(ខេត្តកំពត)៖ សិក្ខាសាលាផ្សព្វផ្សាយច្បាប់ ស្តីពី សវនកម្ម និងស្តង់ដារសវនកម្មសាធារណៈ នៃព្រះរាជាណាចក្រកម្ពុជា ត្រូវបានរៀបចំឡើងនៅក្នុងសណ្ឋាគារកំពតឌីយ៉ាម៉ង់ នាព្រឹក ថ្ងៃសុក្រ ៥រោច ខែអស្សុជ ឆ្នាំកុរ ឯកស័កិ ព.ស២៥៦៣ ត្រូវនឹងថ្ងៃទី១៨ ខែតុលា ឆ្នាំ២០១៩ ក្រោមការអញ្ជើញចូលរួមពីសំណាក់ លោកបណ្ឌិត អ៊ុក សារាវុធ អគ្គសវនកររង នៃអាជ្ញាធរសវនកម្មជាតិ និងលោក ជាវ តាយ អភិបាល នៃគណៈអភិបាលខេត្តកំពត។
អញ្ជើញចូលរួមក្នុងអង្គសិក្ខាសាលានេះរួមមាន៖ ប្រតិភូសវនកម្មជាតិ លោកនាយករដ្ឋបាលខេត្ត ប្រធានមន្ទីរ អង្គភាពជុំវិញខេត្ត អភិបាលក្រុង ស្រុក នាយកទីចាត់ការ ប្រធានអង្គភាពចំណុះសាលាខេត្ត មេឃុំ ចៅសង្កាត់ និងមន្ត្រីជំនាញ សរុបចំនួន ១៣៩នាក់។
មានមតិក្នុងសិក្ខាសាលានេះ លោក ជាវ តាយ អភិបាលខេត្តកំពត មានប្រសាសន៍ថា ការរៀបចំសិក្ខាសាលានេះឡើង ដើម្បីឲ្យអាជ្ញាធររដ្ឋបាលថ្នាក់ក្រោមជាតិរបស់យើង បានយល់ដឹងអំពីអ្វីទៅជាច្បាប់សវនកម្មសាធារណៈ ក្នុងគោលបំណងដូចជា៖ ធ្វើការត្រួតពិនិត្យលើកិច្ចការប្រតិបត្តិការ និងកម្មវិធីរបស់ស្ថាប័នសាធារណៈ ,ធ្វើឲ្យមានតម្លាភាពលើការប្រមូលចំណូល និងអនុវត្តនៃថវិកាជាតិ ,តាមដាន និងត្រួតពិនិត្យឡើងវិញនូវភាពត្រឹមត្រូវ និងសមស្របនៃរបាយការណ៍ហិរញ្ញវត្ថុ ,ពង្រឹងប្រព័ន្ធត្រួតពិនិត្យផ្ទៃក្នុងរបស់បណ្តាស្ថាប័នសាធារណៈជាដើម៕ សេង ណារិទ្ធ
