កំពត ៖ មនុស្សម្នាក់បានស្លាប់និងម្នាក់ទៀតរងរបួសធ្ងន់ ដោយសារត្រូវរថយន្តបុកពីក្រោយ ខណៈជនរងគ្រោះទាំងពីរនាក់ជិះម៉ូតូឌុបគ្នាហើយបត់ឆ្លងផ្លូវមិនឲ្យសញ្ញាត្រឹមត្រូវ ទើបត្រូវរថយន្តបើកមកពីក្រោយព្រលះប្រាវតែម្តង។
ហេតុការណ៍ដ៏រន្ធត់នេះ បានកើតឡើងកាលពីវេលាម៉ោង៧និង៣០នាទីព្រឹកថ្ងៃទី២៨ខែសីហា ឆ្នាំ២០១៧ ត្រង់ចំណុចក្លោងទ្វារច្រកចូកផ្លូវវាងក្រុង ស្ថិតក្នុងភូមិត្រពាំងជ្រៃ ឃុំត្រពាំងធំ ស្រុកទឹកឈូ ខេត្តកំពត រវាងម៉ូតូC125និងរថយន្តម៉ាកRANGERក្នុងទិសដៅស្របគ្នា។
ពាក់ព័ន្ធនឹងគ្រោះថ្នាក់ចរាចរណ៍ខាងលើ ប្រភពជាច្រើនបានឲ្យដឹងថា មុនពេលប៉ះទង្គិចគ្នាដ៏ធ្ងន់ធ្ងរនេះ គេឃើញបុរសនិងស្ត្រីចំណាស់ដែលជាជនរងគ្រោះ ជិះម៉ូតូឌុបគ្នា ម៉ាកC125ពណ៌ខ្មៅ ក្នុងទិសដៅពីជើងទៅត្បូង លុះមកដល់ចំណុចកើតហេតុម៉ូតូជនរងគ្រោះ ក៏បានបត់ចូលច្រកក្លោងទ្វារវាងក្រុងដោយមិនបានបើកភ្លើងសញ្ញាសម្គាល់ឡើយ គាប់ជួនរថយន្តម៉ាកRANGERបើកពីក្រោយស្របជាមួយម៉ូតូ ក៏វាក់អើុចាប់ហ្វ្រាំងមិនទាន់ទើបបុកម៉ូតូយ៉ាងពេញទំហឹង បណ្តាលឲ្យបុរស និងស្ត្រីចំណាស់ ខាងលើខ្ទាតបើុងដូចស្លឹកកណ្តប ហើយបុរសចំណាស់ជាអ្នកបើកបរបានស្លាប់ភ្លាមៗនៅកន្លែងកើតហេតុ ចំណែកស្ត្រីចំណាស់រួមដំណើររងរបួសជាទម្ងន់ រីឯម៉ូតូក៏រងការខូចខាតស្ទើទាំងស្រុងផងដែរ។
ចំពោះករណីគ្រោះថ្នាក់ចរាចរណ៍ខាងលើនេះ សមត្ថកិច្ចបានបញ្ជាក់ថា គឺផ្តើមដោយអ្នកបើកបរម៉ូតូខ្វះការប្រុងប្រយ័ត្ន ពោលគឺបត់ឆ្វេងដោយមិនបានប្រាប់សញ្ញា ថែមទាំងបត់ទាំងបង្ខំទើបងាយប្រឈមនឹងគ្រោះថ្នាក់បែបនេះ។សមត្ថកិច្ចបានឲ្យដឹងទៀតថា ជនរងគ្រោះជាប្តីប្រពន្ធនឹងគ្នា គឺប្តីឈ្មោះ ថេង ទី អាយុ៦៤ឆ្នាំ ស្លាប់ភ្លាមៗនៅចំណុចកើតហេតុ និងស្ត្រីរងគ្រោះជាប្រពន្ធឈ្មោះ មុយ អូន អាយុ៦២ឆ្នាំរបួសធ្ងន់ ជនរងគ្រោះមានទីលំនៅក្នុងភូមិកំពង់គ្រែង ឃុំកំពង់គ្រែង ស្រុកទឹកឈូ ខេត្តកំពត ជនរងគ្រោះជិះម៉ូតូឌុបគ្នា ម៉ាកC125ពណ៌ខ្មៅ សេរីឆ្នាំ2016ពាក់ស្លាកលេខ ភ្នំពេញ 1FK-7601 ។ ចំណែករថយន្ត បន្ទាប់ពីបង្កគ្រោះថ្នាក់រួចក៏បន្ថែមល្បឿនមកកាន់ការដ្ឋានសំណង់មួយកន្លែងនៅក្នុងក្រុងកំពត ប៉ុន្តែប៉ូលិសតាមរកឃើញហើយ គឺរថយន្តម៉ាកRANGER ពាក់ស្លាកលេខ ភ្នំពេញ 2AD-7918ដែលមានម្ចាស់ឈ្មោះ ឡេង វណ្ណី ភេទប្រុស អាយុ៣១ឆ្នាំ មានទីលំនៅភូមិរាម ឃុំរាម ស្រុកព្រៃនប់ ខេត្តព្រះសីហនុ។
បច្ចុប្បន្ន សពបុរសចំណាស់ត្រូវកូនចៅដឹកទៅកាន់លំនៅដ្ឋានដើម្បីរៀបចំធ្វើបុណ្យតាមប្រពៃណី ចំណែកស្ត្រីជាប្រពន្ធដាចើញាតិក៏បានដឹកទៅសង្គ្រោះអាយុជីវិតនៅក្នុងមន្ទីរពេទ្យភ្លាមៗ។រីឯមធ្យោបាយពាក់ព័ន្ធសមត្ថកិច្ចក៏បញ្ជូនទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តកំពត សម្រាប់ដោះស្រាយគ្នានាពេលក្រោយ៕ ណារិទ្ធ
