កែប ៖ នៅព្រឹកថ្ងៃទី៣១ខែឧសភា ឆ្នាំ២០១៧ លោកបណ្ឌិត ចម ប្រសិទ្ធ សមាជិកគណៈកម្មាធិការកណ្តាល ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្មនិងសិប្បកម្ម និងជាប្រធានក្រុមការងាររបស់គណៈកម្មាធិការគណបក្សប្រជាជនកម្ពុជា ហែរហមដោយអស់លោកជាក្រុមការងារគណបក្សប្រជាជនគ្រប់លំដាប់ថ្នាក់។ពិធីនេះបានប្រព្រឹត្តឡើង នៅបរិវេណស្នាក់ការគណបក្សប្រជាជន សង្កាត់ព្រៃធំ ក្រុងកែប ខេត្តកែប។
ដោយផ្អែកតាមរបាយការណ៍របស់ លោកតូច សាម៉ន ប្រធានគណៈកម្មាធិការបក្សមូលដ្ឋាន សង្កាត់ព្រៃធំបានឲ្យដឹងថា ក្នុងសង្កាត់ខាងលើមានសមាជិក សមាជិកាបក្សចូលរួមប្រមាណជាង៦០០នាក់ ដែលមកពីភូមិចំនួន៣គឺភួមិដំណាក់ចង្អើរ ភូមិថ្មី និងភូមិកំពង់ត្រឡាច។លោកបានបញ្ជាក់ផងដែរថា គណៈកម្មាធិការគណបក្សមូលដ្ឋានសង្កាត់ចំនួន១ ដែលមានសមាជិកចំនួន២៥នាក់ ស្រី០៤នាក់ មានសាខាបក្សចំនួន០៣ដែលមានសមាជិកសរុបចំនួន០៩នាក់ ស្រី០៣នាក់ អនុសាខាគណបក្សចំនួន១៥ ដែលមានសមាជិកសរុប៤៥នាក់ ស្រី១៥នាក់ និងសមាជិកគណបក្សប្រជាជនកម្ពុជា សរុបទូទាំងសង្កាត់មានចំនួន២.០១៩គ្រួសារ ស្មើនឹង៤.៦៧២នាក់ ស្រី២.៤៣៣នាក់។
ក្នុងកិច្ចសំណេះសំណាលនេះ លោកបណ្ឌិត ចម ប្រសិទ្ធ បានបញ្ជាក់ថា ក្នុងដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ដែលកំពុងខិតជិតមកដល់ខាងមុខនេះ សង្ឃឹមថា គណបក្សប្រជាជននឹងមានការគាំទ្រដ៏លើសលប់ពីសំណាក់ប្រជាពលរដ្ឋ ពិសេសយុវជនគ្រប់ស្រទាប់ ព្រោះបើតាមការស្ទាបស្ទង់គ្រប់អាណតិ្តមកហើយនោះ គឺតួលេខអ្នកគាំទ្រមានអត្រាខ្ពស់ហួសពីការស្មាន ។
លោកបណ្ឌិត បានបញ្ជាក់យ៉ាងដូច្នេះថា កន្លងមកក្រុមការងារគណបក្សប្រជាជន តែងតែចាត់កំលាំងចុះតាមមូលដ្ឋាន ដើម្បីឆ្លើយតបនឹងតម្រូវការចាំបាច់របស់ប្រជាពលរដ្ឋតាមតំបន់និមួយៗ សម្រាប់ជួយជម្រុញនិងលើកកម្ពស់ជីវភាព និងសុខមាលភាពជូនប្រជាពលរដ្ឋ។ទន្ទឹមនឹងភាកិច្ចដ៏ចាំបាច់ដ៏ច្រើនរាប់មិនអស់នេះ គណបក្សប្រជាជន តែងមានគោលការណ៍ដឹកនាំច្បាស់លាស់ មិនចេះភូតកុហក ដូចក្រុមអ្នកនយោបាយមួយចំនួនដែលតែងតែដើរឃោសនាបោកប្រាស់ប្រជាពលរដ្ឋ និងបង្កភាពអសន្តិសុខ ធ្វើឲ្យមានអស្ថិរភាពខាងនយោបាយ និងបំផ្លើសការពិតនោះ។ដោយសារតែ គណបក្សប្រជាជនឈរលើមូលដ្ឋានគ្រឹះដ៏រឹងមាំ សន្យាអ្វីគឺអនុវត្តបានយ៉ាងមានប្រសិទ្ធភាពទើបធ្វើឲ្យប្រជាពលរដ្ឋមានទំនុកចិត្តលើការដឹកនាំរបស់សម្តេច ហ៊ុន សែន។ដូច្នេះសូមបងប្អូបប្រជាពលរដ្ឋ កុំជឿរពាក្យញុះញង់ អុជអាលគ្រប់រូបភាពរបស់អ្នកនយោបាយ ដែលបានត្រឹមតែសន្យាខ្យល់នោះ។
បោះឆ្នោតជូនគណបក្សប្រជាជន ដើម្បីឲ្យសម្តេច ហ៊ុន សែន ដឹកនាំប្រទេស មានភាពរីកចម្រើននិងការអភិវឌ្ឍន៍។បោះឆ្នោតជូនគណបក្សប្រជាជន គឺបោះឆ្នោតឲ្យខ្លួនឯង។បោះឆ្នោតជូនគណបក្សប្រជាជន នឹងនាំមកនូវ សុខ សន្តិភាព ពេញបរិបូរណ៍៕ ណារិទ្ធ
’
