កំពត ៖ ក្មេងស្រីជំទង់ម្នាក់បានស្លាប់យ៉ាងរន្ធត់ ខណៈពេលនាងជិះម៉ូតូម្នាក់ឯង ហើយត្រូវរថយន្តលុចសីុសបើកបំបុកពីក្រោយយ៉ាងពេញទំហឹង រួចអូសម៉ូតូនិងមនុស្សជាច្រើនម៉ែត្រ បណ្តាលឲ្យម៉ូតូត្រូវរងការខូចខាតយ៉ាងដំណំផងដែរ។
ហេតុការណ៍គួរឲ្យសង្វេគនេះ បានកើតឡើងលើកំណាត់ផ្លូវជាតិលេខ៣៣ នៅវេលាម៉ោង១៧និង២០នាទីល្ងាច ថ្ងៃទី១៩ខែតុលា ឆ្នាំ២០១៧ ត្រង់ចំណុចភូមិកំពង់កេស ឃុំត្រពាំងសង្កែ ស្រុកទឹកឈូ ខេត្តកំពត។
សាក្សីនៅកន្លែងកើតហេតុបាននិយាយថា មុនពេលជួបរឿងរ៉ាវដ៏អាក្រក់នេះ គេឃើញក្មេងស្រីរងគ្រោះជិះម៉ូតូម្នាក់ឯងម៉ាកC125 ពណ៌ខ្មៅក្នុងទិសដៅពីកើតទៅលិច ដោយប្រើល្បឿនបង្គួរ លុះមកដល់ចំណុចគ្រោះថ្នាក់ ក៏មានរថយន្តម៉ាកLX-300បោះពួយមកពីក្រោយក្នុងទិសដៅស្របគ្នា ហើយរថយន្តបង្កជ្រុលទៅបុកម៉ូតូពីក្រោយយ៉ាងពេញទំហឹង រួចក៏រេចង្កូចទៅផ្នែកខាងឆ្វេងដៃព្រមទាំងបានអូសទាំងម៉ូតូនិងជនរងគ្រោះទៅជាមួយរហូត២០ម៉ែត្រ ទើបបន្តទៅបុកដើមស្ចាយបាក់អស់មួយដើមនៅក្បែរចិញ្ចើមផ្លូវទៅមុខលែងរួចតែម្តង។សាក្សីដដែលបានបញ្ជាក់ថា ក្រោយពេលបង្កហេតុបណ្តាលឲ្យមនុស្សស្លាប់ ម្ចាស់រថយន្តក៏គេចខ្កួនបាត់ស្រមោលភ្លាមៗ ដោយបន្សល់ទុករថយន្តនៅកន្លែងកើតហេតុ។
ទាក់ទិននឹងករណីគ្រោះថ្នាក់ដ៏រន្ធត់ខាងលើ សមត្ថកិច្ចដែលមកវាស់វែងបានឲ្យដឹងថា នេះជាឧបទ្ទវហេតុដែលបង្កឡើងដោយសារម្ចាស់រថយន្តបើកបរខ្វះការប្រុងប្រយ័ត្ន ពោលគឺការបើកបរក្នុងល្បឿនលើសកម្រិតដោយមិនពិនិត្យមើលឧបសគ្គនៅខាងមុខ។ប៉ូលិសបាននិយាយទៀតថា ក្មេងស្រីជំទង់ដែលបាត់បង់ជីវិតមនោះឈ្មោះ យន់ ស្រីសុខ ភេទស្រី អាយុ១៤ឆ្នាំ មានទីលំនៅភូមិបូសញិញ ឃុំកូនសត្វ ស្រុកទឹកឈូ ខេត្តកំពត ក្មេងស្រីរងគ្រោះជិះម៉ូតូម៉ាកC125ពណ៌ខ្មៅ សេរីឆ្នាំ2009 ពាក់ស្លាកលេខ កំពត 1C-0828។ចំណែករថយន្តបង្កហេតុម៉ាកលុចសីុស LX-300 ពណ៌ស ពាក់ស្លាកលេខ ស្វាយរៀង 2A-2345 ម្ចាស់គេចខ្លួនបាត់ស្រមោលឈឹង។
បច្ចុប្បន្នសពក្មេងស្រីជំទង់រងគ្រោះ ត្រូវបានក្រុមគ្រួសារមកទទួលយកទៅកាន់លំនៅឋាន ដើម្បីចាត់ចែងធ្វើបុណ្យតាមប្រពៃណី។ដោយឡែកមធ្យោបាយពាក់ព័ន្ធប៉ូលិសចរាចរណ៍ បាននាំយកទៅរក្សាទុកនៅក្នុងអធិការដ្ឋាននគរបាលស្រុកទឹកឈូដើម្បីស្រាវជ្រាវរកម្ចាស់ឲ្យចូលខ្លួនមកដោះស្រាយគ្នាតាមច្បាប់ចរាចរណ៍ផ្លូវគោក។/ ណារិទ្ធ
