អំណោយនាយឧត្តមសេនីយ៍ ហ៊ុន ម៉ាណែត ត្រូវបន្តនាំទៅចែកជូនសមាជិកសមាគមអតីតយុទ្ធជនជ និងពលរដ្ឋមានជីវភាពខ្វះខាត ៣២គ្រួសារ នៅស្រុកឆែប ខេត្រព្រះវិហារ នាឱកាសបុណ្យចូលឆ្នាំថ្មី
(ព្រះវិហារ)៖ លោកឧត្ដមសេនីយ៍ទោ ច័ន្ទ សុភ័ក្ដ្រា មេបញ្ជាការតំបន់ប្រតិបត្តិការសឹករងព្រះវិហារ និងជាប្រធានសមាគមអតីតយុទ្ធជនកម្ពុជាខេត្ដ នាព្រឹកថ្ងៃទី១៤ ខែមេសា ឆ្នាំ២០២៣ ដែលជាថ្ងៃចូលឆ្នាំថ្មីប្រពៃណីជាតិថ្ងៃទី១ បានដឹកនាំក្រុមការងារអញ្ជេីញចុះជួបសំណេះសំណាល សួរសុខទុក្ខ និងបន្តនាំអំណោយនាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ចែកជូនសមាជិកសមាគមអតីតយុទ្ធជន និងប្រជាពលរដ្ឋក្រីក្រលំបាក និងពិការ នៅឃុំម្លូព្រៃមួយ និងឃុំម្លូព្រៃពីរ ស្រុកឆែប សរុបចំនួន ៣២គ្រួសារ នាឱកាសបុណ្យចូលឆ្នាំថ្មីប្រពៃណីជាតិ។
នៅក្នុងឱកាសនេះដែរ លោកឧត្តមសេនីយ៍ទោ ច័ន្ទ សុភ័ក្ដ្រា បានថ្លែងនាំនូវការផ្តាំផ្ញើសាកសួរសុខទុក្ខ ដោយក្តីនឹករលឹកពី នាយឧត្ដមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក និងលោកស្រី ពេជ្រ ច័ន្ទមុន្នី ផ្ញើជូនសមាជិកសមាគមអតីតយុទ្ធជន និងប្រជាពលរដ្ឋមានជីវភាពខ្វះខាត ដែលមានវត្តមាននៅទីនេះ ពិសេសក្នុងឱកាសនៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៣នេះ សូមជួបតែសេចក្តីសុខ សុខភាពល្អ និងរកទទួលទានមានបានគ្រប់ក្រុមគ្រួសារ។
លោកឧត្តមសេនីយ៍ទោមេបញ្ជាការ បានថ្លែងលើកឡើងនូវការកោតសរសើរដោយស្មោះអស់ពីដួងចិត្ត ចំពោះវីរៈភាពដ៍អង់អាចក្លាហានរបស់សមាជិកសមាគមអតីតយុទ្ធជនយើងទាំងអស់ ដែលកន្លងមកបានលះបង់សាច់ស្រស់ ឈាមស្រស់ តស៊ូរំដោះប្រទេសជាតិ កសាងប្រទេសជាតិ ក្រោមមាគ៌ាដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្វើឱ្យប្រទេសជាតិយើង ទទួលបាននៅសុខសន្តិភាព និងការអភិវឌ្ឍរីកចម្រើនគ្រប់វិស័យ។
លោកឧត្តមសេនីយ៍ទោ ច័ន្ទ សុភ័ក្ត្រា បានអំពាវនាវដល់សមាជិកអតីតយុទ្ធជនគ្រប់ៗរូប គ្រប់ក្រុមគ្រួសារ ត្រូវចូលរួមការពារសុខសន្តិភាពឱ្យនៅគង់វង្ស ដើម្បីឱ្យប្រទេសយើងកាន់តែទទួលបាននូការអភិវឌ្ឍរីកចម្រើនគ្រប់វិស័យថែមទៀត។ ពិសេសត្រូវទៅចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៧ នៃរដ្ឋសភា នៅខែកក្កដាខាងមុខនេះឱ្យបានគ្រប់ៗគ្នា គាំទ្របេក្ខភាពសម្តេចតេជោ ហ៊ុន សែន ជានាយករដ្ឋមន្ត្រី និងនាយឧត្តមសេនីយ៍ ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគត។
សូមបញ្ជាក់ថា អំណោយនាយឧត្ដមសេនីយ៍ ហ៊ុន ម៉ាណែត និងលោកស្រី ពេជ្រ ច័ន្ទមុន្នី ដែលនាំមកចែកជូនសមាជិកសមាគមអតីតយុទ្ធជន និងប្រជាពលរដ្ឋក្រីក្រលំបាក ពិការ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៣ ក្នុងនោះឃុំម្លូព្រៃមួយ ចំនួន ១៥គ្រួសារ និងឃុំម្លូព្រៃពីរ ចំនួន ១៧គ្រួសារ ក្នុងមួយគ្រួសារៗ ទទួលបានរួមមាន៖ អង្ករ ១ប៉េ ស្មេី៣០គីឡូក្រាម មី ១កេសទឹកត្រី ១យួរ ទឹកសុីអ៉ីវ ១យួរ ត្រីខ ១យួរ និងថវិកាចំនួន ៤០,០០០រៀលផងដែ៕
