(កំពត)៖ រថយន្តពីរគ្រឿងដែលបើកបរស្របគ្នាខណៈមេឃកំពុងធ្លាក់ភ្លៀងខ្លាំង ស្រាប់តែរថយន្តខាងមុខបត់ស្តាំមិនប្រយ័ត្ន ក៏ត្រូវរថយន្តរថយន្តខ្នាតធំប្រភេទបែនដឹកដីបុកពីក្រោយបណ្តាលឲ្យវិលក្បាលត្រឡប់ក្រោយ ហើយផ្អៀងពាក់ពីលើគ្នានៅលើទ្រូងផ្លូវបង្កការភ្ញាក់ផ្អើលដល់អ្នកដំណើរភ័យស្លន់ស្លោស្ទើព្រលឹងចុងសក់។
ហេតុការណ៍គ្រោះថ្នាក់នេះបានកើតឡើងនៅវេលាម៉ោង១០និង២០នាទីព្រឹក ថ្ងៃទី១៨ខែកក្កដា ឆ្នាំ២០១៨ ត្រង់ចំណុចភូមិព្រៃកែស ឃុំត្រពាំងសង្កែ ស្រុកទឹកឈូ ខេត្តកំពត លើកំណាត់ផ្លូវជាតិលេខ៣៣ កំពត-កែប។
តាមប្រភពព័ត៌មាននៅកន្លែងកើតហេតុបាននិយាយថា មុនពេលជួបហេតុការណ៍ដ៏អាក្រក់នេះ គេឃើញរថយន្តម៉ាកហីុយ៉ាន់ដាយពណ៌សផ្ទុកដោយទំនិញចាប់ហួយមានឃ្លុបបិទជិតបើកបរមកពីលិចទៅកើតហើយបានឈប់ចតដាក់ទំនិញចាប់ហួយឲ្យម៉ូយ នៅចំណុចតូបក្បែរចិញ្ចមផ្លូវ លុះបន្តិចក្រោយមករថយន្តដឹកទំនិញខាងលើ ក៏បើកសន្សឹមៗឡើងខាងស្តាំវិញបំណងឆ្ពោះទៅខាងកើត លុះបត់បានបន្តិច ស្រាប់តែមានរថយន្តដឹកដីបោះពួយមកពីក្រោយ ហើយគេចមិនទាន់ទើបជ្រុលទៅបុកចំទ្រុងរថយន្តដឹកទំនិញផ្នែកចំហៀងខាងស្តាំពេញទំហឹងបណ្តាលឲ្យរថយន្តផ្ទុកទំនិញចាប់ហួយនោះបត់ក្បាលត្រឡប់ក្រោយ ហើយគៀបជាប់គ្នាផ្អៀងចង់ក្រឡាប់ទៅហើយ តែបានតែកុងរថយន្តដឹកដីជាន់ហ្វ្រាំងជាប់ភ្លាមៗផងដែរ។
ទាក់ទិននឹងគ្រោះថ្នាក់ខាងលើ ប៉ូលិសចរាចរណ៍ស្រុកទឹកឈូបានឲ្យដឹងថា នេះជាហេតុការណ៍កើតឡើងដោយសារតែភាគីម្ចាស់រថយន្តទាំងសងខាងខ្វះការប្រុងប្រយ័ត្ន ដោយខណៈនោះមេឃកំពុងភ្លៀងធ្លាក់ខ្លាំងផងធ្វើឲ្យអ្នកបើកបររថយន្តទាំងពីរគ្រឿងមើលផ្លូវមិនសូវច្បាស់ទើបងាយប្រឈមនឹងគ្រោះថ្នាក់កើតឡើងបែបនេះ ហើយនេះក៏ចាត់ទុកជាសំណាងមួយទៅចុះ ព្រោះមិនបានបណ្តាលឲ្យមានអ្នកណារងគ្រោះធ្ងន់ធ្ងរនោះទេ ដោយគ្រាន់តែខូចខាតរថយន្តរៀងៗខ្លួនប៉ុណ្ណោះ។ប៉ូលិសបានបញ្ជាក់ទៀតថា រថយន្តដឹកទំនិញម៉ាកហីុយ៉ាន់ដាយ ពណ៌សពាក់ស្លាកលេខ កំពត 3A-0819 បើកបរដោយឈ្មោះ ទឹង តាល់ ភេទប្រុស អាយុ២៨ឆ្នាំ មានទីលំនៅភូមិបុស្សត្របែក ឃុំត្រពាំងព្រីង ស្រុកទឹកឈូ ខេត្តកំពត។ចំណែករថយន្តដឹកដីខ្នាតធំ ពាក់ស្លាកលេខ ភ្នំពេញ 3B-5508 អ្នកបើកបរឈ្មោះ ឈាន រី ភេទប្រុស អាយុ២៥ឆ្នាំ រស់នៅភូមិមានរិទ្ធិ ឃុំកណ្តោល ស្រុកទឹកឈូ ខេត្តកំពត។
បច្ចុប្បន្នភាគីម្ចាស់រថយន្តទាំងសងខាង កំពុងធ្វើការដោះស្រាយគ្នានៅកន្លែងកើតហេតុតែម្តង ដើម្បីយករថយន្តទៅធ្វើការជួសជុលវិញរៀងៗខ្លួន ដោយមិនរំខានដល់សមត្ថកិច្ចឡើយ៕ សេង ណារិទ្ធ
