បន្ទាយមានជ័យ ៖ កាលពីព្រឹកថ្ងៃទី២០ ខែតុលា ឆ្នាំ២០១៥ ប្រតិភូអគ្គនាយកដ្ឋានអន្តោប្រវេសន៍កម្ពុជា ដឹកនាំដោយអគ្គនាយកអន្តោប្រវេសន៍កម្ពុជា ឯកឧត្តម នាយឧត្តមសេនីយ៍សុខ ផល និងភាគីថៃ ដឹកនាំប្រតិភូដោយអគ្គនាយកអន្តោប្រវេសន៍ថៃ ឯកឧត្តម ឧត្តមសេនីយ៍ទោ ណាត់តាថន ប្រាស៊ុនថន បានជួបពិភាក្សាគ្នាបង្កើនសហប្រតិបត្តិការមិត្តភាពរវាងអគ្គ អន្តោប្រវេសន៍កម្ពុជា-ថៃ ឲ្យកាន់តែល្អប្រសើរឡើង និងធ្វើឡើងក្នុងក្របខ័ណ្ឌអាស៊ាននោះផងដែរ។
ក្នុងជំនួបនោះបានធ្វើឡើងនៅលើស្ពានព្រំដែន ប្រចាំច្រកអន្តរជាតិប៉ោយប៉ែត ឈមនិងច្រកខ្លងឡឹក។ កិច្ចជំនួបពិភាក្សារវាងអគ្គនាយកអន្តោប្រវេសន៍នៃប្រទេសទាំង២ នោះដែរក៏ដើម្បីជួបស្គាល់គ្នាបង្កើនភាពស្និតស្នាលរវាងនគរបាល អន្តោប្រវេសន៍កម្ពុជា និងថៃ ក្នុងនាមប្រទេសជិតខាងជាប់របងគ្នា និងធ្វើឡើងគ្រាដែលអគ្គនាយកអន្តោប្រវេសន៍ថៃ ឯកឧត្តម ឧត្តមសេនីយ៍ទោ ណាត់តាថន ប្រាស៊ុនថន ទើបតែមកកាន់តំណែងជាអគ្គនាយកអន្តោប្រវេសន៍ថៃថ្មី នៅក្នុងអំឡុងខែកញ្ញា ឆ្នាំ២០១៥ កន្លងទៅថ្មីៗនេះ។
អគ្គនាយកអន្តោប្រវេសន៍កម្ពុជា ឯកឧត្តម នាយឧត្តមសេនីយ៍សុខ ផល និងអគ្គនាយកអន្តោប្រវេសន៍ថៃ ឯកឧត្តម ឧត្តមសេនីយ៍ទោ ណាត់តាថន ប្រាស៊ុនថន បានប្តេជ្ញា និងសហប្រតិបត្តិការរួមគ្នារវាងភាគីនៃប្រទេសទាំង២កម្ពុជា-ថៃ ទៅលើការងារទប់ស្កាត់ពលករឆ្លងដែនខុសច្បាប់ ការទប់ស្កាត់ និងផ្តល់ព័ត៌មានគ្នាទៅវិញទៅមកលើបញ្ហាភេវរកម្ម និងការទប់ស្កាត់បទល្មើសឆ្លងដែនតាមព្រំដែនខុសច្បាប់គ្រប់ប្រភេទ។
អគ្គនាយកអន្តោប្រវេសន៍កម្ពុជា ឯកឧត្តម នាយឧត្តមសេនីយ៍ សុខ ផល បានមានប្រសាន៍ថា លោកសូមស្នើសុំឲ្យនគរបាលអន្តោប្រវេសន៍ប្រទេសទាំង២ ប្រចាំច្រកនានាត្រូវបង្កើនការយកចិត្តទុកដាក់សហប្រតិបត្តិការគ្នា ទៅវិញទៅមកឲ្យបានល្អ ដើម្បីនាំមកនូវផលប្រយោជន៍រួមគ្នារវាងប្រជាជនប្រទេសទាំង២ និងបន្តខិតខំទប់ស្កាត់រាល់បទល្មើសឆ្លងដែនខុសច្បាប់គ្រប់ ប្រភេទផងដែរ។
តមក ឯកឧត្តម នាយឧត្តមសេនីយ៍ សុខ ផល អគ្គនាយកអន្តោប្រវេសន៍កម្ពុជា ក៏បានចុះត្រួតពិនិត្យកន្លែងការងាររបស់នគរបាលអន្តោប្រវេសន៍កម្ពុជា ប្រចាំច្រកអន្តរជាតិ ហើយឯកឧត្តមនាយឧត្តមសេនីយ៍ ក៏បានផ្តាំផ្ញើដល់នគរបាលអន្តោប្រវេសន៍ប្រចាំច្រកអន្តរជាតិ ត្រូវតែយកចិត្តទុកដាក់ខិតខំបំពេញកិច្ចការងារ និងបម្រើសេវាជូនប្រជាពលរដ្ឋខ្មែរ និងភ្ញៀវបរទេសឲ្យបានល្អកុំឲ្យកើតមាន និងលិចឮនូវអំពើមិនប្រក្រតីមិនល្អណាមួយចំពោះនគរបាលអន្តោប្រវេសន៍ ៕
