ខេត្តរតនគីរី ៖ តាមភ្នាក់ងាររាយការណ៍ថា កាលពីវេលាម៉ោងប្រមាណ៩,០០នាទីយប់ថ្ងៃទី០៥ ខែមេសានេះ ក្បួនរថយន្តដឹកឈើរបស់ចែច្រឹប ជាប្រភេទរថយន្តបាកុង ចំនួន៨គ្រឿងចូលដឹកឈើនៅចំណុចត្រពាំងច្របក់ ស្ថិតក្នុងភូមិកែវសាន ឃុំសេដា ស្រុកលំផាត់ ខណដែលឈើទាំងអស់នោះត្រូវបានគេកាប់ចេញពីតំបន់ដែនជម្រកសត្វព្រៃលំផាត់ ។
ប្រភពពីប្រជាពលរដ្ឋឲ្យដឹងថា មេឈ្មួញឈើឈ្មោះ ចែ ច្រឹប រួមទាំងក្រុមសែស្រឡាយជាឈ្មួញឈើដុសស្លែប្រចាំខេត្តរតនគីរី ហើយអ្នកណាក៏ស្គាល់ ចែ ច្រឹប ឈ្មួញឈើល្បីឈ្មោះម្នាក់នេះដែរ ។ ប៉ុន្តែសកម្មភាពកាប់បំផ្លាញព្រៃឈើនិងដឹកជញ្ជូនឈើស្ទើរខ្ទេចខ្ទីផ្លូវជាតិរបស់ឈ្មួញម្នាក់នេះ គេពុំដែលឃើញអាជ្ញាធរខេត្តសមត្ថកិច្ចពាក់ព័ន្ធ ឬ មន្ត្រីជំនាញណាហ៊ានចេញមុខបង្ក្រាបនោះឡើយ ។ ទន្ទឹមនោះគេក៏មិនដឹងថា គណកម្មការបង្ក្រាបល្មើសព្រៃឈើគ្រប់ថ្នាក់រត់ទៅជ្រកកន្លែងណាដែរ បានជាស្ងាត់ឲ្យឈឹងដូចគ្នា។
ប្រភពរាយការណ៍ថា មេឈ្មួញឈើម្នាក់នេះកំពុងមមាញឹកក្នុងការចេញទៅប្រទេសវៀត ណាម ដើម្បីតភ្ជាប់បណ្តាញឈ្មួញនិងអាជ្ញាធរនៅទីនោះ សម្រាប់ការនាំចេញឈើចេញ ។ ចំណែកមេការដៃជើងនៅខាងក្នុងប្រទេសបាននិងកំពុងមមាញឹកក្នុងការរត់ការបង់លុយតាមសមត្ថកិច្ចជំនាញ អាជ្ញាធរចាប់ពីមូលដ្ឋានរហូតថ្នាក់ខេត្ត ដើម្បីឲ្យជួយបិទបាំងមុខជំនួញខុសច្បាប់របស់មេឈ្មួញយួនឈ្មោះ ចែ ច្រឹប នេះ ។
មជ្ឈដ្ឋានទូទៅកំពុងមានការភ្ញាក់ផ្អើលយ៉ាងខ្លាំង បន្ទាប់ពីដឹងថា ឈ្មួញឈើល្បីឈ្មោះ ចែ ច្រឹប ជនជាតិយួនដែលបានផ្អាកសកម្មភាពមួយរយះនោះ បានចាប់ផ្តើមរកស៊ីបទល្មើសឈើឡើងវិញ ក្នុងខេត្តរតនគីរី ដែលគេដឹងថា ជាជំនួញឈើខុសច្បាប់កាប់បំផ្លាញព្រៃឈើនៅតំបន់មួយចំនួនរួមទាំងព្រៃឈើក្នុងតំបន់ដែនអភិរក្សផងដែរ នាំយកទៅលក់នៅប្រទេសវៀតណាម ។
តាមព័ត៌មានទទួលបានក្រុមឈ្មួញយួនម្នាក់នេះបានរត់ការចប់សព្វគ្រប់អស់ហើយ ទាំងនៅវៀត ណាម និងនៅក្នុងខេត្តរតនគីរី ខណដែលសកម្មភាពជំនួញឈើនឹងចាប់ផ្តើមគគ្រឹគគគ្រេងនៅអំឡុងចាប់ពីមុនបុណ្យចូលឆ្នាំប្រពៃណីខ្មែរខាងមុននេះ ។
ប៉ុន្តែអ្វីដែលមជ្ឈដ្ឋានទូទៅមានការភ្ញាក់ផ្អើលខ្លាំងនោះគឺក្រុមឈ្មួញយួនឈ្មោះ ចែ ច្រឹប បានយកឈ្មោះថ្នាក់ដឹកនាំខេត្តរួមទាំងនាយឧត្តមសេនីយមួយរូបដាក់បញ្ចូលទៅក្នុងកន្ត្រកជំនួញឈើល្មើសច្បាប់របស់ពួកគេ ដោយគេដើរអួតក្អេងក្អាងថា ពួកគេបានត្រូវរ៉ូវនិងបង់លុយឲ្យថ្នាក់ដឹកនាំខេត្តនិងនាយឧត្តមសេនីយរូបនោះរួចរាល់អស់ហើយ ។
ប្រភពព័ត៌មានបានរាយការណ៍ថា ប៉ុន្មានថ្ងៃជាប់ៗ គ្នានេះ មេការឈ្មួញយួន ចែ ច្រឹប បានដើរបាចលុយយ៉ាងច្រើនសន្ធឹកសន្ធាប់ក្នុងខេត្តរតនគីរី ដើម្បីជាថ្នូរនិងការបិទភ្នែកបិទមាត់ អាជ្ញាធរសមត្ថកិច្ចមន្ត្រីជំនាញ ចំពោះជំនួញឈើខុសច្បាប់របស់ក្រុមគេ ខណដែលសាម៉ីខ្លួន ចែ ច្រឹបចេញទៅបាចលុយនៅប្រទេសវៀតណាម ។
សារព័តមានយើងមិនទាន់អាចទំនាក់ទំនងសុំការបំភ្លឺពីឈ្មួញយួនម្នាក់នេះបាននៅឡើយនោះទេ ។ ប៉ុន្តែមន្ត្រីថ្នាក់ខេត្តមួយរួបទទួលស្គាល់ថា ឈ្មោះ ចែ ច្រឹប ឈ្មួញឈើពិតជាមានក្នុងខេត្តនេះមែន ហើយកន្លងមកសមត្ថកិច្ចបានព្រមានច្រើនលើក ហើយឲ្យបញ្ឈប់ការជួញដូរឈើកាប់បំផ្លាញឈើខុសច្បាប់ក្នុងតំបន់នោះ ។ យ៉ាងណាក៏ដោយ មន្ត្រីរូបនោះអះអាងថា នឹងចាត់មន្ត្រីជំនាញតាមដានករណីនេះ ព្រោះបទល្មើសព្រៃឈើកំពុងត្រូវបានស្ថិតក្រោមការឃ្លាំមើលជាប្រចាំរបស់ប្រមុខរាជរដ្ឋាភិបាល សម្តេច ហ៊ុន សែន ៕
