ កើតហេតុ។
តាមការបញ្ជាក់ពីលោកវរសេនីយ៍ទោ ហែម ចាន់ដារ៉ា មេបញ្ជាររងនិងជាប្រធានមន្ទីរយុតិ្តធម៌ កងរាជអាវុធហត្ថខេត្តបានឲ្យដឹងថា ការបង្ក្រាបជនសង្ស័យខាងលើគឺបន្ទាប់ពីមានកំលាំងសន្តិសុខស្ថិតក្នុងចំណុចកើតហេតុ រាយការណ៍ប្តឹងទៅលោកព្រះរាជអាជ្ញា ទើបលោក ឯក ឆេងហ៊ួត ព្រះរាជអាជ្ញាអមសាលាដំបូងខេត្តកំពត បញ្ជាដល់កំលាំងមន្ទីរយុតិ្តធម៌កងរាជអាវុធហត្ថខេត្តចុះទៅឃាត់ខ្លួនបានពីរនាក់បន្ថែមទៀត កាលពីរសៀលថ្ងៃទី១១ខែសីហា ឆ្នាំ២០១៧ ហើយបាននាំមកសាកសួរនៅឯមន្ទីរយុតិ្តធម៌កងតាជអាវុធហត្ថខេត្ត។លោកបានបញ្ជាក់ថា ជនសង្ស័យដែលឃាត់ខ្លួនពេលនេះរួមមាន៖ទី១.ឈ្មោះ ជា សីុថា ហៅចេក ភេទប្រុស អាយុ៤៦ឆ្នាំជាអ្នកកាសែត ក្នុងអង្គភាព សារព័ត៌មាន”អំណាចប្រជាជន”រស់នៅក្នុងភូមិតេជោអង្កាញ់ ឃុំតេជោអភិវឌ្ឍន៍ ស្រុកឈូក ខេត្តកំពត។ទី២.ឈ្មោះ សុខ ពិសី ភេទប្រុស អាយុ៥២ឆ្នាំ មុខរបរជាងមាស រស់នៅក្នុងឃុំតេជោអភិវឌ្ឍន៍ ស្រុកឈូក ខេត្តកំពត។ជាមួយនឹងការឃាត់ខ្លួន សមត្ថកិច្ចបានដកហូតវត្ថុតាងមួយចំនួន ដូចជា ទូរស័ព្ទដៃចំនួន៣គ្រឿង និងប័ណ្ណពត៌មានមួយសន្លឹក។
បច្ចុប្បន្នជនសង្ស័យខាងលើ រួមជាមួយនិងវត្ថុតាង ត្រូវបានកសាងសំណុំរឿងបញ្ជូនទៅសាលាដំបូងខេត្តកំពត ចាត់ការតាមនីតិវិធី ៕
ណារិទ្ធ
