ខេត្តប៉ៃលិន ៖ បុរសម្នាក់ ត្រូវនគរបាលចាប់ឃាត់ខ្លួននៅក្នុងកាស៊ីណូមួយកន្លែងជាប់ព្រំដែន កម្ពុជាថៃ ខណ:លួចរថយន្តហាយឡែនឌ័រ ដែលម្ចាស់ចតទុកនៅមុខផ្ទះ រួចយកទៅលាក់ទុកនៅក្នុងផ្ទះមួយកន្លែង ហើយទៅសម្ងំលេងល្បែងក្នុងកាស៊ីណូ ក៏ត្រូវចាប់ឃាត់ខ្លួនតែម្តង ។
ហេតុការណ៍ចាប់ឃាត់ខ្លួនជនសង្ស័យលួចរថយន្តនេះ បានកើតឡើង កាលពីវេលាម៉ោង៦ និង៣០នាទីល្ងាច ថ្ងៃទី១៤ ខែសីហា ឆ្នាំ២០១៨ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលា ក្រៅ ។
ប្រភពព័ត៌មានបានឱ្យដឹងថា បន្ទាប់ពីកម្លាំងប៉ុស្តិ៍នគរបាលរដ្ឋបាលស្ទឹកាច់ បានទទួលពាក្យបណ្តឹងពីជនរងគ្រោះម្នាក់ ឈ្មោះ សេង សំណាង ភេទស្រី អាយុ៤៩ឆ្នាំ ជាមេផ្ទះ រស់នៅឯរាជធានីភ្នំពេញ ដោយគាត់បានបាត់រថយន្តមួយគ្រឿង ម៉ាកឡាយឡែនឌ័រ (HIGH LANDER) ពណ៌ទឹកប្រាក់ ពាក់ស្លាកលេខ ភ្នំពេញ 2AV- 2138 កាលពីថ្ងៃទី០៨ ខែសីហា ឆ្នាំ២០១៨ ខណ:ចតទុកនៅមុខផ្ទះនាពេលយប់ ។
ប្រភពបន្តទៀតថា ដោយសារតែរថយន្តខាងលើ មានបំពាក់ប្រព័ន្ធGPS កម្លាំងជំនាញ នៃអធិការដ្នាននគរបាលស្រុកសាលាក្រៅ បានសហការជាមួយកម្លាំងប៉ុស្តិ៍នគរបាលរដ្ឋបាលស្ទឹងកាច់ ស្វែងរកឃើញរថយន្តឃើញនៅចំណុចផ្ទះរបស់ឈ្មោះ ឈាវ រដ្ឋា ភេទប្រុស ស្ថិតនៅក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ និងឈានទៅដល់ធ្វើការឃាត់ខ្លួនជនសង្ស័យម្នាក់ ឈ្មោះ តាន់ វណ្ណថនា ភេទប្រុស អាយុ ៤១ឆ្នាំ មុខរបរ និងទីលំនៅមិនពិតប្រាកដ នៅចំណុចក្នុងកាស៊ីណូ ជី.អិម (G.M)តែម្តង ។
ពាក់ព័ន្ធនឹងបញ្ហានេះ បច្ចុប្បន្នជនសង្ស័យខាងលើ រួមទាំងវត្ថុតាង ត្រូវបាននគរបាលនាំយកទៅអធិការដ្ឋាននគរបាលស្រុកសាលាក្រៅ ដើម្បីចាត់ការទៅតាមនីតិវិធីច្បាប់ ៕ ដោយ ៖ នីយ៉ា
