កំពត ៖ នៅរសៀលថ្ងៃទី២៥ខែសីហា ឆ្នាំ២០១៧នេះ នៅក្នុងសាលប្រជុំគណបក្សប្រជាជនកម្ពុជាខេត្តកំពត បានធ្វើពិធីប្រកាស សាខាសម្ព័ន្ធយុវជនស្រលាញ់សន្តិភាព ក្រោមការចូលរួមដ៏សកម្មពីសំណាក់ លោកចាន់ ចេស្តា អភិបាលខេត្តកំពត លោកជុំ កុសល ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកប៉ាន់ខែម ប៊ុនថន ជំនួយការផ្ទាល់សម្តេចនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់ជាច្រើនរូប លោក លោកស្រីជាប្រធាន អនុប្រធាន សាខារាជធានី ខេត្ត សរុបប្រមាណជាង៥០០នាក់។
ចំពោះការប្រកាសសាខាសម្ព័ន្ធយុវជនស្រលាញ់សន្តិភាពនេះ ក៏ជាឱកាសមួយ ក្នុងការផ្តល់មតិយោបល់ ទាក់ទិនស្ថានភាពក្នុងសង្គម ពីអតីតកាលនិងបច្ចុប្បន្នកាល ដល់ស្រទាប់យុវជន ដើម្បីស្វែងយល់អ្វីដែលហៅថាសន្តិភាពដ៏ពិតប្រាកដ។ការស្រលាញ់សន្តិភាព គឺផ្តើមឡើងពីយើងទាំងអស់គ្នា។ហើយកត្តាចាំបាច់គឺភាពសហការក្នុងស្មារតីសាមគ្គីភាពជាធ្លុងមួយ ដើម្បីជួយអភិវឌ្ឍន៍ប្រទេសទៅរកភាពរីកចម្រើនលើគ្រប់វិស័យ។
បន្ទាប់ពីការប្រកាសសាខាសម្ព័ន្ធយុវជនស្រឡាញ់សន្តិភាពរួចមក នៅល្ងាចថ្ងៃដដែល លោកចាន់ ចេស្តា អភិបាលខេត្ត ក៏បានដឹកនាំគណៈប្រតិភូដើម្បីចូលរួមបិទការប្រកួតកីឡាប៉េតង់ ស្ថិតនៅឯកីឡដ្ឋានខេត្តកំពត ដោយខណៈនោះ គណៈអធិបតីក៏បានរៀបចំកម្មវិធីជជែកកំសាន្ត អំឡុងពេលពិសារបាយសាមគ្គីជួបជុំរវាងកីឡាករ កីឡាការិនី ដោយភាពសប្បាយរីករាយ ៕
ណារិទ្ធ
