ខេត្តបន្ទាយមានជ័យ៖លោកជំទាវ ម៉ៅ ម៉ាល័យ តំណាងដ៏ខ្ពង់ខ្ពស់ ឯកឧត្តម កែ គឺមយ៉ាន អញ្ជើញជួបជាមួយ ឯកឧត្តម ណាតផះវុធ ប៊ូធិសារូ ឯកអគ្គរាជទូតថៃប្រចាំប្រទេសកម្ពុជា ក្រោមកិច្ចសហការដឹកនាំរបស់ឯកឧត្តម កែ គឹមយ៉ាន ឧបនាយករដ្ឋមន្ត្រី និងជាប្រធានក្រុមការងារថ្នាក់ជាតិ ចុះជួយមូលដ្ឋានខេត្តបន្ទាយមានជ័យ បាននាំក្រុមគ្រូពេទ្យស្ម័គ្រចិត្ត កម្ពុជា-ថៃ សហការគ្នាចុះជួយព្យាបាលជម្ងឺជូនបងប្អូនប្រជាពលរដ្ឋ ដោយឥតគិតថ្លៃ នៅព្រឹកថ្ងៃទី១៦ ខែឧសភា ឆ្នាំ២០១៧ នៅក្នុងបរិវេណ វត្តប៉ាលេយ្យល័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ការព្យាបាលដោយគ្រូពេទ្យស្ម័គ្រចិត្តនៅក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ គឺគ្មានការ ប្រកាន់និន្នាកានយោបាយណានោះទេ ធ្វើការពិនិត្យព្យាបាលជម្ងឺជូនបងប្អូនប្រជាពលរដ្ឋដោយឥតគិតថ្លៃ ជាពិសេសបងប្អូនប្រជាពលរដ្ឋក្រីក្រ មានជម្ងឺនានា ដើម្បីចូលរួមចំណែកលើកកម្ពស់សុខមាលភាពសាធារណៈ កាត់បន្ថយភាពក្រីក្ររបស់ប្រជាពលរដ្ឋ។
ក្នុងឱកាសនោះ ឯកឧត្តម អ៊ុំ រាត្រី អភិបាលរងខេត្តបន្ទាយមានជ័យ បានថ្លែងបញ្ជាក់ឱ្យដឹងថា ក្រោមកិច្ចដឹកនាំនិងសហការពីឯកឧត្តម កែ គឹមយ៉ាន ទើបមានពិធី ពិនិត្យព្យាបាលជម្ងឺទូទៅ មាត់ធ្មេញ និងកាយសម្បទាជូនប្រជាពលរដ្ឋទូទៅ នៅក្នុងក្រុងប៉ោប៉ែត តាមរយៈក្រុមគ្រូពេទ្យស្ម័គ្រចិត្តកម្ពុជា និងគ្រូពេទ្យស្ម័គ្រចិត្តមកពីប្រទេសថៃ ៕
