កំពត ៖ យ៉ាងហោចណាស់មនុស្សបីនាក់បានរងរបួសធ្ងន់ស្រាល ដោយសារជួបហេតុការណ៍គ្រោះថ្នាក់ចរាចរណ៍នៅលើកំណាត់ផ្លូវជាតិលេខ៣១ចំណុចមុខស្ថានីយ៍ប្រេងឥន្ទនៈមួយកន្លែងរវាងម៉ូតូនិងម៉ូតូក្នុងទិសដៅស្របគ្នា។
គ្រោះថ្នាក់ដែលចាត់ទុកជាការធ្វេសប្រហែសអ្នកបើកបរខាងលើបានកើតឡើងនៅវេលាម៉ោង៧និង១៥នាទី ថ្ងៃទី០៦ខែឧសភា ឆ្នាំ២០១៧ក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត រវាងម៉ូតូC125ដូចគ្នា។
សាក្សីដែលបានឃើញហេតុការផ្ទាល់ភ្នែកនិយាយថា មុនដំបូងគេឃើញម៉ូតូមួយគ្រឿងម៉ាកC125ពណ៌ខ្មៅបើកបរដោយនារីវ័យក្មេងម្នាក់ក្នុងទិសដៅពីលិចទៅកើត ដោយនាងបានបត់ម៉ូតូបំណងចូលចាក់សាំងតែមិនបានឲ្យសញ្ញាសម្គាល់ គាប់ជួនក៏មានម៉ូតូមួយគ្រឿងទៀតម៉ាកC125ពណ៌ខ្មៅដូចគ្នា ជិះគ្នាបីនាក់បើកបរស្របពីក្រោយ ក្នុងនោះមានក្មេងប្រុសតូចម្នាក់ផងដែរ ស្រាប់តែវាក់អើគ្នា ដោយគេចមិនទាន់ទើបបណ្តាលឲ្យម៉ូតូទាំងពីរគ្រឿងព្រលះគ្នាប្រាវតែម្តង បណ្តាលឲ្យភាគីម៉ូតូខាងក្រោយដែលមានមនុស្សជិះ៣នាក់នោះទទួលគ្រោះថ្នាក់តែម្តង ។
ដោយឡែក អ្នកជិះម៉ូតូខាងមុខ ដែលជាអ្នកបង្កហេតុពុំបានទទួលគ្រោះថ្នាក់ធ្ងន់ធ្ងរទេ ហើយក្រោយពេលកើតហេតុភ្លាមៗក៏បានទុកម៉ូតូចោលនៅកន្លែងកើតហេតុរួចគេចខ្លួនបាត់ស្រមោលឈឹង។សាក្សីដដែលបាននិយាយទៀតថា ចំពោះករណីដែលបង្កឲ្យមានមនុស្សគ្រោះថ្នាក់នេះគឺមកពីកក្តាមនុស្ស ពោលគឺភាគីដែលបើកបរនៅខាងមុខពេលបត់ឆ្វេងមិនគោរពអទិភាពផ្លូវដោយ មិនបានប្រើភ្លើងសញ្ញាសម្គាល់និងមិនពិនិត្យមើលមុខក្រោយដោយបត់ទាំងបង្ខំទើបបង្កគ្រោះថ្នាក់បែបនេះ។
ប៉ូលិសចរាចរណ៍ដែលកំពុងវាស់វែងបាននិយាយថា គ្រោះថ្នាក់ខាងលើគឺបង្កឡើងដោយសារភាគីម៉ូតូC125ពណ៌ខ្មៅ សេរីឆ្នាំ២០១៥ដែលជិះម្នាក់ឯង ពាក់ស្លាកលេខ កំពត 1I-6621 ពេលនេះម្ចាស់ម៉ូតូគេចបាត់ស្រមោល។ព រីឯភាគីម៉ូតូជិះពីក្រោយរួមមាន៖ទី១.ឈ្មោះ ជួន កប ភេទស្រី អាយុ១៩ឆ្នាំ ជាអ្នកបើកបរ រងរបួសធ្នន់ ២.ឈ្មោះ ព្រំ គឹមហ៊ាន ភេទស្រី អាយុ៤៤ឆ្នាំ អ្នករួមដំណើរនិងត្រូវជាម្តាយ របួសមធ្យម និងទី៣ ឈ្មោះជួន ហៀងម៉ាន់ ភេទប្រុស អាយុ៦ឆ្នាំ របួសផ្នែកមុខមាត់ធ្ងន់ធ្ងរ ទាំងបីនាក់រស់នៅក្នុងភូមិព្រៃទប់ ឃុំបឹងសាលាខាងជើង ស្រុកកំពង់ត្រាច ខេត្តកំពត ជិះម៉ូតូម៉ាកC125ពណ៌ខ្មៅ ផលិតឆ្នាំ២០១២ ពាក់ស្លាកលេខ ព្រះសីហនុ 1D-0689។
បច្ចុប្បន្នជនរងគ្រោះទាំងបីនាក់ត្រូវបានគេបញ្ជូនទៅសង្គ្រោះនៅឯមន្ទីរពេទ្យបង្គែកស្រុក។ដោយឡែកមធ្យោបាយពាក់ព័ន្ធទាំង២គ្រឿងប៉ូលិសបានយកទៅរក្សាទុកនៅក្នុងអធិការដ្ឋាននគរបាលស្រុកកំពង់ត្រាច សម្រាប់ដោះស្រាយគ្នាជាក្រោយ ៕
ណារិទ្ធ
