ខេត្តបន្ទាយមានជ័យ ៖ នៅព្រឹកថ្ងៃទី១០ ខែសីហា ឆ្នាំ២០១៧នេះ កម្លាំងនគរបាលអន្តោរប្រវេសន៍ ក្រោមការដឹងនាំដោយលោកឧត្តមសេនីត្រី សឹម សំអាត មេប៉ុស្តិ៍នគរបាលអន្តោរប្រវេសន៍ច្រកទ្វារអន្តរជាតិប៉ោយប៉ែត បានចុះប្រតិបត្តិការរៀបចំសណ្តាប់ធ្នាប់នៅចំណុចច្រកទ្វារអន្តរជាតិប៉ោយប៉ែត ។
សូមជំរាបដែរថា ៖ ការចុះប្រតិបត្តិការនោះដែរកម្លាំងនគរបាលបានឲ្យក្រុមម៉ូតូកង់បី ដែលតែងតែចតចាំទទួលសណ្តោង រទេះដឹកទំនិញអូសចេញពីទឹកដីថៃនៅចំណុចច្រកទ្វារអន្តរជាតិប៉ោយប៉ែតនោះ ប្តូរទីតាំងទៅចតទៅចំណុចរង្វង់មូលក្រុងប៉ោយប៉ែតវិញដើម្បីបញ្ចៀសការកកស្ទះ ។
បើតាមលោក សេម មករា នាយផ្នែកសេនាធិការនគរបាលប៉ុស្តិ៍អន្តោរប្រវេសន៍ច្រកទ្វារអន្តរជាតិប៉ោយប៉ែត បានឲ្យដឹងថា៖ការរៀបចំបែបនេះដោយធ្វើឡើងតាមបទបញ្ជារបស់អង្គភាពដើម្បីឲ្យច្រកទ្វារព្រំដែនមួយនេះមានសណ្តាប់ធ្នាប់ល្អ ហើយក្រុមម៉ូតូកង់បីដែលឈប់ចតរញ៉េរញ៉ៃដណ្តើមគ្នាចាប់ម៉ូយរទេះអូសចេញពីថៃពេញច្រកទ្វារបានធ្វើឲ្យមានការកកស្ទះនិងប៉ះពាល់ដល់ការធ្វើដំណើររបស់ភ្ញៀវជាតិ អន្តរជាតិជាខ្លាំងសំខាន់ ។ ជាងនោះទៀត ម៉ូតូកង់បីខ្លះបានទៅចតសាងសណ្តោងដល់លើស្ពានព្រំដែនដែនធ្វើឲ្យរថយន្តដឹកទំនិញសេដ្ឋកិច្ចពាណិជ្ជកម្មថៃ ដែលឆ្លងទៅមកនៅចំណុចច្រកទ្វារមួយនេះជួបការពិបាកខ្លាំង។ហើយកន្លងមកសមត្ចកិច្ចក៏បានធ្វើការណែនាំដល់ក្រុមអ្នកបើកម៉ូតូកង់បីជារឿយៗផងដែរប៉ុន្តែពួកគាត់មិនព្រមស្តាប់ហើយនៅតែចតត្រៀបត្រាចាំដណ្តើមម៉ូយអូសរទេះគ្នាដដែល។
បើតាមក្រុមអ្នកបើកម៉ូតូកង់បីបានឲ្យដឹងថា ៖ នាពេលកន្លងមកពួកគាត់បានបង់លុយឲ្យសមត្ថកិច្ចនៅចំណុចក្បាលស្ពានព្រំដែននោះ ត្រឹមត្រូវ ប៉ុន្តែទើបតែថ្ងៃនេះត្រូវសមត្ថកិច្ចបញ្ជារឲ្យមកចតត្រង់រង្វល់មូលទៅវិញ ។ ពួកគាត់បានបន្តថា៖ការរៀបចំបែបនេះធ្វើឲ្យពួកគាត់ពិបាកហើយក្រុមអ្នកអូសរទេះ ចេញពីថៃក៏រឹតតែពិបាកខ្លាំងជាងគាត់ទៅទៀតព្រោះកន្លងមកឲ្យតែក្រុមអ្នកអូសរទេះចេញពីប្រទេសថៃ មកដល់ស្ពានព្រំដែនភ្លាមក្រុមម៉ូតូកង់បីគឺនឹងទៅសណ្តោងអូសបន្តភ្លាមៗចុះដល់ពេលរៀបចំបែបនេះ តើក្រុមអ្នកអូសរទេះពិបាកខ្លាំងយ៉ាងណាទម្រាំអូសមកដល់រង្វង់មូលប៉ោយប៉ែត? ។
ជុំវិញបញ្ហាខាងលើនេះដែរ លោកឧត្តមសេនីត្រី សឹម សំអាត មេប៉ុស្តិ៍នគរបាលអន្តោរប្រវេសន៍ច្រកទ្វារអន្តរជាតិប៉ោយប៉ែតបានធ្វើការសម្របសម្រួលជាមួយក្រុមអ្នករត់ម៉ូតូកង់បីទាំងនោះរហូតដល់វេលាម៉ោង១២ថ្ងៃត្រង់ទើបទទួលបានជាផ្លែផ្កាសម្រេចឲ្យចតនៅចំណុចរង្វង់ក្រុងប៉ោយប៉ែត ៕
