(ភ្នំពេញ)៖ នៅល្ងាចថ្ងៃទី០២ ខែកញ្ញា ឆ្នាំ២០២៣នេះ លោកឧត្តមសេនីយ៍ទោ ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឲ្យបញ្ចេញកម្លាំងអន្ដរាគមន៍ពិសេស ដើម្បីចេញល្បាតក្នុងភូមិសាស្ដ្ររាជធានីភ្នំពេញ ដោយប្ដូរវេន២៤ម៉ោង លើ២៤ម៉ោង។
ថ្លែងប្រាប់បណ្ដាញព័ត៌មានដ៏ល្បីឈ្មោះក្នុងស្រុក លោកឧត្តមសេនីយ៍ទោ ជួន ណារិន្ទ បានអះអាងថា ការបញ្ចេញកម្លាំងអន្ដរាគមន៍ពិសេសនេះ គឺដើម្បីបង្ការ ទប់ស្កាត់ និងបង្ក្រាបបទល្មើសនានាដែលអាចកើតមានឡើង និងធ្វើយ៉ាងណាឲ្យប្រជាពលរដ្ឋរស់នៅ និងប្រកបមុខរបរផ្សេងៗ ដោយគ្មានការភ័យខ្លាច។
ឆ្លើយតបនឹងស្ថានការណ៍ដែលតែងកើតមានឡើងប៉ុន្មានថ្ងៃចុងក្រោយ ពាក់ព័ន្ធក្រុមក្មេងទំនើងដែលអុកឡុកក្នុងសង្គម លោកឧត្តមសេនីយ៍ទោ ជួន ណារិន្ទ បានបញ្ជាក់អំពីវិធានការក្ដៅយ៉ាងម៉ឺងម៉ាត់បំផុត និងស្រាវជ្រាវបង្ក្រាបជាបន្ដបន្ទាប់ ដោយមិនបណ្ដោយឲ្យក្មេងទំនើងទាំងអស់នោះ បង្កការភ័យខ្លាចដល់ប្រជាពលរដ្ឋទៀតនោះឡើយ។
លោកបានបន្ថែមថា ស្នងការដ្ឋាននគរបាលរាជធានីភ្នំពេញ នឹងប្រើប្រាស់វិធានការជំនាញផ្សេងៗជាច្រើនទៀត ដើម្បីទប់ស្កាត់ បង្ការកុំឲ្យមានបទល្មើសព្រហ្មទណ្ឌគ្រប់ប្រភេទកើតមានឡើងនៅក្នុងរាជធានីភ្នំពេញ៕ សហការី
