កំពង់ចាម ៖នៅព្រឹកថ្ងៃទី០៥ ខែសីហា ឆ្នាំ២០១៩នេះ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានផ្ដាំផ្ញើដល់សិស្សថ្នាក់ទី១២ ដែលកំពុងត្រៀមប្រលងទុតិយភូមិឆ្នាំ ២០១៩នេះ ត្រូវខិតខំប្រឹងប្រែងរៀនសូត្រ និងយកចិត្តទុកដាក់ខ្ពស់ ចំពោះការសម្រចចិត្ត ដើម្បីទទួលបាននិទ្ទេសល្អ ។
ឯកឧត្ដម អ៊ុន ចាន់ដា អភិបាលខេត្តកំពង់ចាមបានថ្លែង ក្នុងពិធីសំណេះសំណាលជាមួយ លោកគ្រូអ្នកគ្រូ បំប៉នស្ម័គ្រចិត្ត និងសិស្សថ្នាក់ទី១២ ក្នុងក្រុងកំពង់ចាម ខេត្តកំពង់ចាម ។
ឯកឧត្ដម អ៊ុន ចាន់ដា អភិបាលខេត្ត មានប្រសាសន៍ លើកទឹកចិត្តដល់សិស្សានុសិស្សបន្តខិតខំបេជ្ញាចិត្តរៀនសូត្រឲ្យខ្លាំងពូកែ ដោយត្រូវយកនិទ្ទេសA ទទួលបានរង្វាន់ម៉ូតូមួយគ្រឿង ហើយបន្តទៅរៀនមហាវិទ្យាល័យ ក្នុងការកំណត់គោលដៅជីវិត ចូលរួមអភិវឌ្ឍន៍ប្រទេសជាតិឲ្យបានល្អប្រសើរបន្ថែមទៀតផង។
ឯកឧត្ដម អ៊ុន ចាន់ដា អភិបាលខេត្ត បានអំពាវនាវដល់អាជីវកម្ម បើកកន្លែងកូពីព្រីន ត្រូវបញ្ឈប់អាជីវកម្មក្នុងថ្ងៃដំណើរពេលប្រលង ហើយអាជ្ញាធរខេត្តបានត្រៀមថែរក្សានូវសន្តិសុខសណ្តាប់ធ្នាប់ នៅជុំវិញបរិវេណមណ្ឌលប្រលង នឹងពេទ្យប្រចាំការផងដែរ។
យោងតាមរបាយការណ៍ ការកំណត់មណ្ឌលប្រលងមធ្យមសិក្សាទុតិយភូមិ ឆ្នាំ២០១៩នេះ នៅក្នុងខេត្តកំពង់ចាម ក្រសួង អប់រំ យុវជន និង កីឡា បានចែកចេញពីរថ្នាក់ មានថ្នាក់វិទ្យាសាស្ត្រ មាន៥មណ្ឌល ស្មើរ នឹង១២៧ បន្ទប់ នឹងថ្នាក់វិទ្យាសាស្ត្រសង្គម មាន៩មណ្ឌល នឹង២០៩បន្ទប់ ៕
