ពោធិ៍សាត់៖ នាថ្ងៃទី២៨ ខែឧសភា ឆ្នាំ២០២៦នេះ ក្រសួងការងារ និងបណ្តុះបណ្តាលវិជ្ជាជីវៈ សហការជាមួយរដ្ឋបាលខេត្តពោធិ៍សាត់ បានរៀបចំយុទ្ធនាការ «ខ្មែរជួយរកការងារ និងផ្តល់ការងារឱ្យខ្មែរ» សម្រាប់វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ យ៉ាងកុះករនៅបរិវេណសាលាក្រុងពោធិ៍សាត់។
ពិធីដ៏មានសារៈសំខាន់នេះ ត្រូវបានផ្តល់កិត្តិយសបើកយុទ្ធនាការដោយ លោក ឡេង សែ រដ្ឋលេខាធិការ តំណាងលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងមានការចូលរួមពី លោក រុន សារី អភិបាលរងខេត្ត តំណាង លោក ខូយ រីដា អភិបាលនៃគណៈអភិបាលខេត្តពោធិ៍សាត់ ព្រមទាំងលោកប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត លោកអភិបាលក្រុង ថ្នាក់ដឹកនាំ មន្ត្រីរាជការ តំណាងក្រុមហ៊ុន សហគ្រាស និងបងប្អូនប្រជាពលរដ្ឋ សិស្សានុសិស្សយ៉ាងច្រើនកុះករ។
នៅក្នុងឱកាសនោះ លោក ឡេង សែ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានពាំនាំនូវការសាកសួរសុខទុក្ខពីសំណាក់ លោករដ្ឋមន្ត្រី ហេង សួរ និងបានធ្វើការអំពាវនាវយ៉ាងទទូច ដល់បងប្អូនប្រជាពលរដ្ឋ និងយុវជនទាំងអស់ ឱ្យងាកមកចាប់អារម្មណ៍ និងជ្រើសរើសការធ្វើការងារនៅក្នុងស្រុក នៅនឹងកន្លែង ឬនៅក្បែរផ្ទះរបស់ខ្លួនវិញ។
លោកបានគូសបញ្ជាក់ថា ការធ្វើការងារក្នុងស្រុកមិនត្រឹមតែជួយឱ្យយើងបានរស់នៅជួបជុំក្រុមគ្រួសារ មើលថែទាំឪពុកម្តាយ និងកូនចៅប៉ុណ្ណោះទេ ប៉ុន្តែថែមទាំងទទួលបានការគាំពារផ្នែកច្បាប់ និងអត្ថប្រយោជន៍ផ្សេងៗយ៉ាងពេញលេញទៀតផង។
លោករដ្ឋលេខាធិការ បានដាស់តឿនដល់បងប្អូនប្រជាពលរដ្ឋ ឱ្យជៀសវាងការចំណាកស្រុក ទៅធ្វើការងារនៅក្រៅប្រទេស ជាពិសេសនៅក្នុងប្រទេសថៃ ដែលកន្លងមកពលករកម្ពុជាមួយចំនួន តែងតែរងនូវការមើលងាយមើលថោក រើសអើង រំលោភសិទ្ធិការងារ និងប្រឈមនឹងហានិភ័យខ្ពស់ផ្នែកសុវត្ថិភាព។ បច្ចុប្បន្នប្រទេសយើងមានការអភិវឌ្ឍ មានរោងចក្រ សហគ្រាស និងឱកាសការងារជាច្រើន ដូចនេះយើងមិនត្រូវទៅលះបង់សេចក្តីថ្លៃថ្នូរ និងសុវត្ថិភាពនៅស្រុកគេនោះទេ។
លោក ឡេង សែ បានពន្យល់ណែនាំដល់បងប្អូនកម្មករនិយោជិត និងប្រជាពលរដ្ឋ ឱ្យយល់ដឹងកាន់តែច្បាស់អំពីអត្ថប្រយោជន៍ នៃបេឡាជាតិសន្តិសុខសង្គម (ប.ស.ស.) ដែលជាខ្នងបង្អែកដ៏រឹងមាំ ក្នុងការគាំពារសុខភាព និងស្ថិរភាពជីវភាពនៅពេលធ្វើការក្នុងស្រុក។
លោកបានជំរុញឱ្យយុវជនចាប់យកឱកាសក្នុងការទទួលការបណ្តុះបណ្តាលជំនាញ វិជ្ជាជីវៈ និងបច្គេកទេស ដើម្បីឆ្លើយតបទៅនឹងតម្រូវការទីផ្សារការងារនាពេលបច្ចុប្បន្ន និងទៅអនាគត សំដៅបង្កើនប្រាក់ចំណូល និងលើកកម្ពស់កម្រិតជីវភាពគ្រួសារ។
គួរជម្រាបជូនថា វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ ពេញមួយថ្ងៃនេះ បានទាក់ទាញការចាប់អារម្មណ៍យ៉ាងខ្លាំងពីសំណាក់យុវជន និងអ្នកស្វែងរកការងារធ្វើ ក្នុងក្រុងពោធិ៍សាត់ ដោយទទួលបានលទ្ធផល អ្នកចូលរួមសរុប ៧៨៥នាក់ ក្នុងនោះនារី៤១២នាក់ និងអ្នកជាប់សម្ភាសន៍បឋម ចំនួន១៣១នាក់ ក្នុងនោះនារី៩៦នាក់។ ចំនួនស្ត្រីដែលបានចូលរួម និងជាប់ការសម្ភាសន៍បឋមមានអត្រាខ្ពស់ (ជិត ៧៣% នៃអ្នកជាប់បឋមសរុប) ដែលនេះបង្ហាញពីការចូលរួមយ៉ាងសកម្មរបស់ស្ត្រីក្នុងកម្លាំងពលកម្ម និងសេដ្ឋកិច្ចក្នុងស្រុក។
សម្រាប់ថ្ងៃទី២៨ ខែឧសភា ឆ្នាំ២០២៦នេះ វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ នឹងត្រូវបន្តរៀបចំនៅបរិវេណសាលាស្រុកភ្នំក្រវាញ ដូច្នេះសូមបងប្អូនប្រជាពលរដ្ឋ យុវជន និងសិស្សានុសិស្ស នៅក្នុងស្រុកភ្នំក្រវាញទាំងអស់ អញ្ជើញចូលរួមកម្មវិធីនេះឱ្យបានកុះករ ចាប់ពីម៉ោង ៨:០០ព្រឹកតទៅ ដោយកុំភ្លេចភ្ជាប់មកជាមួយនូវប្រវត្តិរូបសង្ខេប ឬអត្តសញ្ញាណប័ណ្ណ សំរាប់ការចុះឈ្មោះ និងសម្ភាសន៍ការងារភ្លាមៗ។
ចំពោះវេទិកាការងារខេត្តពោធិ៍សាត់ សម្រាប់ថ្ងៃទី២៨-២៩ ខែឧសភា ឆ្នាំ២០២៦ តម្រូវការកម្លាំងពលកម្ម សរុប១២,៧៣២នាក់ មានក្រុមហ៊ុន រោងចក្រ សិប្បកម្ម និងគ្រឹះស្ថានមីក្រូហិរញ្ញវត្ថុ ចំនួន៧ រួមទាំងតំបន់សេដ្ឋកិច្ចពិសេសចំនួន២ និងក្រុមហ៊ុនជ្រើសរើសពលករទៅក្រៅប្រទេសចំនួន១៕
