(កំពត)៖ នៅព្រឹកថ្ងៃព្រហស្បត៍១២រោចខែចេត្រ ឆ្នាំរកា នព្វស័ក ព.ស ២៥៦១ត្រូវនឹងថ្ងៃ ទី១២ខែមេសា ឆ្នាំ២០១៨ រដ្ឋបាលខេត្តកំពតបានធ្វើពិធីប្រកាស ចូលកាន់មុខតំណែងអភិបាលរងនៃគណៈអភិបាលខេត្តកំពត ក្រោមអធិបតីភាព លោក សក់ សេដ្ឋា រដ្ឋលេខាធិការក្រសួងមហាផ្ទៃតំណាងដ៏ខ្ពង់ខ្ពស់សម្ដេចក្រឡាហោម ស ខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
បន្ទាប់ពី លោក ជាវ តាយ អភិបាលនៃគណៈអភិបាល ខេត្ត បានធ្វើរបាយការណ៍ ឱ្យដឹងអំពី វឌ្ឍនភាពរីកចម្រើនលើកក្តានុពលគ្រប់ផ្នែក ពិសេសសក្តានុពលសេដ្ឋកិច្ច និងទេសចរណ៍ ដែលជាវិស័យអទិភាពមួយយ៉ាងសំខាន់របស់ខេត្តកំពតទាំងមូល។
យោងតាមអនុក្រឹត្យរបស់រាជរដ្ឋាភិបាលត្រូវបានប្រកាសតែងតាំង លោក ប៉ឹល កុសលឋានន្តរស័ក្តិឧត្តមមន្ត្រី ថ្នាក់លេខ៤ ឱ្យកាន់មុខតំណែងជាអភិបាលរង នៃគណៈអភិបាលខេត្តកំពត។
មានប្រសាសន៍សំណេះសំណាល លោក សក់ សេដ្ឋា បានកោតសរសើរនិងវាយតម្លៃខ្ពស់ ចំពោះសមិទ្ធិផលនៃកិច្ចខិតខំប្រឹងប្រែង របស់អាជ្ញាធរខេត្ត មន្ត្រីរាជការគ្រប់លំដាប់ថ្នាក់កងកម្លាំងប្រដាប់អាវុធ និងប្រជាពលរដ្ឋទូទាំងខេត្តកំពតទាំងមូលដែលតែងបានរួមសាមគ្គីសហការគ្នា ក្នុងការអភិវឌ្ឍន៍មូលដ្ឋាននិងបម្រើសេវាសាធាណៈទាំងសេវាសំណូមពរនិងសេវាតម្រូវការជូនប្រជាពលរដ្ឋបានយ៉ាងល្អប្រសើរ ដែលគួរឱ្យមោទនៈ ពិសេសបានចូលរួមថែរក្សា សន្តិសុខសណ្ដាប់ធ្នាប់សង្គម ការជួយសង្គ្រោះប្រជាពលរដ្ឋពីគ្រោះធម្មជាតិនានា ដែលជាការរួមចំណែក យ៉ាងសំខាន់នៅក្នុងកិច្ចអភិវឌ្ឍន៍សង្គមជាតិនិងការកាត់បន្ថយភាពក្រីក្រជូនប្រជាពលរដ្ឋ។
លោក សក់ សេដ្ឋា ក៏បានថ្លែងបញ្ជាក់់ទៀតថា៖ ការតែងតាំង ការផ្លាស់ប្ដូរការផ្ទេរមុខតំណែង គឺជាដំណើរការធម្មតា នៃនីតិវិធីស្របទៅតាមសហលក្ខន្តិកៈមន្ត្រីរាជការស៉ីវិលក្នុងមុខងារសាធារណៈរបស់ក្រសួង ស្ថាប័ននីមួយៗ នៃរាជរដ្ឋាភិបាលកម្ពុជា។ គឺសំដៅធ្វើយ៉ាងណា ដើម្បីឆ្លើយតបទៅនឹងតម្រូវការចាំបាច់ ក្នុងការបម្រើសេវាសាធាណៈជូនប្រជាពលរដ្ឋឱ្យបានកាន់តែមានប្រសិទ្ធភាពនិងបានប្រសើរឡើងថែមទៀត។ ដូចនេះអាជ្ញាធរខេត្ត មន្ត្រីរាជការគ្រប់លំដាប់ថ្នាក់កងកម្លាំងប្រដាប់អាវុធទាំងអស់ ពិសេស លោក ប៉ឹល កុសល់ ដែលទើបតែបានទទួលចូលកាន់មុខតំណែងអភិបាលរងខេត្ត នាពេលនេះ ត្រូវខិតខំរួមសហការសាមគ្គីគ្នាដើម្បីធ្វើការអភិវឌ្ឍន៍ និងបម្រើសេវាសាធារណៈជូនប្រជាពលរដ្ឋក្នុងខេត្តឱ្យបានកាន់តែរីកចម្រើននិងប្រសើរឡើងបន្ថែមទៀត។ ហើយត្រូវបន្តរួមគ្នាថែរក្សាសុខសន្តិភាព ស្ថិរភាពនយោបាយនិង សណ្ដាប់ធ្នាប់សង្គមពិសេសក្នុងខេត្តកំពតទាំងមូល សំដៅធានាបាននូវកំណើនសេដ្ឋកិច្ច តាមរយៈផលិតកម្មលើគ្រប់ផ្នែកគ្រប់វិស័យដើម្បីលើកកម្ពស់ជីវភាពរស់នៅរបស់ប្រជាជនឱ្យបានកាន់តែប្រសើរឡើង៕
សេង ណារិទ្ធ
