តាមសេចក្តីរាយការណ៍ពីបទល្មើសដឹកជញ្ជូនឈើនៅខេត្តក្រចេះ បានឱ្យដឹងថា លោក ឈឹម ផល្លី មន្ត្រីកងទ័ពជើង គោកផ្នែកដឺបេប្រចាំការនៅខេត្តក្រចេះ ដែលកាលមុនមានកូនចៅនៅតាមផ្លូវជាតិពីខេត្តស្ទឹងត្រែង មុនចូលទីរួមខេត្តក្រចេះ និងនៅស្រុកស្នួល បានដាក់កម្លាំងសម្ងាត់នោះ ពេលនេះត្រូវបានស្នើឱ្យដកចេញ ប៉ុន្តែពួកឈ្មួញនៅតែបង់ប្រាក់ឱ្យដដែល ។
ក្រុមសមត្ថកិច្ចរបស់លោក ឈឹម ផល្លី ត្រូវពួកឈ្មួញអះអាងថា បានបង់ជូនគាត់ដែរ ប៉ុន្តែមិនច្រើនដូចសមត្ថកិច្ច ជំនាញទេ ។ រីឯក្រុមលោក ឈឹម ផល្លី ដែលពីមុនរកទុកសម្រាប់ខ្លួនឯង ផ្ទុយទៅវិញពេលនេះក៏បង់ជូនថ្នាក់ផងដែរ ។
ប្រភពរាយការណ៍បន្តឱ្យដឹងទៀតថា ប្រាក់ដែលបង់នោះ មិនត្រឹមតែសម្រាប់លោក ឈឹម ផល្លី ប៉ុណ្ណោះទេ ពោលគឺ សម្រាប់ថ្នាក់លើថែមទៀតផង ។ ក្រុមអ្នករកស៊ីឈើបានអះអាងថា វាជាការយោគយល់គ្នារវាងឈ្មួញ នឹងសមត្ថកិច្ច ។ ពួកឈ្មួញនិយាយថា នៅខេត្តក្រចេះ បើនិយាយពីស្ថាប័នដែលត្រូវបង់ប្រាក់វិញនោះ មានច្រើនខ្លាំងណាស់គ្រាន់តែខ្លះតិចតួច និងខ្លះបង់រាប់ពាន់ដុល្លារ ។
ក្នុងឱកាសនោះដែរ ពួកឈ្មួញអះអាងថា មន្ត្រីកងកម្លាំងប្រដាប់អាវុធដែលប្រចាំការនៅខេត្តក្រចេះ ក៏ត្រូវពួកគេបង់ ប្រាក់ឱ្យដែរ បើទោះបីជាពេលនេះថ្នាក់លើបញ្ជាឱ្យដកប៉ុស្តិ៍ក៏ដោយ ។
សារព័ត៌មានយើង ពុំអាចសុំការទំនាក់ទំនង ពីលោក ឈឹម ផល្លី បាននៅឡើយនោះទេ ?
