ខេត្តប៉ៃលិន៖ មានឧបទ្ទេវហេតុមួយ បានកើតឡើងកាលពីវេលាម៉ោង១៩ និង៥០នាទីយប់ថ្ងៃទី៣ ខែកុម្ភៈ ឆ្នាំ២០១៧ ខណៈពេលរថយន្តដឹកសំរាមរបស់ក្រុមហ៊ុនអនាម័យខេត្តប៉ៃលិន មួយគ្រឿង បានដាច់ហ្វ្រាំងរអិលថយក្រោយបុកជាមួយរថយន្ត camry បាឡែន ដែលចតស្ងៀមមុខផ្ទះលោក សុខ គង់ បណ្តាលឲ្យខូចខាតធ្ងន់ ហើយរថយន្តរងគ្រោះ បានជ្រុលទៅបុកនិងទ្វាដែកផ្ទះលោក សុខ គង់ បន្តទៀត បណ្តាលឲ្យខូចខាតចំនួន២ផ្ទាំង ។ ហេតុការណ៍ខាងលើនេះ បានកើតឡើងនៅចំណុចផ្លូវចុះ ចូលផ្សារសាមគ្គី ហៅផ្សារប៉ាហ៊ី ស្ថិតក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពព័ត៌មាននិយាយថា៖ម្ចាស់ផ្ទះដែលរងគ្រោះឈ្មោះ សុខ គង់ ភេទប្រុស អាយុជាង៦០ឆ្នាំ ជាអាជីវករលក់គ្រឿងសំណង រស់នៅភូមិអូរតាពុកក្រោម សង្កាត់ទូលល្វា ក្រុងប៉ៃលិន តែផ្ទះដែលរងគ្រោះជាផ្ទះចាស់ទុកសម្រាប់ជួល ។
ចំណែកម្ចាស់រថយន្តរងគ្រោះឈ្មោះ នួន វាសនា ភេទប្រុស អាយុ៣៩ឆ្នាំ មុខរប លក់ដូ រស់នៅភូមិកើតហេតុ មិនបណ្តាលឲ្យគ្រោះថ្នាក់ដល់មនុស្សទេ ដែលមានរថយន្តម៉ាក camry បាឡែន ពណ៍ ទឹកប្រាក់ សេរី ២០០២ ពាក់ស្លាកលេខ បាត់ដំបង 2A 7522 (ខូចខាតធ្ងន់) ។ដោយឡែករថយន្តបង្កជារថយន្តដឹកសំរាម ពណ៍ ស ក្បាល តួខៀវ អត់ស្លាកលេខ អត់ខូចខាត បើកបដោយជនមិនស្គាល់អត្តសញ្ញាណ បានរត់គេចខ្លួនបាត់ស្រមោល។
តាមប្រភពព័ត៌មាន ពីកន្លែងកើតហេតុ បានឲ្យដឹងថា៖ ជាដំបូងគេឃើញរថយន្តដឹកសំរាមរបស់ក្រុមហ៊ុនខាងលើ បានចូលទៅយកសំរាមជុំវិញផ្សារ នៅផ្នែកខាងក្រោម រួចក៏បើកឡើងមកលើវិញជាធម្មតា លុះមកដល់ចំណុចមុខហាងលក់ទូរស័ព្ទយីហោវាសនា ក៏ឈប់ ហើយមានកម្មករ៣ទៅ៤នាក់ បានចុះមកយកសំរាមដាក់ក្នុងរថយន្តដឹកសំរាម ។
ប្រភពព័ត៌មាន បន្តទៀតថា៖ លុះយកសំរាមរួចរាល់ មានកម្មករពីរនាក់ បានយកប្រដាប់កល់កង់រថយន្តចេញ ស្របពេលអ្នកបើកបរបញ្ឆោះរថយន្តមិនឆេះ ហើយជាន់ហ្វ្រាំងមិនជាប់ផងនោះ រថយន្តក៏រអិលថយចុះមកក្រោម ចំណែកអ្នកធ្វើដំណើរដោយម៉ូតូ និងរថយន្ត ដែលឡើងទៅលើភ័យស្លន់ស្លោរ បើកគេចព្រោះខ្លាចគ្រោះថ្នាក់ដល់ជីវិត ។
ប្រភពព័ត៌មានបន្តថា៖ បន្ទាប់មករថយន្ត ក៏បុកជាមួយរថយន្តម៉ាកកាមរីប៉ាឡែន ដែលចតស្ងៀមពេញទំហឹង បណ្តាលឲ្យខូចខាតធ្ងន តែមិនមានបញ្ហាដល់មនុស្សនោះទេ ចំណែករថយន្តរងគ្រោះ បានស្ទុះទៅបុកទ្វាផ្ទះលោក សុខ គង់ ជាបន្ត បណ្តាលឲ្យខូចខាតធ្ងន់ផងដែរ ។ ក្រោយពេលកើតហេតុគេឃើញអ្នកបើកបរ បានចុះពីរថយន្តរត់គេចខ្លួនបាត់ស្រមោល ។
ប្រភពព័ត៌មាន ពីសមត្ថកិច្ចចរាចរណ៏ខេត្តប៉ៃលិន ដែលចុះទៅវាស់វែងកន្លែងកើតហេតុ បានឲ្យដឹងថា៖ ករណីខាងលើត្រូវភាគីរងគ្រោះ និងតំណាងក្រុមហ៊ុន ដោះស្រាយសម្របសម្រួលគ្នា ដោយតំណាងក្រុមហ៊ុនចេញថ្លៃបង់សំណង ដល់រថយន្តគ្រោះចំនួន៨៧០០ដុល្លា ដោយមិនយករថយន្តមកប្រើវិញនោះទេ ។
ប្រភពព័ត៌មានបន្តថា៖ ចំណែកភាគីម្ចាស់ផ្ទះរងគ្រោះ ដែលមានកូនជាតំណាង គឺមិនទាមទារអ្វីនោះទេ ដោយតម្រូវឲ្យក្រុមហ៊ុនបង្កធ្វទ្វាឲ្យដូចដើមវិញ តែប៉ុណ្ណោះ ។
សូមបញ្ជាក់ថា៖ រថយន្តបង្កនេះធ្លាប់បង្កគ្រោះដល់អាយុជីវិតពលរដ្ឋចំនួនពីរនាក់មកហើយ កាលពីប៉ុន្មានខែកន្លងទៅ ដោយមួយល់កកើតហេតុក្នុងស្រុកសាលាក្រៅ និងមួយទៀតនៅភូមិក្បាល់ព្រលាន ក្នុងសង្កាត់អូរតាវ៉ៅ ។ គ្រោះថ្នាក់ទាំងនេះគឺដោយសារតែរថយន្តបង្កជាន់ហ្វ្រាំងមិនស៊ី ហើយនេះក៏ជាលើកទី៣ដែរ ។
ពលរដ្ឋសំណូមឲ្យក្រុមហ៊ុនមេត្តាពិនិត្យមើលរថយន្តរបស់ខ្លួនផង ពិសេសគឺត្រូវពង្រឹងអ្នកបើកបររថយន្ត មុននិងឡើងលើរថយន្ត ត្រូវពិនិត្យឲ្យសពគ្រប់ ជាសវាងការកើតឧបទ្ទេវហេតុអ្វីមួយផងដែរ ៕
