កំពត ៖ អគារមជ្ឈមណ្ឌលឥស្លាម-អាល់ហ្សាមេល ដែលមានទីតាំងស្ថិតក្នុងភូមិតាដឹប សង្កាត់អណ្តូងខ្មែរ ក្រុង-ខេត្តកំពត នោះត្រូវបានធ្វើពិធីសម្ពោធដាក់ឲ្យប្រើប្រាស់ជាផ្លូវការ នៅព្រឹកថ្ងៃទី១២ខែសីហា ឆ្នាំ២០១៧នេះ ក្រោមអធិបតីភាព ឯកឧត្តម ហ៊ុន ម៉ាណែត តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហែរហមដោយមន្ត្រីជាន់ខ្ពស់ក្នុងជួររាជរដ្ឋាភិបាលជាច្រើនរូប។ក្នុងនោះដែរក៏មានការចូលរួមពីសំណាក់ លោកចាន់ ចេស្តា អភិបាលនៃគណៈអភិបាលខេត្តកំពត លោកអឺុង ម៉េងហួរ ប្រធានក្រុមប្រឹក្សាខេត្ត និងអស់លោកជាប្រធាន អនុប្រធានមន្ទីរអង្គភាព ពាក់ព័ន្ធនានា អាជ្ញាធរដែនដីគ្រប់លំដាប់ថ្នាក់ លោកគ្រូ អ្នកគ្រូ សិស្សានុសិស្ស ព្រមទាំងបងប្អូនប្រជាពលរដ្ឋជាសាសនិកឥស្លាមទូទាំងក្រុងកំពតផងដែរ។
លោកចាន់ ចេស្តា អភិបាលខេត្តកំពត បានស្រង់របាយការណ៍ដោយសង្ខេបថា មជ្ឈមណ្ឌលឥស្លាម-អាល់ហ្សាមេល ស្ថិតក្នុងភូមិតាដឹប សង្កាត់អណ្តូងខ្មែរ ក្រុងកំពតនេះ បានសាងសង់រយៈពេល១៤ខែ ក្នុងទំហំផ្ទៃដី១០០០០ម៉ែត្រការេ គិតចាប់ពីថ្ងៃទី០១ខែសីហា ឆ្នាំ២០១៥និងបញ្ចប់នៅថ្ងៃទី៣០ខែកញ្ញា ឆ្នាំ២០១៦ ដោយចំណាយថវិកាសរុបសម្រាប់សាងសង់មានចំនួន ៣៨៦.១០០ដុល្លា អាមេរិក។ លោកបានបន្តថា ក្រោមដំបូលសន្តិភាពពេញលេញ និងកំពុងអភិវឌ្ឍន៍យ៉ាងខ្លាំងក្លា ក្រោមការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ខេត្តកំពតដែលជាខេត្តមានសកត្តានុពលអំណោយផលពីធម្មជាតិស្រាប់ផងនោះ បានខិតខំធ្វើការអភិវឌ្ឍន៍ជាបន្តបន្ទាប់ ដោយសម្រេចបាននូវសមិទ្ធិផលធំៗជាច្រើនរួមមាន៖ ផ្លូវថ្នល់ ផ្លូវដែក ស្ពាន សាលារៀន រោងចក្រស៊ីម៉ងត៍ ស្រែអំបិល វារីអគ្គិសនី តំបន់ទេសចរណ៍ជាដើម ។ល។ ហើយផ្នែកសាសនាយើងមានទាំងពុទ្ធសាសនិក,សាសនាឥស្លាម និងយេស៊ូគ្រឹស។ម្យ៉ាងទៀត មកដល់ពេលនេះនៅខេត្តកំពតទាំងមូល មានសូរ៉ាវសម្រាប់សាសនាឥស្លាមចំនួន៣៦ វិហារចំនួន៣៥។សមិទ្ធិផលទាំងនេះសុទ្ធសឹងបានកើតចេញអំណោយផលនៃសន្តិភាព តាមរយៈយុទ្ធសាស្ត្រឈ្នះៗ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
មានមតិផ្តាំផ្ញើរ និងសួរសុខទុក្ខ ឯកឧត្តម ហ៊ុន ម៉ាណែត ក៏បានពាំនាំនូវអនុសាសន៍ល្អៗ ដោយបានលើកឡើងយ៉ាងដូច្នេះថា បើគ្មានសន្តិភាព ក៏គ្មានវិស័យសាសនាដែរ ហើយស្រុកមានសន្តិភាព ប្រទេសយើងក៏មានការអភិវឌ្ឍន៍រីកចម្រើនគ្រប់វិស័យ ទាំងពុទ្ធចក្រ ទាំងអាណាចក្រ ពិសេសធនធានមនុស្ស ដែលជាកត្តាដ៏សំខាន់ចាំបាច់បំផុត។ជាមួយនេះ បើយើងក្រលេកមើលសមិទ្ធិផលធំៗជាច្រើនទៀត ដែលផ្តើមចេញពីភាពខិតខំរបស់រាជរដ្ឋាភិបាលកម្ពុជា ដែលមានសម្តេច ហ៊ុន សែន ជាប្រមុខដឹកនាំ។ ដូច្នេះយើងទាំងអស់គ្នាត្រូវរួមគ្នាថែរក្សាឲ្យបាននូវសមិទ្ធិផលដ៏ថ្លៃថ្លានេះសម្រាប់កូនចៅជំនាន់ក្រោយ។
ឯកឧត្តម បានគូសបញ្ជាក់ថា រហូតមកទល់បច្ចុប្បន្ននេះ គោលការណ៍របស់រាជរដ្ឋាភិបាលបានផ្តល់សិទ្ធិពេញលេញ ក្នុងការគ្រប់គ្រងសាសនាដែលយើងស្រឡាញ់ពេញចិត្ត។ប៉ុន្តែអំឡុងពេលនេះ មានបញ្ហាប្រឈមមួយចំនួន ស្ថិតនៅខ្សែបន្ទាប់ព្រំដែន កម្ពុជា-ឡាវ(ខេត្តស្ទឹងត្រែង) ឯកឧត្តម ក៏បានលើកពីករណីខ្លះៗពីសំណាក់អ្នកនយោបាយពូកែខាងប្រូ និងខ្លាំងខាងជេរ ឬអួតអាងថាស្នេហាជាតិ ប៉ុន្តែដល់ពេលមានបញ្ហាកើតឡើងនៅឯព្រំដែន បែរជាមិនឃើញចេញមុខមកជួយការពារឬរកវិធានការទប់ទល់ឡើយ បក្សនោះបានតែបោក បានតែថា អត់ធ្វើអ្វីបានមួយចម្រៀកឡើយ។ដូច្នេះសូម លោកតា លោកយាយ និងបងប្អូនឈប់ជឿរពាក្យកុហកបោកប្រាស់នេះទៀតទៅ។
ក្នុងឱកាសនោះដែរ ឯកឧត្តម ហ៊ុន ម៉ាណែត ក៏បានបំពាក់គ្រឿងឥស្សរិយសដល់មន្ត្រីរាជការនិងសប្បុរសជនដែលមានស្នាដៃក្នុងការងារ ព្រមទាំងឧបត្ថម្ភថវិកាដល់សាសនិកឥស្លាម សម្រាប់ប្រើប្រាស់ក្នុងមជ្ឈមណ្ឌល តាមតម្រូវការ និងបានឧបត្ថម្ភថវិកាមួយចំនួន ដល់កងកំលាំងប្រដាប់អាវុធគ្រប់អង្គភាព លោកគ្រូ អ្នកគ្រូ សិស្សានុសិស្សនៃសាសនិកឥស្លាម ព្រមទាំងប្រគល់ កុំព្យូទ័រ យួរដៃចំនួន៨គ្រឿងដល់មន្ត្រីរាជការក្នុងខេត្តកំពតផងដែរ។ហើយក្នុងពេលដដែលនោះ ឯកឧត្តម ក៏បានកាត់ខ្សែបូ សម្ពោធនូវអគារនៃមជ្ឈមណ្ឌលឥស្លាម-អាល់ហ្សាមេល ខេត្តកំពត ដើម្បីប្រើប្រាស់ចាប់ពីពេលនេះទៅ ៕
ណារិទ្ធ
