កំពត ៖ មានករណីភ្ញាក់ផ្អើលទាំងព្រឹក ពីសំណាក់អ្នកដំណើរ ខណៈមានបុរសម្នាក់ជិះចង្អើរខាងក្រោយរថយន្តទួរីសដាំក្បាលធ្លាក់មកពីរថយន្តបណ្តាលឲ្យរបួសធ្ងន់សល់តែដង្ហើមចង្រិត ត្រង់ចំណុចខាងកើតស្ពានក្បាលរមាស នៃភូមិសាស្ត្រស្រុកទឹកឈូ ខេត្តកំពត នៅវេលាម៉ោង៨និង២៥នាទីព្រឹក ថ្ងៃទី៣០ខែសីហា ឆ្នាំ២០១៧។
តាមប្រភពពីក្រុមអ្នកដំណើរបានឲ្យដឹងថា មុនពេលកើតហេតុគេឃើញរថយន្តម៉ាកទួរីសដឹកអ្នកដំណើរមួយគ្រឿងបើកបរពីកើតទៅលិច ហើយនៅពីក្រោយរថយន្តគេឃើញបិរសជាជនរងគ្រោះជិះនៅលើចង្អើរសម្រាប់ផ្ទុកឥវ៉ាន់ខាងក្រោយម្នាក់ឯង លុះមកដល់ចំណុចកើតហេតុខាងលើ មិនដឹងមូលហេតុអ្វី ស្រាប់តែបុរសរងគ្រោះដាំក្បាលធ្លាក់ពីចង្អើរក្រោយរថយន្តបណ្តាលឲ្យរងរបួសបែកមុខបែកមាត់យ៉ាងធ្ងន់ធ្ងរ ហើយដេកសន្លប់ស្តូកនៅកណ្តាលទ្រូងផ្លូវ។ ឃើញបែបនេះ អ្នកដំណើរនិងប្រជាពលរដ្ឋនៅម្តុំនោះ ក៏នាំគ្នាលើកសែងបុរសរងគ្រោះមកចិញ្ចើមផ្លូវ រួចរាយការណ៍ប្រាប់សមត្ថកិច្ចដើម្បីជួយអន្តរាគមន៍ហៅរថយន្តមកដឹកទៅសង្គ្រោះនៅឯមន្ទីរពេទ្យ។ប្រភពបានបញ្ជាក់ថា បុរសរងគ្រោះខាងលើពេលធ្លាក់ពីលើចង្អើរក្រោយរថយន្តនោះប្រហែលជាអ្នកបើកបរមិនដឹងឡើយ ព្រោះពេលនោះរថយន្តកំពុងមានល្បឿនខ្លាំងផង ណាមួយពេលជនរងគ្រោះធ្លាក់គឺស្ថិតចំកណ្តាលទ្រូងផ្លូវ ទើបមិនចាប់អារម្មណ៍ហើយរថយន្តក៏បន្តដំណើរទៅទិសខាងលិចបាត់តែម្តង។
បើតាមការបញ្ជាក់អះអាងពីសមត្ថកិច្ចបាននិយាយថា បុរសរងគ្រោះខាងលើ អាចងងុយដេកពេលកំពុងអង្គុយជិះលើចង្អើររថយន្ត ហើយក៏ងោកដាំក្បាលបោកនឹងថ្នល់ធ្វើឲ្យរបួសយ៉ាងតំណំបែបនេះ។សមត្ថកិច្ចបានឲ្យដឹងទៀតថា ជនរងគ្រោះនេះ បើតាមគេស្គាល់ គឺមានឈ្មោះ ពូធូ ភេទប្រុស អាយុប្រហែល៥០ឆ្នាំ រស់នៅភូមិដំណាក់ចង្អើរ សង្កាត់ព្រៃធំ ក្រុង-ខេត្តកែប ជាមនុស្សដើរត្រេកចរផ្តេសផ្តាស មិនសូវនៅផ្ទះទេ ជួនកាលជួយចាប់ម៉ូយដាក់ឡានតាក់ស៊ី បានកម្រៃបន្តិចបន្តួច គ្រាន់តែចិញ្ចឹមខ្លួនឯងប៉ុណ្ណោះ។
ក្រោយពីមានហេតុការណ៍ដ៏កម្រនេះ សមត្ថកិច្ចក៏បានទំនាក់ទំនងហៅរថយន្តសាម៉ុយដើម្បីដឹកជនរងគ្រោះទៅសង្គ្រោះព្យាបាលនៅឯមន្ទីរពេទ្យ និងបន្តតាមស្រាវជ្រាវរករថយន្តដែលបង្កឲ្យមានមនុស្សគ្រោះថ្នាក់ដើម្បីមកទទួលខុសត្រូវចំពោះមុខច្បាប់ ៕
ណារិទ្ធ
