រយៈពេល២ឆ្នាំ គិតចាប់ពីខែធ្នូ ឆ្នាំ២០២៣ រហូតដល់ខែធ្នូ ឆ្នាំ២០២៤ បុគ្គលិកការិយាល័យច្រកចេញចូលតែមួយនៃរដ្ឋបាលក្រុងសំពៅពូន បានផ្តល់សេវាជូនប្រជាពលរដ្ឋសរុបចំនួន ១៨.២៣០នាក់ ទទួលបានចំណូលសរុប ៨៥.៣០៣.០០០រៀល គិតជាដុល្លារ ២១.៣២៥,៧៥ដុល្លារអាមេរិក។ នេះបើតាមរបាយការណ៍ចំណូលថវិកាប្រចាំឆ្នាំ២០២៤ របស់រដ្ឋបាលក្រុងសំពៅពូន។
ផ្អែកតាមរបាយការណ៍ដដែល រយៈពេល២ឆ្នាំ កន្លងទៅនេះ រដ្ឋបាលក្រុងសំពៅពូនបានផ្តល់សេវាជូនប្រជាពលរដ្ឋទៅលើវិស័យ រួមមាន ការងាររដ្ឋបាល អត្រានុកូលដ្ឋាន នីត្យានុកូលកម្ម វប្បធម៌ និងវិចិត្រសិល្បៈ អប់រំ យុវជន និងកីឡា ទេសចរណ៍ សំណង់ ការផ្ទេរសិទ្ធិកាន់កាប់អចលទ្រព្យពុំទាន់ចុះបញ្ជី ឧស្សាហកម្ម និងសិប្បកម្ម ពាណិជ្ជកម្ម សុខាភិបាល កសិកម្ម រ៉ែ និងថាមពល សាធារណការ និងដឹកជញ្ជូន និងវិស័យផ្សេងៗទៀត។
បើតាមរបាយការណ៍ខាងលើ វិស័យការងារ និងចំណូល ដែលរដ្ឋបាលក្រុងសំពៅពូន បានផ្តល់ឱ្យច្រើនជាងគេ គឺការងារអត្រានុកូលដ្ឋាន ដែលអ្នកមកទទួលសេវា១០.៦៤៩នាក់ ពុំយកកម្រៃសេវា និងនីត្យានុកូលកម្ម អ្នកមកទទួលសេវា៧.៣២៩នាក់ ទទួលបានចំណូល៧៤៣.០០០រៀល វិស័យទេសចរណ៍ អ្នកមកទទួលសេវា ៨៨នាក់ ទទួលបានចំណូល ២២.៤៧០.០០០រៀល វិស័យវប្បធម៌ និងវិចិត្រសិល្បៈ អ្នកមកទទួលសេវា ៦០នាក់ ទទួលបានចំណូល ៣.៨៧០.០០០រៀល និងការផ្ទេរសិទ្ធិកាន់កាប់អចលទ្រព្យពុំទាន់ចុះបញ្ជី អ្នកមកទទួលសេវា ៤៨នាក់ ទទួលបានចំណូល៤៣.៨០០.០០០រៀល។
បន្ទាប់មកវិស័យសុខាភិបាល អ្នកមកទទួលសេវា ២១នាក់ ទទួលបានចំណូល ៣.៤០០.០០០រៀល សំណង់អ្នកមកទទួលសេវា១១នាក់ ទទួលបានចំណូល ៧.០៤០.០០០រៀល។ ក្នុងនោះវិស័យដែលមានអ្នកមកទទួលសេវាតិចជាងគេមានការផ្តល់អាជ្ញាប័ណ្ណ អ្នកមកទទួលសេវា៧នាក់ ចំណូល៧០០.០០០រៀល ការចុះបញ្ជីអាជ្ញាប័ណ្ណ អ្នកមកទទួលសេវា៧នាក់ ចំណូល៣៥០.០០០រៀល និងសេវាពិនិត្យ និងរៀបចំឯកសារ អ្នកមកទទួលសេវា៥នាក់ ចំណូលបាន វិស័យរ៉ែ និងថាមពល អ្នកមកទទួលសេវាចំនួន ២នាក់ ទទួលបានចំណូល២០០.០០០រៀល វិស័យអប់រំ យុវជន និងកីឡា អ្នកមកទទួលសេវា ២នាក់ ទទួលបានចំណូល១.៨៣០.០០០រៀល។ ទន្ទឹមនឹងនោះវិស័យដែលពុំមានអ្នកមកទទួលសេវារួមមាន ការងាររដ្ឋបាល ឧស្សាហ៍កម្ម កសិកម្ម និងសាធារណការ និងដឹកជញ្ជូន។
សូមបញ្ជាក់ថា រាជរដ្ឋាភិបាលបានចេញអនុក្រឹត្យបង្កើតក្រុងសំពៅពូន ចំណុះក្នុងរដ្ឋបាលខេត្តកណ្តាល កាលពីថ្ងៃទី២៣ ខែធ្នូ ឆ្នាំ២០២២ កន្លងទៅ។ ក្រុងនេះ មានសង្កាត់ចំនួន៥ រួមមាន សង្កាត់ឈើខ្មៅ សង្កាត់ព្រែកជ្រៃ សង្កាត់ព្រែកស្តី សង្កាត់ជ្រោយតាកែវ និងសង្កាត់សំពៅពូន ដែលបានកាត់ចេញពីស្រុកកោះធំ នៃខេត្តកណ្ដាល៕
កញ្ញា សេង សុខហ៊ុន មន្ត្រីព័ត៌មានក្រុមអ្នកនាំពាក្យក្រសួងមហាផ្ទៃ
