(ភ្នំពេញ) ៖ លោក ខៀវ កូឡា អ្នកសារព័ត៌មានជើងចាស់របស់កម្ពុជា បានមានប្រសាសន័ថា សពកូនបង្កើតរបស់លោក គឺលោក ខៀវ កូនែល ដែលបានបាញ់សម្លាប់ភរិយា និងខ្លួនឯង កាលពីយប់មិញ ពេលនេះត្រូវបានយកតម្កល់ទុកនៅវត្តស្រះចក ក្នុងសង្កាត់វត្តភ្នំ ខណ្ឌដូនពេញ ដើម្បីធ្វើបុណ្យតាមប្រពៃណីខ្មែរ។
នៅយប់ថ្ងៃទី២៧ ខែសីហា ឆ្នាំ២០១៧ ខៀវ កូនែល ដែលត្រូវកូនប្រុសបង្កើតរបស់លោក ខៀវ កូឡា បានសម្លាប់ប្រព្ធរបស់ខ្លួនឈ្មោះ យេង លក្ខិណា ហើយបានបាញ់ខ្លួនឯងនៅក្នុងផ្ទះតែម្តង ស្ថិតនៅក្នុងខណ្ឌចំការមន រាជធានីភ្នំពេញ។
លោក ខៀវ កូឡា បានប្រសាសន៍ដោយក្រៀមក្រំថា លោកបានកូនតែពីរនាក់ប៉ុណ្ណោះ គឺកូនប្រុសឈ្មោះ ខៀវ កូនែល និងកូនស្រីឈ្មោះ ខៀវ សានសាណា។
ខៀវ កូនែល គឺជាក្មួយប្រុសបង្កើតរបស់លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ និងជាប្រធានខុទ្ទកាល័យសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
លោក ខៀវ កូឡា មានបងប្រុសបង្កើតបីនាក់ គឺលោក ខៀវ សុភ័គ លោក ខៀវ កុសល និងលោក ខៀវ កូឡុំ ហើយលោកមានតែកូនបង្កើតពីរប៉ុណ្ណោះ គឺ ខៀវ កូនែល និង ខៀវ សានសាណា។
តាមសាក្សីនៅកន្លែងកើតហេតុបានឲ្យដឹងថា មូលហេតុបណ្តាលមកពីភ្លើងប្រច័ណ្ឌ។
ខៀវ កូនែល គឺជាកូនប្រុសតែម្នាក់គត់របស់លោក ខៀវ កូឡា និងមានតួនាទីអនុប្រធានការិយាល័យគណនេយ្យជំនួយការផ្ទាល់នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ ហើយត្រូវជាបងប្រុសបង្កើតរបស់ពិធីការិនី ខៀវ សានសាណា។
ប្តីប្រពន្ធដែលបាញ់សម្លាប់គ្នានេះ ទើបតែរៀបការ កាលពីថ្ងៃទី ០៨ ខែឧសភា ឆ្នាំ២០១៧ ពោលគឺបានរស់នៅជាមួយគ្នាជិតបួនខែហើយ។ អ្នកអ្នកទាំងពីរធ្លាប់ឆ្លងកាត់ជីវិតអាពា៌ពិពាហ៌ និងលែងលះ ព្រមទាំងមានកូនរៀងៗខ្លួន មុននឹងយកគ្នាជាប្តីប្រពន្ធ។
សូមបញ្ជាក់ផងដែរថា នៅមុនថ្ងៃកើតហេតុមួយថ្ងៃ ស្ត្រីជាប្រពន្ធ បានបង្ហោះពាក្យពេចន៍មួយចំនួននៅលើហ្វេសប៊ុករបស់ខ្លួនថា «មានមនុស្សតិចបំផុត ដែលអាចអត់ធ្មត់នឹងភាពឆេវឆាវ គ្មានហេតុផលរបស់យើងបាន តែមានមនុស្សតែម្នាក់ប៉ុណ្ណោះ ដែលក្រៅពីអ្នកមានគុណយើង ដែលព្រមអភយ័អនុគ្រោះ ចំពោះកំហុសគ្រប់យ៉ាងរបស់យើង ព្រោះម្នាក់នោះជាមនុស្ស ដែលស្រលាញ់យើងខ្លាំងជាងជីវិតរបស់គេ»៕
