ខេត្តតាកែវ ៖មានសេចក្តីរាយការណ៍ពីបណ្តាញយកព័ត៌មានក៍ដូចជាសក្ខីកម្មប្រជាសហគមន៍នេសាទបានអោយអង្គភាពសារព័ត៌មានយើងដឹងថា បទល្មើសនេសាទគ្រប់ប្រភេទបាននិងកំពុងប្រើប្រាសឧប្បករស្បៃមុងក្រឡាតូចៗក្រោម០,៣សង់ទីម៉ែត្រជារបាំងរាវវែងៗលានសន្ធឹងពេញផ្ទៃទន្លេ មួយខ្សែរៗរាប់រយ រាប់ពាន់ម៉ែត្រ អាជ្ញាធរមានសមត្ថកិច្ចពិសេសមន្ត្រីជំនាញជលផលដែលពាក់ព័ន្ធ ក្នុងស្រុកបុរីជលសារ ខេត្តតាកែវមិនបង្រ្កាប តើមូលហេតុអ្វី?បានជាបណ្ដែតបណ្ដោយឲ្យមានបទល្មើសនេសាទ ពេញផ្ទៃទន្លេយ៉ាងដូច្នេះទៅវិញ។
ពិតមែនតែរដូវបើកនេសាទយ៉ាងដូច្នេះមែនតែច្បាប់បានកំណត់និងហាមឃាត់ស្តីអំពីការប្រើប្រាស់ឧប្បករនេសាទដែលមានក្រឡាស្បៃមុងតូចក្រោម០,៣សង់ទីម៉ែត្រក្រឡាស្បៃមុងនេះហើយដែលជាកត្តាបំផ្លាញធនធានជលផលយ៉ាងធ្ងន់ធ្ងរ។ តាមការពិនិត្យជាក់ស្តែងប្រជានេសាទភាគច្រើនដែលប្រកបមុខរបនេសាទស្របច្បាប់គឺពួកគាត់គ្រាន់តែរកសុីជាលក្ខណ:គ្រួសារប៉ុណ្ណោះ វាណាស់តែពពួកឈ្មួញធំៗទេដែលគេអាចប្រើប្រាស់ឧប្បករនេសាទខុសច្បាប់បានការប្រើប្រាស់ឧប្បករនេសាទខុសច្បាប់បានគឺវាផ្តើមចេញពីការឃុបឃិតគ្នាជាប្រព័ន្ធ រវាងឈ្មួញប្រព្រឹត្តបទល្មើសនិងមន្ត្រីជំនាញពាក់ព័ន្ធមួយចំនួនដែលមានសិទ្ធគ្រប់គ្រងលើដែនអាណាចក្ររបស់ផងខ្លួន៘
ប្រជាសហគមន៍នេសាទបានរៀបរាប់ឲ្យដឹងថា ទោះបីជារដូវបិទនេសាទក៏ដោយ រដូវបើកនេសាទក៍ដោយនៅតែមានអ្នកនេសាទខុសច្បាប់ព្រោងព្រាតលើផ្ទៃទឹកដែលបានដាក់របាំងណររ៉ាវ ឫហៅថា របាំងឈឹប ដែលមានក្រឡាញឹកដែលនាំឲ្យមហន្តរាយកូនមច្ឆាជាតិគ្រប់ប្រភេទរងនូវការវិនាសហិនហោចផុតពូជ ជាបណ្ដើរៗហើយ។ ប្រភពពីប្រជាសហគមន៍នេសាទ បានបន្តអោយយើងដឹងទៀតថា ការដាក់សាច់ក្រឡាញឹកបាន ព្រោះមានមន្ត្រីគ្គ្រាក់ៗមួយចំនួននៅពីក្រោយវាំងនននៃបទល្មើសនេសាទក្នុងខេត្តតាកែវ ពួកគាត់បានបន្តទៀតថា បើបងប្អូនណាដែលមិនមែនជាបក្សពួកគេទេ សូម្បីតែរកលៀស រកខ្ចៅខ្ចងក៏មិនបានផង។ តាមប្រភពបានខ្សឹបប្រាប់ថា បុរសម្នាក់ឈ្មោះ សុខ ឡេះ ជាអ្នករត់ការបង់សួយសារជូនមន្ត្រីជំនាញពាក់ព័ន្ធក្នុងមូលដ្ឋានទូទាំងខេត្តតាកែវនេះបើយោងតាមប្រភពពីប្រជាពលរដ្ឋ។
ប្រភពបានបន្តទៀតថា បើបណ្ដោយអោយមាន ការដាក់របាំងក្រឡាល្អិតបែបនេះបន្តទៀត ច្បាស់ជារលាយអស់ហើយធនធានជលផល ។
ជាងនេះទៀត មិនមែនត្រឹម តែអាជ្ញាធរដែនដីនោះទេដែលត្រូវលោក សុខ ឡេះ ដើរតួរសម្របសម្រួលដើម្បីមិនឲ្យលេចឮដល់អ្នកដទៃ ក្នុងនោះសូម្បីតែថ្នាក់ដឹកនាំខេត្ត ជាពិសេសស្ថាប័នជំនាញរដ្ឋបាលជលផល,ក៏ដូចជាមន្ទីរកសិកម្ម ក៏មិនឃើញមានចំណាត់ការចំពោះបញ្ហាបទល្មើសនេសាទនៅក្នុងស្រុកបុរីជលសារនេះដែរ។
បទល្មើសនេសាទទាំងនេះសូម្បីតែមន្ត្រីនៅដែនអភិរក្សក៏ទទួលស្គាល់ថា មានកើតនៅខាងក្រោយលំនៅដ្ឋានប្រជាពលរដ្ឋនោះព្រោងព្រាត ដោយមិនមានការបង្ក្រាបពីសមត្ថកិច្ចជំនាញពាក់ព័ន្ធម្ដងណាឡើយ។
ហេតុដូច្នេះទើបប្រជានេសាទរកសុីជាលក្ខណៈគ្រួសារ ស្នើយ៉ាងទទូចដល់ឯកឧត្តម ឌិត ទីណា រដ្ឋមន្ត្រីក្រសួងកសិកម្មរុក្ខាប្រម៉ាញ់និងនេសាទ ឯកឧត្តម ពុំ សុថា ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលជលផលនៃក្រសួងកសិកម្មរុក្ខាប្រមាញ់និងនេសាទ និងលោក សៅ កុសល នាយខណ្ឌរដ្ឋបាលជលផល ខេត្តតាកែវ គួរពិនិត្យស្រាវជ្រាវភាពមិនប្រក្រតីក្នុងបរិបទនៃអំពើពុករលួយបណ្តោយអោយមានបទល្មើសពេញលើផ្ទៃទឹកមិនព្រមបង្ក្រាប។ ប៉ុន្តែបើតាមប្រភពពីមន្ត្រីរាជការនៅខេត្តតាកែវបានខ្សឹបខ្សៀវថា លោក សុខ ឡេះ គឺជាតួឯកដ៏សំខាន់ក្នុងការសម្របសម្រួលដើម្បីឲ្យមានបទល្មើសនេសាទ នៅក្នុងខេត្តតាកែវទាំងមូល។ ករណីនេះមិនថាតែនៅក្នុងស្រុកបុរីជលសារនេះទេ នៅស្រុកផ្សេង ទៀតដូចជា៖កោះអណ្ដែត,អង្គរបុរី…ក៏លោក សុខ ឡេះ ជាអ្នកដើរតួយ៉ាងសំខាន់ក្នុងការក៍សាងបទល្មើសនេសាទនៅក្នុងមូលដ្ឋានខេត្តតាកែវនេះតែម្តង។ ជាងនេះទៅទៀតគឺមិនមែនទើបតែឆ្នាំនេះនោះទេ សូម្បីតែឆ្នាំមុនៗរាប់សិបឆ្នាំមកហើយ គឺក្រោមការគ្រប់គ្រងដឹកនាំ បែងចែកផលប្រយោជន៍ របស់លោក សុខ ឡេះដែល។
គេមិនដឹងថាតើលោក វ៉ី សំណាង អភិបាលខេត្តតាកែវទើបមកកាន់តំណែងជាអភិបាលខេត្តថ្មីនេះ និងលោកឧត្តមសេនីយ៍ទោ ម៉ែន លី ស្នងការដ្ឋាននគរបាលខេត្តតាកែវ រួមនិងលោក ឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ បានដឹងបានជ្រាបរឿងនេះដែរឬយ៉ាងណានោះទេ?៕
– រាល់ការចុះផ្សាយរបស់អង្គភាពសារព័ត៌មានយើង មិនមានបំណងណាមួយធ្វើឱ្យប៉ះពាល់ កិត្តិយស សេចក្តីថ្លៃថ្នូ ដល់បណ្តាសាមុីស្ថាប័នទាំងឡាយណាឬអាជ្ញាធរមូលដ្ឋាននោះទេ យើងចុះផ្សាយក្នុងនៃស្ថាបនា ប្រកបដោយក្រមសីលធម៍វិជ្ជាជីវ:សារព័ត៌មាន គោរពច្បាប់ស្តីពីរបបសារព័ត៌មាន ធម្មនុញ្ញវិជ្ជាជីវ:សារព័ត៌មានតែប៉ុណ្ណោះ។
យើងខ្ញុំរង់ចាំការបកស្រាយបំភ្លឺពីសាមុីពាក់ព័ន្ធរៀរាល់ម៉ោងធ្វើការ ហើយបើសិនជាការចុះផ្សាយរបស់អង្គភាពយើង សាមុីពាក់ព័ន្ធយល់ឃើញថាមិនត្រឹមត្រូវឬខុសឆ្គងក្នងប្រការណាមួយអង្គភាពយើងនិងបកស្រាយបំភ្លឺតាមភស្តុតាងដែលមានជាសក្ខីកម្មស្រាប់៕ សូមអរគុណ
