កំពត ៖ ប្រជាពលរដ្ឋកម្ពុជាដែលប្រកបរបរដឹកទំនិញគ្រប់ប្រភេទ តាមច្រកព្រំដែនព្រែកចាក ក្នុងភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច ខេត្តកំពត ត្រូវបានបង្អាក់ចរាចរណ៍ទំនិញរបស់ខ្លួន បន្ទាប់ពីមានគណៈប្រតិភូវៀតណាមជាច្រើននាក់មកមើល បង្គោលព្រំដែនលេខ ៣១៣និង៣១៤នៅរសៀលថ្ងៃទី២៥ខែឧសភា ឆ្នាំ២០១៧។
តាមការឲ្យដឹងពីក្រុមសមត្ថកិច្ចនៃស្ថាប័ននានា ស្ថិតក្នុងច្រកទ្វារអន្តរជាតិព្រែកចាកបាននិយាយថា ករណីមានការកកស្ទះមនុស្សដ៏ណែនណាន់តាន់តាប់នេះ គឺដោយសារតែនៅរសៀលថ្ងៃនេះមានក្រុមអាជ្ញាធររបស់ប្រទេសវៀតណាមបាននាំសិក្ខាកាមមកសិក្សាស្វែងយល់ពី បង្គោលព្រំដែននៃប្រទេសទាំងពីរ។សមត្ថមិច្ចបានបញ្ជាក់យ៉ាងដូច្នេះថា គេពុំចង់បិទច្រកព្រំដែនដែលនាំឲ្យអ្នកដឹកទំនិញនានាឆ្លងកាត់ទីនេះ មានអារម្មណ៍មិនល្អនោះទេ។ម្យ៉ាងវិញទៀតការបង្អាក់ចរាចរណ៍នេះមិនមែនតែត្រឹមតែឃាត់ការដឹកទំនិញរបស់ពលរដ្ឋកម្ពុជានោះទេ សូម្បីទំនិញមកពីប្រទេសវៀតណាមក៏មិនអនុញ្ញាតឲ្យដឹកឆ្លងកាត់ដែរ លើកលែងតែមនុស្សអាចចូលមកទឹកដីខ្មែរបាន ដោយមិនហាមប្រាមឡើយ។
អ្នកដឹកទំនិញផ្សេងៗពិសេសផ្លែស្វាយបានឲ្យដឹងថា ពួកគាត់បាននាំយកកសិផលក្នុងស្រុកនាំទៅលក់ដោះដូរក្នុងប្រទេសវៀតណាមព្រោះជាទម្លាប់ដែលគេតែងប្រកបរបរនេះជាយូរលង់ណាស់មកហើយ ប៉ុន្តែការដឹកជញ្ជូនលើកនេះបែរជាមានឧបសគ្គទៅវិញ។ពួកគាត់និយាយទៀតថា ការកកស្ទះដូចមនុស្សហែរកឋិននេះ បានកើតឡើងតាំងពីម៉ោង១១និង៤៥នាទីថ្ងៃទី២៥ខែឧសភា ឯណោះ ដោយខណៈនោះសមត្ថកិច្ចប្រចាំច្រកទ្វារមិនអនុញ្ញាតឲ្យពួកគាត់ដឹកទំនិញចូលឡើយទើបគាត់សម្រេចចតឈប់ចាំទីនេះប្រមាណជាង៣ម៉ោងតែម្តងទៅ។
ចំពោះករណីសិក្ខាកាមដែលមកសិក្សានៅចំណុច ព្រំដែនលេខ៣១៣និងបង្គោលលេខ៣១៤នេះ ក៏ពុំមានអាជ្ញាធរឬសមត្ថកិច្ចណាម្នាក់បញ្ជាក់ឲ្យដឹងពីមូលហេតុអី្វលើសពីនេះទេ ហើយបន្ទាប់ពីបានបិទច្រកនាំបង្អាក់ដំណើរអ្នកដឹកទូនិញឆ្លងកាត់ប្រមាណជាង៣ម៉ោងនោះ ពេលនេះត្រូវសមត្ថកិច្ចបើកឲ្យធ្វើដំណើរវិញហើយ នៅម៉ោង១៦និង២០នាទី ថ្ងៃទី២៥ខែឧសភា ឆ្នាំ២០១៧នេះ ៕
ណារិទ្ធ
