ខេត្តប៉ៃលិន៖ ក្រោយពីទទូលដំណឹងតាមរយៈក្រុមការងារ របស់អាជ្ញាធរខេត្ត ក្នុងករណីឃាតកម្មសម្លាប់ទាំងគ្រួសារ ដោយមានជនរងគ្រោះចំនួន ៣ នាក់ ដែលមានឳពុកម្តាយនិងកូន ដែលមានអាយុ៦ខែ នៅភូមិអូរចិត្តប្រាំ ឃុំអូរអណ្តូង ស្រុកសាលាក្រៅ ខេត្តប៉ៃលិន កាលពីវេលាម៉ោង១២:៣០នាទី រលងអាធ្រាតថ្ងៃទី២១ ខែវិច្ឆិកា ឆ្នាំ២០១៤ នោះ នៅល្ងាចថ្ងៃដដែល លោក កើតសុធាអភិបាលនៃគណៈខេត្តប៉ៃលិននឹងអភិបាលរងខេត្តព្រមទាំងមន្ត្រី ក្រោម ឱវាទ បានមកចូលរួមរំលេកទុក្ខ ក្រុមគ្រួសារ នៃសព ព្រមទាំងផ្តល់ចវិកា សម្រាប់បុណ្យសព ចំនួន 2,500,000 រៀល និងថវិកា (គ. ជ. ប) 200,000 រៀល សម្រាប់រៀបចំពិធី ។
សូមបញ្ជាក់ថា៖ នៅវេលាម៉ោង១២:៣០នាទីរលងអាធ្រាត ឈានចូលថ្ងៃទី២១ ខែវិច្ឆិកា ឆ្នាំ២០១៤ នៅចំនុចភូមិអូរចិត្តប្រាំ ឃុំអូរអណ្តូង ស្រុកសាលាក្រៅ ខេត្តប៉ៃលិន មានករណីឃាតកម្មយ៉ាងព្រៃផ្សៃមួយ ដោយឃាតកបាន សម្លាប់ទាំងក្រុមគ្រួសារ មានចំនួន០៣នាក់ ដែលមានឳពុកម្តាយនិងកូន ដែលមាន អាយុ៦ខែ ព្រមទាំងដុតផ្ទះបំបាត់ភស្តុតាងទៀតផង ។
ជនរងគ្រោះដែលស្លាប់ក្នុងករណីអំពើឃាតកម្មនេះ ទី១-ឈ្មោះ ហេង រ៉ាវី ភេទ ប្រុស អាយុ ២៨ឆ្នាំ ត្រូវជាប្តី ដែលមានមុខរបរជាស្មៀនឃុំសាលាក្រៅ ស្រុកសាលាក្រៅ និងជាម្ចាស់សៃឡូទទួលទិញពោត ដំឡូងផងដែរ ទី២-ឈ្មោះ ធី ផលឡៃ ភេទស្រី អាយុ ២៤ឆ្នាំ ត្រូវជាប្រពន្ធ មុខរបរលក់អីវ៉ាន់ ចាប់ហួយ និងទី៣-ឈ្មោះ ហេង ម៉េងជូ អាយុ ៦ខែ រស់នៅក្នុងបន្ទុក អ្នកទាំង រស់នៅភូមិឃុំកើតហេតុខាងលើ។
ហើយនៅព្រឹកថ្ងៃដដែល ក្រុមគ្រួសារទាំងខាងប្រុសនិងខាងស្រី បានយកបំណែក សពចេញពីគំនរធ្យូងផ្ទះ ដើម្បីរៀបចំធ្វើបុណ្យតាមប្រពៃណី។
បើតាមសម្តីបងប្រុសជនរងគ្រោះ ឈ្មោះ ឆោម ចំណាន អាយុ ៣២ឆ្នាំ ដែល មានផ្ទះជាប់គ្នាបានរៀបរាប់ថា វេលាម៉ោង១២ រលងអាធ្រាត នៅពេលដែល គាត់កំពុងតែលង់លក់ ស្រាប់តែលឺស្នូររប៉េះរប៉ោះ ហើយឃើញភ្លើងក្រហម គាត់ក៍រត់ចេញមកក្រៅទើបឃើញភ្លើងកំពុងឆាបឆេះផ្ទះរបស់បងខ្លួន ហើយគាត់ក៍បានឃើញម៉ូតូជនសង្ស័យ០២គ្រឿងបានជិះចេញ បន្ទាប់មកគាត់ក៍បានស្រែកហៅអោយអ្នកជិតខាងជួយពន្លត់ភ្លើង ទើបដឹងថាបងនិងក្មួយរបស់ខ្លួនបានស្លាប់បាត់ទៅហើយ។
អំពើ សម្លាប់ដ៏ឃោរឃៅនេះ សមត្ថកិច្ចនគរបាលគ្រប់លំដាប់ថ្នាក់នៅក្នុងខេត្ត កំពុងស្រាវជ្រាវយ៉ាងដុតដៃដុតជើងបំផុត ដើម្បីតាមវែកមុខជនដៃដល់ ក្នុងអំពើសាហាវព្រៃផ្សៃបំផុតនេះ ។ ក្នុងការស្រាវជ្រាវសមត្ថកិច្ចបានឃាតខ្លួនជនសង្ស័យម្នាក់ដែលជា បងថ្លៃ របស់ជនរងគ្រោះ ផងដែរ ៕
អត្ថបទសេង សុវណ្ណារិទ្ធ
