មណ្ឌលគិរី ៖ ក្រោយពីមានបទបញ្ជាយ៉ាងមុតមាំរបស់សម្តេចតេជោ ហ៊ុន សែន កាលពីពាក់កណ្តាលខែមករា ឆ្នាំ២០១៦មក គឺមានករណីចាប់បង្ក្រាបបទល្មើសព្រៃឈើជាច្រើនហូហែរបន្តបន្ទាប់ រហូតមកដល់យប់ថ្ងៃទី២៨ ខែមករា ឆ្នាំ២០១៦ មានមួយករណីថ្មីទៀត គឺយុវជនមួយក្រុមព្រហើន ហ៊ានលួចដឹកឈើខុសច្បាប់ បណ្តាលឲ្យកម្លាំងសមត្ថកិច្ចខេត្តមណ្ឌលគិរីមានស្នាដៃបន្ថែមទៀត។
នៅវេលាម៉ោង១១:៤៥នាទី យប់ថ្ងៃខែឆ្នាំខាងលើ កម្លាំងអាវុធហត្ថស្រុកកែវសីមាបានសហការជាមួយកម្លាំងអាវុធហត្ថខេត្តក្រចេះ ចាប់បង្ក្រាបបានរថយន្តដឹកឈើមួយគ្រឿង ម៉ាកឡង់គ្រីស័រ ពណ៌ខ្មៅ គ្មានស្លាកលេខ និង ឃាត់ខ្លួនជនសង្ស័យចំនួន៥នាក់ ។
តាមប្រភពពីលោកមេបញ្ជាការកងរាជអាវុធហត្ថស្រុកកែវសីមាបានអោយដឹងថា ជនសង្ស័យទី១មានឈ្មោះ ឈន ចាន់រិទ្ធី ភេទប្រុស អាយុ២៣ឆ្នាំ សញ្ជាតិខ្មែរ មុខរបរមិនពិតប្រាកដ ភូមិជើងឃ្លេ ឃុំ២ធ្នូរ ស្រុកស្នួល ខេត្តក្រចេះ ទី២ឈ្មោះ ចេង រដ្ឋា ភេទប្រុសអាយុ ១៩ឆ្នាំ សញ្ជាតិខ្មែរ មុខរបរមិនពិតប្រាកដ រស់នៅភូមិស្រែព្រះ ឃុំស្រែព្រះ ស្រុកកែវសីមា ខេត្តមណ្ដលគិរី ទី៣ឈ្មោះ ចេង រិទ្ធី ភេទប្រុស អាយុ២២ឆ្នាំ សញ្ជាតិខ្មែរ មុខរបរមិនពិតប្រាកដ រស់នៅភូមិស្រែព្រះ ឃុំស្រែព្រះ ស្រុកកែវសីមា ខេត្តមណ្ឌលគិរី ទី៤ឈ្មោះ អៀម ស៊ីវន ភេទប្រុស អាយុ ២៥ឆ្នាំ សញ្ជាតិខ្មែរ មុខរបរមិនពិតប្រាកដ រស់នៅភូមិជើងឃ្លេ ឃុំ២ធ្នូរ ស្រុកស្នួល ខេត្តក្រចេះ និង ជនសង្ស័យទី៥ មានឈ្មោះ សម្បត្តិ វេហា ភេទប្រុស អាយុ១៩ឆ្នាំ មុខរបរមិនពិតប្រាកដ រស់ភូមិស្រែខ្ទុម ឃុំស្រែខ្ទុម ស្រុកកែវសីមា ខេត្តមណ្ឌលគិរី ។ បច្ចុប្បន្នជនសង្ស័យ ព្រមទាំងវត្ថុតាងទាំងអស់ កម្លាំងអាវុធហត្ថកំពង់ឃាត់ខ្លួននៅក្នុងបរិវេណក្រុមហ៊ុន ប៊ញហ្វឿក១ និង ធ្វើការបញ្ជូនទៅផ្នែកជំនាញបទល្មើសព្រៃឈើ នៅពេលក្រោយដើម្បីចាត់ការទៅតាមនីតិវិធីច្បាប់ ៕
ដោយ ៖ គឹម ចំរើន
