បាត់ដំបង ៖ បុរសម្នាក់ដោយភ្លើងប្រច័ន្ទ ទៅតាមប្រពន្ធដល់កន្លែធ្វើការ នៅរោងចក្រភ្នំពេញ នាំមកបាត់ដំបង យកខ្សែគោ ខ្សែភ្លើង ដំបង កាំបិត កណ្តៀវ ធ្វើទារុណកម្មយ៉ាងឃោរឃៅ ទៅលើនាងអស់រយៈពេល ៤ ថ្ងៃមកហើយ ដើម្បីសួររកប្រុសថ្មី តាំងពីថ្ងៃទី១៦ រហូតដល់ថ្ងៃទី១៩ ខែវិច្ឆិកា ឆ្នាំ២០១៤ ចំណុចចំការដំឡូង (ពឺត) ភូមិសំបួរមាស ឃុំស្នឹង ស្រុកបាណន់ ខេត្តបាត់ដំបង ។
ស្ត្រីរងគ្រោះប្រើលិចលួងប្តីអោយជូនទៅមណ្ឌលសុខភាពចែងមានជ័យ រួចរត់ចូលប៉ុស្តិ៍រដ្ឋបាលចែងមានជ័យ ប្តឹងឃាត់ប្តីចិត្តឃោរឃៅនេះ កាលម៉ោង១៧និង១៥នាទី ថ្ងៃទី២០ ខែវិច្ឆិកា ឆ្នាំ២០១៤ ភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង ។
ហេតុការណ៍វាយធ្វើបាបមានរយៈពេល៤ទៅ៥ថ្ងៃមកហើយ តាំងពីថ្ងៃទី១៦ រហូតដល់ថ្ងៃទី១៩ ខែវិច្ឆិកា ឆ្នាំ២០១៤ ចំណុចចំការដំឡូង(ពឺត) ភូមិសំបួរមាស ឃុំស្នឹង ស្រុកបាណន់ ខេត្តបាត់ដំបង ។
លោក ប៊ុត សំបូរ អធិការស្រុកបាណន់ បានអោយដឹងថា ស្ត្រីរងគ្រោះមានឈ្មោះ វុន ស៊ីថា អាយុ ២៥ ឆ្នាំ ស្នាមឆូតកាំបិតត្រង់ដៃស្តាំនិងក ស្នាមមុតកណ្តៀវក្រោមក្បាលជង្គង់ សងខាងនិងរបួសពេញខ្លួន ជនរងគ្រោះជាកម្មករអេលិកត្រូនិកនៅភ្នំពេញ ។
ចំណែកជនសង្ស័យជាប្តីមានឈ្មោះឌឿនវ៉ាន់អាយុ ៣១ ឆ្នាំ ទាំង ២ នាក់បានរៀបការ ៧ ឆ្នាំ កន្លងមក និងមានកូនស្រីម្នាក់អាយុ ៧ ឆ្នាំ រស់ភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង ។ វត្ថុតាងមានខ្សែគោ ១ ខ្សែ ខ្សែភ្លើង ១ ខ្សែ ដំបងចំនួន ២ កណ្តៀវ និងកូនកាំបិត ១ និងកាំបិតវែង ១ ។
ស្ត្រីរងគ្រោះបានអោយដឹងថា ប្តីបានទៅតាមខ្លួននៅភ្នំពេញ ឲ្យត្រឡប់មកផ្ទះវិញ កាលដើមខែវិច្ឆិកា ពេលមកដល់ផ្ទះបានវាយធ្វើបាបចោទថា មានប្រុសឈ្មោល ។ នៅថ្ងៃ១៦ និង១៧ បានវាយធ្វើបាបនៅល់ផ្ទះ លុះថ្ងៃទី១៨ បានដឹកខ្លួនតាមម៉ូតូនាំទៅចំការម្រេច យកខ្សែគោចងស្លាបសេក នៅនិងដើមឈើ យកដំបងវាយធ្វើបាប ។ នៅថ្ងៃទី១៩ប្តីរូបនេះ បានដឹកខ្លួនតាមម៉ូតូទៅចំការដំឡូងអ្នកភូមិ យកខ្សែភ្លើងចងនិងកាំបិតឆូតខ្លួនកនិងមុខ ថែមទាំងយកកណ្តៀវវាយជើងទាំងសងខាងទៀត ដោយទ្រាំការឈឺចាប់នេះ ខ្លួនបានប្រើល្បិចលួងលោមប្តី អោយជូនទៅមណ្ឌលសុខភាពឃុំចែងមានជ័យ រួចរត់គេចចូលទៅប៉ុស្តិ៍នគរបាលចែងមានជ័យ ប្តឹងសមត្ថកិច្ចអោយចាប់ឃាត់តែម្តង ។
ឈ្មោះ ឌឿន វ៉ាន់ បុរសសង្ស័យបានសារភាពថា ប្រពន្ធបានកុហក អោយទៅទទួលនាង នៅក្រុងបាត់ដំបង កាលថ្ងៃទី១ វិច្ឆិកា ២០១៤ ពេលត្រឡប់មកពីភ្នំពេញវិញ ពេលខ្លួនទៅដល់ក្រុងបាត់ដំបង ប្រពន្ធបិទ ទូរស័ព្ទ ខ្លួនបានទៅដល់ភ្នំពេញ ។ អ្នកជិតខាងបាននិយាយថា ខ្លួនអាវែក ប្រពន្ធហ៊ឺហា ចូលបាឌីសស្គូរាល់ថ្ងៃ ក្រោយមកខ្លួនក៏នាំប្រពន្ធមកផ្ទះ ហើយសាកសួរនាងរឿងមានប្រុសឈ្មោលច្រើនដង នាងនិយាយឡេបឡប់ម្តងថា មានម្តងថាមិនមាន ប៉ុន្តែពេលទូរស័ព្ទ មនុស្សប្រុសទូរស័ព្ទចូលនាងមិនហ៊ានលើកនិយាយ ទើបខ្លួនខឹងកាន់តែខ្លាំង ទើបសម្រេចចិត្តធ្វើទារុណកម្មនាង គឺចង់អោយនាងឆ្លើយ តើមានប្រុសឈ្មោលមែនឬអត់ ។
លោក ប៊ុត សំបូរ បានបញ្ជាក់ថា បុរសសង្ស័យនិងវត្ថុតាងត្រូវបានកសាងសំណុំរឿងបញ្ជូន ទៅស្នងការដ្ឋាននគរបាលខេត្ត នារសៀលថ្ងៃទី២១ ខែវិច្ឆិកា ឆ្នាំ២០១៤ ចាត់ការតាមផ្លូវច្បាប់ ៕
