មណ្ឌលគិរី៖ តាមប្រភពពីប្រជាពលរដ្ធនិងមន្ដ្រីមួយចំនួនបានបង្ហើបឱ្យដឹងថា មានមន្ត្រីយោធាម្នាក់ដែលឈរជើងនៅប៉ុស្តិ៍៦ស្ថិតក្នុងភូមិសាស្ត្រស្រុកពេជ្រាដា បាននឹងកំពុងកាក់កបដោយសារការរកស៊ីបទល្មើសព្រៃឈើ យោធាម្នាក់នោះត្រូវបានគេស្គាលថា ឈ្មោះ សយ ហឿន នេះហើយ។
គួរបញ្ជាក់ដឹងថាថ្មីៗនេះ មន្ត្រីយោធាខាងលើ បានរកសបទល្មើសព្រៃឈើជាយូរមកហើយ ដោយញុះញុងជនជាតិដើមភាគតិចឱ្យកាប់បំផ្លាញឈើនៅម្តុំប៉ុស្តិ៍៦យកមកលក់អោយខ្លួន ក្នុងមួយថ្ងៃៗមិនក្រោមពី៣ទៅ៤គោយន្តឫរថយន្តឡង់គ្រីស័រដែលមន្ត្រីយោធារូបនេះ យកទៅលក់ឱ្យឈ្មួញជនជាតិវៀតណាមតាមប៉ស្តិ៍៦យ៉ាងរំភើយ ដោយគ្មានខ្លាចញញើតច្បាប់អីបន្តិចសោះឡើយ ប្រហែលជាមានការបើកដៃពីមន្ត្រីជំនាញ សមត្ថកិច្ច និងអាជ្ញាធរស្រុកពេជ្រាដា ដោយសារបានទទួលប្រយោជន៍ពីមន្ត្រីយោធាឈ្មោះ សយ ហឿន ហើយមើលទៅ ពីព្រោះការរកស៊ីបទល្មើសព្រៃឈើនេះកើតឡើងជាយូរមកហើយ មិនដែលឃើញមន្ត្រីជំនាញ សមត្ថកិច្ច និងអាជ្ញាធរស្រុកពេជ្រាដាចុះបង្ក្រាបម្តងណាឡើយ។
ជុំវិញទៅនឹងការចោទប្រកាន់ខាងលើ មន្ត្រីយោធាឈ្មោះ សយ ហឿន បានបដិសេដថាខ្លួនមិនបានរកស៊ីបទល្មើសព្រៃឈើនោះទេ តែបើតាមប្រភពព័ត៌មានពីជាជនជាតិដើមភាគតិចនៅក្នុងស្រុកពេជ្រាដាថាការឆ្លើយបដិសេដរបស់មន្ត្រីយោធាឈ្មោះ សយ ហឿន គ្រាន់តែជាការដោះសារតែប៉ុណ្ណោះ ដំរីងាប់យកចង្អេរទៅក៏បាំងមិនជិតដែរ។
បន្ថែមទៀតថា:ជនជាតិដើមភាគតិចចាំមើលថា តើលោក សាន គឹមអឿន មេបញ្ជាការប្រតិបត្តិការសិករងមណ្ឌលគិរី លោក ឡោ សុខា ស្នងការនគរបាលខេត្តមណ្ឌលគិរី លោកស្វាយ សំអ៊ាង អភិបាលខេត្តមណ្ឌលគិរី មានចំណាត់ការយ៉ាងណារឺមួយទុកឱ្យមន្ត្រីយោធាឈ្មោះ សយ ហឿន ធ្វើផ្គរធ្វើភ្លៀងតាមតែអំពើចិត្តរបស់ខ្លួន..?៕
