ភ្នំពេញ ៖នៅព្រឹកថ្ងៃទី០៩ វិច្ចិកា ឆ្នាំ២០១៩ ជាថ្ងៃដែលប្រជាជនកម្ពុជាទូទាំងប្រទេស ចងចាំមិនភ្លេចឡើយ ព្រោះវាជាថ្ងៃដែល ប្រជាជនគ្រប់រូប រំឭកគុណ ដល់អ្នកស្នេហាជាតិ ដែលបានពលីជីវិត ដើម្បីទាមទារឯករាជ្យពីពួកអាណានិគមបារាំង។
ដើម្បីអបអរសាទរ ទិវាបុណ្យឯករាជ្យជាតិ និងភ្ជាប់ជាមួយនឹងព្រះរាជពិធីបុណ្យ អ៊ុំទូក បណ្តែតប្រទីប សំពះព្រះខែ និងអកអំបុក អាជ្ញាធរខេត្តកំពង់ចាមបានរៀបចំពិធីនេះនៅតាមបណ្តាទីអារាម គ្រប់វត្តដើម្បីអោយប្រជាពលរដ្ឋបានចូលរួមកម្មវិធីយ៉ាងសប្បាយរីរាយគ្រប់ៗគ្នា។
ជាក់ស្តែងនៅព្រឹកមិញនេះ នៅទីលានសួនច្បារមុខសាលាខេត្ត រដ្ឋបាលខេត្តបានរៀបចំកម្មវិធី ជួបជុំថ្នាក់ដឹកនាំមន្ត្រីរាជការ និងប្រជាពលរដ្ឋដើម្បីប្រារព្វពិធីអកអំបុក និងរាំលេងកំសាន្តអបអរសាទរ ទិវាបុណ្យឯករាជជាតិ ថ្ងៃ ០៩ វិច្ឆិកាក្រោមវត្តមានរបស់ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងលោកជំទាវ ញូង ចរិយា អ៊ុន ចាន់ដា, លោក ខ្លូត ផន ប្រធានក្រុមប្រឹក្សាខេត្ត ឯកឧត្តម លោកជំទាវជា សមាជិកក្រុមប្រឹក្សាខេត្ត ឯកឧត្តម លោកជំទាវ ជាអភិបាលរងខេត្ត កងកម្លាំងទងបី ព្រមទាំងថ្នាក់ដឹកនាំមន្ទីរីរ អង្គភាពជុំវិញខេត្ត មន្ត្រីរាជការ និងប្រជាពលរដ្ឋយ៉ាងច្រើនកុះករ។
មានប្រសាសន៏នៅក្នុងឱកាសនោះ ឯកឧត្តម អ៊ុន ចាន់ដា អភិបាលខេត្តបានលើកឡើងថា ថ្ងៃនេះបងប្អូនប្រជាពលរដ្ឋរួមជាមួយមន្ត្រីរាជការទាំងអស់ត្រូវបានសម្រាកពីការងារដើម្បីចូលរួមសប្បាយរីរាយជាមួយទិវាបុណ្យជាតិថ្ងៃ០៩វិច្ឆិកាដែលត្រូវបានរៀបចំនៅទីកន្លែងនេះ និងនៅតាមបណ្តាវត្តអារាមនានាក្នុងទូទាំងខេត្ត។ ឯកឧត្តមបញ្ជាក់ថា ទាំងអស់នេះ គឺដោយសារតែប្រទេសជាតិយើងមានសុខសន្តិភាព ក្រោមការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជាប្រមុខដឹកនាំដូចនេះ សូមបងប្អូនទាំអស់គ្នាត្រូវចូលរួមថែរក្សានិងការពារ មិនត្រូវវជឿតាមការញុះញង់ណាមួយរបស់ក្រុមក្បត់ជាតិ ដែលមានបំណងបង្ករអសន្តិសុខ និងផ្តួលរំលំរាជរដ្ឋាភិបាលនោះទេ។
បន្ទាប់មក ឯកឧត្តមអភិបាលខេត្ត និងលោកជំទាវ ព្រមទាំងថ្នាក់ដឹកនាំទាំងអស់បានអញ្ជើញចូលរួមកម្មវិធីជាមួយមន្ត្រីរាជការនិងប្រជាពលរដ្ឋយ៉ាងសប្បាយរីករាយ។
