រាជធានីភ្នំពេញ ៖ លោក កឹម សុខា ប្រធានគណបក្សសង្គ្រោះជាតិ ត្រូវសមត្ថកិច្ចនគរបាលក្រុងភ្នំពេញឃាត់ខ្លួន នៅវេលាម៉ោង១២៖៣៥នាទី អធ្រាត្រឆ្លងចូលថ្ងៃទី៣ ខែកញ្ញា ឆ្នាំ២០១៧នេះ ពីបទក្បត់ជាតិ នៅសង្កាត់បឹងកក់ទី២ ខណ្ឌទួលគោក រាជធានីភ្នំពេញ ហើយ បានបញ្ជូនទាំងយប់ទៅឃុំខ្លួននៅពន្ធនាគារត្រពាំងថ្លុង នៅឯខេត្តត្បូងឃ្មុំ។
ការចាប់ខ្លួនមេបក្សរូបនេះ គឺធ្វើឡើងភ្លាមៗ បន្ទាប់ពីមានព័ត៌មានបែកធ្លាយថ្មីៗនេះថា គណបក្សប្រឆាំង និងក្រុមគ្រួសាររបស់លោក បានឃុបឃិតជាមួយបរទេសក្នុងគោលបំណងចង់ផ្តួលរំលំរដ្ឋាភិបាលស្របច្បាប់បច្ចុប្បន្ន។
សេចក្ដីថ្លែងការណ៍បន្តថា តាមរយៈវិដេអូក្លីប ដែលត្រូវបានផ្សព្វផ្សាយដោយបណ្ដាញ CBN (Cambodian Broadcasting Network) ដែលមានទីតាំងនៅប្រទេសអូស្ត្រាលី និងភស្តុតាងដទៃទៀត ដែលអាជ្ញាធរមានសមត្ថកិច្ចប្រមូលបាន គឺបានបង្ហាញឲ្យឃើញច្បាស់ អំពីផែនការសម្ងាត់នៃការឃុបឃិតគ្នារវាងឈ្មោះ កឹម សុខា និងបក្ខពួកជាមួយបរទេស ដែលធ្វើឲ្យប៉ះពាល់ដល់ព្រះរាជាណាចក្រកម្ពុជា។
អំពើនៃការឃុបឃិតគ្នាជាសម្ងាត់ខាងលើនេះ គឺជាអំពើក្បត់ជាតិ ដែលមានចែង និងផ្ដន្ទាទោសតាមបញ្ញត្តិនៃមាត្រា៤៤៣ (បទសន្ទិដ្ឋិភាពជាមួយបរទេស) ក្នុងផ្នែកទី១ ស្ដីពីអំពើក្បត់ជាតិ និងអំពើចារកម្ម ជំពូកទី២ ស្ដីពីការប៉ះពាល់ដល់សន្តិសុខនៃរដ្ឋ មាតិកាទី១ ស្ដីពីការប៉ះពាល់ដល់ស្ថាប័នចម្បងរបស់រដ្ឋ គន្ថីទី៤ ស្ដីពីបទល្មើសប្រឆាំងនឹងជាតិ នៃក្រមព្រហ្មទណ្ឌនៃព្រះរាជាណាចក្រកម្ពុជា។ វិដេអូក្លីបខាងលើនេះ ក៏កំពុងតែបន្តផ្សព្វផ្សាយរហូតមកដល់ពេលនេះផងដែរ។ បច្ចុប្បន្ន ឈ្មោះ កឹម សុខា ស្ថិតនៅក្រោមការឃាត់ខ្លួន និងការចាត់ការតាមច្បាប់ ដោយស្ថាប័នមានសមត្ថកិច្ច និងស្ថាប័នតុលាការ។
ជាមួយគ្នា រាជរដ្ឋាភិបាលកម្ពុជា ក៏បានអំពាវនាវឲ្យរក្សាភាពស្ងប់ស្ងាត់ និងទុកករណីនេះ ជូនតុលាការ ដើម្បីចាត់ការបន្តជាសមត្ថកិច្ចស្របតាមច្បាប់ និងនីតិវិធីជាធរមាន។
