ខេត្តកណ្តាល ៖ កាលពីព្រឹកម៉ោង០៧ និង ៣០នាទី នាទីថ្ងៃអាទិត្យ ទី៣១ ខែមករា ឆ្នាំ២០១៦ នៅផ្សារទីរួមស្រុកស្អាង ភូមិព្រែករុន ឃុំព្រែកគយ ស្រុកស្អាង មានមានការដាក់តាំងលក់ត្រីពេលព្រឹកជាច្រើនពាសពេញមុខផ្សារ និងមានក្លិនស្អុយឆ្អេះឆ្អាបជាខ្លាំង ដែលការដាក់តាំងនោះ រួមមាន ប្រភេទត្រីឆ្តោ និងត្រីចាប និងត្រីផ្សេងៗទៀត ។
បន្ទាប់ពីនោះ អ្នកយកព័ត៌មានយើងក៏បានផ្តិតយករូបភាពទិដ្ឋភាពនោះ ក៏ស្រាប់តែ តំណាងអ្នកភាស៊ី ឈ្មោះ ប៉ោ សេង អាយុ ៤៥ ឆ្នាំ មានទីកន្លែងកំណើតភូមិព្រែកឃ្លោក ឃុំត្រើយស្លា ស្រុកស្អាង ខេត្តកណ្តាល បានស្រែកជេរប្រមាថយ៉ាងខ្លាំង មកលើអ្នកកាសែត ឈ្មោះ ហុក វិបុល និងមានការគំរាមកំហែងឈានដល់ការលើកដៃវ៉ៃដាល់លើតំណាងអ្នកយកព័ត៌មានថែមទៀត ។ លើសពីនោះ ប៉ោ សេង ថែមទាំងបានស្រែកប្រាប់អ្នកលក់ដូរនៅមុខផ្សារថា «វ៉ៃអ្នកកាសែតមួយបង់លុយ» ទៀតផង ដោយបុគ្គលរូបនេះ អះអាងថា វ៉ែអ្នកកាសែតបង់លុយមួយអស់ម៉ាណ (ប៉ុន្មាន) ។
លោក ហុក វិបុល បានឲ្យដឹងថា លោកបានជម្រាបមកលោកអភិបាលស្រុកស្អាងរួចហើយ ពីករណី ឈ្មោះ ប៉ោ សេង ចេតនាវ៉ៃអ្នកកាសែតមួយបង់លុយនេះ ។ លោកក៏បានទៅដាក់ពាក្យបណ្តឹងនៅអធិការដ្ឋាននគរបាលស្រុកស្អាង ប៉ុន្តែដោយសារតែថ្ងៃអាទិត្យជាថ្ងៃឈប់សម្រាក បានរង់ចាំដាក់ពាក្យបណ្តឹងនៅថ្ងៃច័ន្ទវិញ ។
មជ្ឈដ្ឋានអ្នកសារព័ត៌មានសូមអំពាវនាវឲ្យអាជ្ញាធរមេត្តាមានវិធានការចំពោះការរលោភលើអ្នកសារព័ត៌មាន ដោយជនទំនើង ប៉ោ សេង ករណីចេតនាវ៉ៃអ្នកកាសែតបង់លុយ ដោយក្តីអនុគ្រោះ ៕
ដោយ ៖ សហការី
