កំពត ៖ ខេត្តកំពតបានសាងប្រវត្តិសាស្ត្រថ្មីរបស់ខ្លួន ដោយការរៀបចំកំពតសង្ក្រាន្តឆ្នាំ២០១៨ ផ្តល់ភាពសប្បាយរីករាយដល់ ប្រជាពលរដ្ឋ ភ្ញៀវទេសចរជាតិនិងអន្តរជាតិយ៉ាងច្រើនកុះករ កាលពីថ្ងៃទី១៤រហូតដល់ថ្ងៃទី១៦ខែមេសា ឆ្នាំ២០១៨ បើទោះជាការត្រៀមលក្ខណៈរៀបចំពិធីកំពតសង្ក្រាន្តមានពេលខ្លីក៏ដោយ។ចំពោះការធ្វើពិធីដ៏អធិកអធមនេះ លោកអភិបាលខេត្តកំពតលើកឡើងថា នឹងប្រារព្វពិធីកំពតសង្ក្រាន្តឱ្យបានកាន់តែធំ កាន់តែល្អប្រសើរនាឆ្នាំក្រោយទៀត ពិសេសលោកនឹងរៀបចំឱ្យមានឆ្នេរងូតទឹកកម្សាន្តដូចនៅខេត្តព្រះសីហនុ ប្រសិនបើសម្តេចអគ្គសេនាបតីតេជោហ៊ុន សែន នៅធ្វើជានាយករដ្ឋមន្ត្រី នៃព្រះរាជាណាចក្រកម្ពុជា ។
ក្រោយពីលោក ជាយ តាយ អភិបាលនៃគណៈអភិបាលខេត្តកំពត បានកាត់ខ្សែបូរ បើកដំណើរការកំពតសង្ក្រាន្ត ឆ្នាំ២០១៨ ក្រោមប្រធានបទ «ខ្ញុំស្រលាញ់កំពត» កាលពីថ្ងៃទី ១៤ ខែមេសានោះ ប្រជាពលរដ្ឋ ពិសេសយុវជនយុវនារី និងភ្ញៀវទេសចរជាតិ និងអន្តរជាតិ មានការចាប់អារម្មណ៍យ៉ាងខ្លាំង ចំពោះខេត្តកំពតដែលបានបង្ហាញអំពីសក្តានុពលរបស់ខ្លួន តាមរយៈការរៀបចំពិធីកំពតសង្ក្រាន្ត ដោយមានការដាក់តាំងបង្ហាញផលិតផលឧស្សាហកម្មផ្សេងៗ ផលិតផលប្រើប្រាស់ប្រចាំថ្ងៃ ផលិតផលកសិផល និងការតាំងនិងលក់ម្ហូបអាហាររបស់ខេត្ត ដែលអាចផលិត និងធ្វើបានជាច្រើនប្រភេទសម្រាប់ទទួលភ្ញៀវទេសចរទៅកម្សាន្តផងដែរ។ ក្រៅពីបង្ហាញអំពីសក្តានុពលខេត្ត កំពតសង្ក្រាន្តបានបង្កភាពសប្បាយរីករាយយ៉ាងច្រើនដល់ភ្ញៀវទេសចរ ដូចជាការរៀបចំកន្លែងលែងល្បែងប្រជាប្រិយផ្សេងៗ (បោះអង្គុញទាញព្រ័ត្រ លាក់កន្សែង វាយក្អម) និងមានរៀបចំក្រុមតន្ត្រីជាច្រើនវង់សម្រាប់រាំលេងកម្សាន្តចាប់ពីពេលរសៀលរហូតដល់ល្ងាច។
ជាមួយនេះ លោកសយ ស៊ីណុល ប្រធានមន្ទីរទេសចរណ៍ខេត្តកំពត បានប្រាប់ឲ្យដឹងថា នេះជាលើកទី១ដែលខេត្តកំពតបានរៀបចំកំពតសង្ក្រាន្ត ហើយកម្មវិធីនេះល្អណាស់សម្រាប់ខេត្តទេសចរណ៍ ហើយភ្ញៀវទេសចរអាចកើនឡើងកាន់តែច្រើន។ លោកបានបន្តថាសម្រាប់ថ្ងៃទី១៤ ខែមេសាម្សិលមិញ ភ្ញៀវទេសចរជាតិនិងអន្តរជាតិ បានមកទស្សនា កំពតសង្ក្រាន្ត ជាង២ម៉ឺននាក់ និងទៅទស្សនាតាមគោលដៅទេសចរណ៍ក្នុងខេត្តចំនួនជាង២ម៉ឺននាក់ដែរ។
លោកបានបញ្ជាក់ថា នៅពេលដែលមានកំពតសង្ក្រាន្ត ភ្ញៀវទេសចរពេលថ្ងៃទៅកម្សាន្តសប្បាយ តាមរមណីដ្ឋាននានា ហើយពេលយប់បន្តសប្បាយជាមួយនឹងកំពតសង្រាន្តដែលរដ្ឋបាលខេត្តបានកំពុងរៀបចំនៅចំណុចមាត់ព្រែកកំពង់បាយ មុខសាលាខេត្តកំពត។ លោកសង្ឃឹមថ្ងៃនេះ និងថ្ងៃស្អែក ភ្ញៀវទេសចរនឹងមកច្រើនជាងថ្ងៃទី១ ព្រោះលោកថា ពលរដ្ឋ និងភ្ញៀវទេសចរណ៍មិនបានដឹងថាកំពតរៀបចំកម្មវិធីនេះឡើយ។
លោក ជាវ តាយ អភិបាលនៃគណៈអភិបាលខេត្តកំពត បានមានប្រសាសន៍ប្រាប់ឲ្យដឹងថា ផ្អែកតាមអនុសាសន៍ណែនាំដ៏ខ្ពង់ខ្ពស់របស់ប្រមុខរាជរដ្ឋាភិបាល ជំរុញឲ្យខេត្តទាំងអស់ធ្វើសង្ក្រាន្តឆ្នាំថ្មី ដើម្បីផ្តល់ភាពសប្បាយរីករាយ ទាក់ទាញភ្ញៀវទេសចរ និងបង្ហាញអំពីសក្តានុពល និងការរីកចម្រើនរបស់ខេត្តនិមួយៗរបស់កម្ពុជា ទើបរដ្ឋបាលខេត្តកំពតខិតខំប្រឹងប្រែងរៀបចំកម្មវិធីនេះឱ្យកើតមានឡើង បើទោះជាការត្រៀមរៀបចំមានរយៈពេលខ្លីត្រឹមតែមួយខែក៏ដោយ។ លោកបានបន្តថា កំពតសង្ក្រាន្តឆ្នាំនេះនៅមិនទាន់មានលក្ខណៈគ្រប់ជ្រុងជ្រោយនៅឡើយទេ ដោយសាររយៈពេលរៀបចំខ្លីពេក ប៉ុន្តែឆ្នាំក្រោយៗតទៅទៀត ខេត្តនឹងរៀបចំពិធីកំពតសង្ក្រាន្តឱ្យកាន់តែល្អប្រសើរ ទាំងកម្មវិធី និងការកែលម្អក្រុង ស្រុកផងដែរ។
លោកបានបញ្ជាក់ថា ប្រសិនបើសម្តេចអគ្គសេនាបតីតេជោហ៊ុន សែន នៅតែធ្វើជានាយករដ្ឋមន្ត្រី ដឹកនាំប្រទេសតទៅទៀត កំពតសង្ក្រាន្តនឹងប្រារព្វធ្វើរាល់ឆ្នាំ ឱ្យកាន់តែធំ កាន់តែសប្បាយ កាន់តែល្អប្រសើរជាងនេះ ពិសេសខេត្តនឹងរៀបចំឱ្យមានតំបន់រមណីយដ្ឋានល្អៗ និងមានតំបន់ឆ្នេរអាចងូតទឹកលែងដូចខេត្តព្រះស៊ីហនុ ហើយថាលោកបាននិងកំពុងសិក្សាជ្រើសរើសយកទីតាំងណានៃខេត្តដែលអាចមានលទ្ធភាពងាយស្រួលក្នុងការបង្កើតឆ្នេរ ហើយងាយស្រួលទៅកម្សាន្ត។
សូមបញ្ជាក់ដែរថា សម្រាប់ពិធីកំពតសង្ក្រាន្តរយៈពេលបីថ្ងៃនេះ ស្ថានភាពសន្តិសុខ សណ្តាប់ធ្នាប់ទូទាំងខេត្តមានភាពល្អប្រសើរគ្មានអំពើចោរកម្មកើតឡើយនោះទេ ចំណែកការកកស្ទះចរាចរណ៍ក៏គ្មានដូចមុនដែរ ព្រោះរដ្ឋបាលខេត្តនិងកម្លាំងសមត្ថកិច្ចបានរៀបចំកន្លែងចំណតជាច្រើន និងបានធ្វើចរាចរបញ្ជៀសការកកស្ទះជាច្រើនកន្លែងទាំងពេលថ្ងៃនិងពេលយប់ នេះបើតាមការបញ្ជាក់របស់លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត៕ សេង ណារិទ្ធ
