កំពត ៖ ដើម្បីឆ្លើយតបទៅនឹងសុខភាព សុខមាលភាព ក៏ដូចជាហានិភ័យផ្សេងៗ ទាក់ទិននឹងគ្រឿងឧបភោគ និងបរិភោគនោះ នៅព្រឹកថ្ងៃទី៥ខែកញ្ញា ឆ្នាំ២០១៧មន្ត្រីកាំកុងត្រូលកំពត-កែប រួមជាមួយមន្ត្រីពាណិជ្ជកម្មខេត្តកំពត បានចុះត្រួតពិនិត្យ ការតាំងលក់បន្លែ ត្រីសាច់ ផ្លែឈើ ព្រមទាំងមុខទំនិញជាច្រើនប្រភេទទៀតដែលលក់ ក្នុងផ្សារទីរួមខេត្តកំពត។
ចំពោះសកម្មភាពត្រួតពិនិត្យដ៏ផុលផុសខាងលើ ប្រជាពលរដ្ឋក៏បានសំដែងការអបអរសាទរនូវការខិតខំយកចិត្តទុកដាក់ខ្ពស់ របស់មន្ត្រីជំនាញ ដោយពួកគាត់យល់ថា អំឡុងពេលអនាគតទំនិញគ្រប់ប្រភេទដែលលក់ប្រកួតប្រជែងក្នុងទីផ្សារនានា ប្រហែលជាគ្មានការក្លែងបន្លំទៀតឡើយ។ម្យ៉ាងទៀតពួកគាត់បាននិងកំពុងព្រួយបារម្មណ៍យ៉ាងខ្លាំង ពាក់ព័ន្ធនឹងហានិភ័យកើតឡើងផ្ទួនៗផ្តើមដោយសារការបរិភោគប៉ះលើចំណីអាហារដែលមានផ្ទុកសារជាតិគីមីដែលបង្កប៉ះពាល់ដល់សុខភាព។
ទោះជាយ៉ាងណា ការត្រួតពិនិត្យមុខទំនិញនានាដែលតាំងលក់នៅលើទីផ្សារ ដូចជាផ្លែឈើ បន្លែ ត្រី សាច់ គ្រប់ប្រភេទ ថ្វីត្បិតមន្ត្រីជំនាញបានអនុវត្តន៍យ៉ាងសស្រាក់សស្រាំបែបណា ក៏មានមតិមហាជនភាគច្រើននៅតែផ្តោតការសង្ស័យព្រមទាំងសំដែងការរិះគន់ធ្ងន់ៗ ទៅលើផ្នែកជំនាញកាំកុងត្រូល ដែលកន្លងមក ហាក់ដូចជាពុំមានវិធានការទប់ស្កាត់រាល់សកម្មភាពដឹកជញ្ជូនមុខទំនិញផ្សេងៗតាមមាត់ច្រកព្រំដែន ចូលមកតាំងលក់នៅក្នុងទីផ្សារនានាទូទាំងខេត្តកំពត-កែប ហើយភាពធូររលុងនេះ បានប្រព្រឹត្តរាប់ឆ្នាំមកហើយ ដោយគេមិនដែលឃើញមន្ត្រីជំនាញប្រចាំច្រកទ្វារព្រំដែន មានចំណាត់ការទៅលើក្រុមឈ្ញួញដឹកជញ្ជូនមុខទំនិញចូលមកលក់ចែកចាយក្នុងទីផ្សារក្នុងតំបន់ខេត្តកំពតឡើយ។គេហ៊ានអះអាងថា ទំនិញដែលឆ្លងកាត់តាមមាត់ច្រកព្រំដែនអន្តរជាតិព្រែកចាក រួមមាន៖ ដូចជាបន្លែ ផ្លែឈើ គ្រឿងឧបភោគបរិភោគ បរិភោគ ឬប្រភេទគ្រឿងសមុទ្រ ភាគច្រើនផ្ទុកដោយសារធាតុគីមីមានកម្រិតខ្ពស់ ប៉ុន្តែមុខទំនិញទាំងនេះនៅតែសំរុកចូលមកលុកលុយក្នុងទីផ្សារស្រុកយើង ថែមទាំងចរាចរណ៍ទៅដល់រាជធានីភ្នំពេញបានយ៉ាងស្រួលទៀតផង។លើសពីនេះ ទំនិញដែលប្រើសារធាតុគីមី ដែលឆ្លងកាត់តាមច្រកទ្វារ មិនមែនដឹកជញ្ជូនម្តងម្កាលនោះទេ គឺដឹកជញ្ជូនរាល់យប់រាល់ថ្ងៃ ទាំងច្រកធំ ទាំងច្រករបៀងនានា។
ដូច្នេះបើស្ថាប័នជំនាញនៅតែបណ្តែតបណ្តោយ ឲ្យមានមុខទំនិញខូចគុណភាព ហួសកាលបរិច្ឆេទ ឬបន្លែ ផ្លែឈើ ត្រីសាច់ ក៏ដូចជាគ្រឿងឧបភោគ បរិភោគ ដែលផ្តល់ហានិភ័យខ្ពស់មកលើសុខភាព ដោយគ្មានការត្រួតពិនិត្យត្រឹមត្រូវ បើទោះជាខិតខំរឹតបន្តឹងនៅតាមទីផ្សារក្នុងតំបន់យ៉ាងណា ក៏មិនគ្រប់គ្រាន់ដែរ ព្រោះតម្រូវការក្នុងគ្រួសារនិមួយៗត្រូវការបរិភោគអាហារដែលទិញមកពីផ្សារជាប្រចាំ ឯការត្រួតពិនិត្យរបស់ជំនាញ ហាក់មានកម្រិតនៅឡើយ ៕
ណារិទ្ធ
