(កែប)៖ នៅព្រឹកថ្ងៃទី០៥ ខែមេសា ឆ្នាំ២០១៧នេះ ស្នងការនគរបាលខេត្តកែប បានធ្វើកិច្ចប្រជុំបូកសរុបការងារត្រីមាសទី១និងផ្សព្វផ្សាយទិសដៅកាងារឆ្នាំ២០១៧របស់អគ្គស្នងការនគរបាលជាតិ។ពិធីនេះបានរៀបចំឡើងនៅក្នុងសាលប្រជុំស្នងការដ្ឋាននគរបាលខេត្តកែប ក្រោមវត្តមាន ឯកឧត្តម ឧត្តមសេនីយ៍ ថោង លីម អគ្គស្នវការរង តំណាងដ៏ខ្ពង់ខ្ពស់ ឯកឧត្តម ឧត្តមសេនីយ៍ នេត សាវឿន អគ្គស្នងការនគរបាលជាតិ ឯកឧត្តម កែន សត្ថា អភិបាលនៃគណៈអភិបាលខេត្តកែប អមដោយអស់លោកជាថ្នាក់ដឹកនាំសំខាន់ៗក្នុងជួរកងកំលាំងនៃអង្គភាពនគរបាលជាតិជាច្រើនរូប ក្នុងនោះក៏មានវត្តមានលោកព្រះរាជអាជ្ញា អមសាលាដំបូងខេត្ត ព្រមទាំងអស់លោកជាប្រធានមន្ទីរស្ថាប័នពាក់ព័ន្ធមួយចំនួនផងដែរ។
លោកឧត្តមសេនីយ៍ទោ អ៊ីង សំអុល ស្នងការនគរបសលខេត្តកែប បានស្រង់របាយការណ៍សំខាន់ៗថា បច្ចុប្បន្នដោយផ្អែកលើការអនុវត្តគោលនយោបាយភូមិ ឃុំមានសុវត្ថិភាព ស្នងការដ្ឋាននគរបាលខេត្តកែបបានបន្តចាត់តាំងក្រុមចំរុះ នគរបាលខេត្តចំនួន៥ក្រុមស្មើ២៨នាក់ចុះប្រចាំការគ្រប់ប៉ុស្តិ៍រដ្ឋបាល នៃអធិការដ្ឋាននគរបាលក្រុង ស្រុក ដើម្បីពង្រឹងសន្តិសុខ សណ្តាប់ធ្នាប់នៅតាមមូលដ្ឋានឲ្យបានល្អប្រសើរ។ក្នុងនោះក៏បានចាត់តាំងនគរបាល ខេត្ត ក្រុង ស្រុក ប៉ុស្តិរដ្ឋបាលចល័តល្បាតការពារក្នុងភូមិសាស្ត្រខេត្ត ទាំងថ្ងៃ និងយប់ចំនួន២៣៥៥គោលដៅ ស្មើនឹង៣៩៧៥លើក ប្រើប្រាស់កំលាំងចំនួន១៣១២២នាក់ និងមធ្យោបាយមួយចំនួនក្នុងនោះក៏បានបំផុសក្រុមប្រជាការពារឲ្យដំណើរការប្រមាណ៨៥%លើចំនួនរួម៤១៣ក្រុមយាមដែលមានសមាជិកចំនួន៣៨៩៩នាក់ ហើយនគរបាលមូលដ្ឋានក៏បានសហការយ៉ាងស្អិតរមួតជាមួយអាជ្ញាធរគ្រប់មូលដ្ឋានចាប់ពីថ្នាក់ក្រុង ស្រុក រហូតដល់ឃុំ សង្កាត់ ដើម្បីរៀបចំក្រុមប្រជាការពារនិងផ្សព្វផ្សាយ ធ្វើវេទិការសាធារណៈស្តីពីគោលនយោបាយ«ភូមិ ឃុំមានសុវត្ថិភាព»ចំនួន៩២លើក ។
ក្រៅពីនោះ ក៏បានជម្រុញការចុះឈ្មោះបោះឆ្នោតទូទាំងខេត្តបានចំនួន២៣០៨៤នាក់ ។ដោយផ្អែកលើគោលការណ៍សំខាន់ កំលាំងខិតខំរិតបន្តឹងការអនុវត្តច្បាប់ចរាចរណ៍ផ្លូវគោក ដោយការត្រួតពិនិត្យដើមទី ត្រួតពិនិត្យល្បឿន បញ្ចៀសការកកស្ទះចរាចរណ៍ អប់រំឲ្យយល់ដឹងនិងចូលរួមគោរពប្រតិបតិ្តច្បាប់ ។ ពង្រឹងសន្តិសុខ សណ្តាប់ធ្នាប់គ្រប់គោលដៅទេសចរណ៍ក្នុងឃុំ សង្កាត់ទាំងអស់និងកោះទន្សាយ កែប្រែឥរិយាបទនគរបាលចរាចរណ៍ឲ្យកាន់តែល្អប្រសើរ ។ ក្នុងនោះ អង្គភាពក៏បានត្រៀមកំលាំងជាស្រេចដើម្បីអន្តរាគមន៍គ្រប់ករណីចាំបាច់សម្រាប់សង្គ្រោះប្រជាជននៅពេលមានគ្រោះធម្មជាតិនិងគ្រោះថ្នាក់ផ្សេងៗផងដែរ។
នាឱកាសនោះ ឯកឧត្តម កែន សត្ថា ក៏បានគូសបញ្ជាក់នូវការខិតខំរបស់កំលាំងនៃអង្គភាពនគរបាលខេត្តកែប ដែលកន្លងមកបានពុះពារការពារសន្តិសុខ សណ្តាប់ធ្នាប់សង្គម បានល្អប្រសើរ ហើយក៏ធ្វើឲ្យតំបន់ភូមិសាស្ត្រខេត្តទាំងមូលប្រកបដោយស្ថិរភាព និងគ្មានបទល្មើសកើតឡើងព្រមទាំងបានបង្កា ទប់ស្កាត់ បានទាន់ពេលវេលារាល់ករណីផ្សេងៗ សំដៅលើកកម្ពស់ ការអនុវត្តភូមិ ឃុំ «មានសុវត្ថិភាព»ដែលចាត់ទុកជាគ្រឹះដ៏សំខាន់តាមតំបន់ទូទាំងខេត្តរបស់យើង ក្នុងការទប់ស្កាត់បទល្មើសគ្រប់ប្រភេទនោះ។
ថ្លែងក្នុងពិធីនោះដែរ ឯកឧត្តម ឧត្តមសេនីយ៍ ថោង លីម បានវាយតម្លៃថា ក្នុងត្រីមាសទី១នេះអង្គភាពនគរបាលខេត្តកែប ពិតជាមានស្នាដៃល្អក្នុងកិច្ចការងារ ដែលកំពុងមានការកោតសរសើរពីសំណាក់មជ្ឈដ្ឋានទូទាំងប្រទេសផងដែរ។ជសមួយនេះ លោកក៏សូមលើកនូវគោលការណ៍និងទិសដៅសំខាន់ៗមួយចំនួនសម្រាប់ក្រើនរំឭកដល់ស្ថាប័នមានសមត្ថកិច្ចក្នុងស្នងការដ្ឋានខេត្តកែបទាំងមូលសូមមានការប្រុងប្រយត្នខ្ពស់ ក្នុងការអនុវត្តភារកិច្ចរបស់ខ្លួន ព្រោះបច្ចុប្បន្ន ក្រុមអ្នកទេសចរណ៍ដែលមួយផ្នែកជាជនបរទេសមកពីគ្រប់បណ្តាប្រទេសនសនា គាប់ជួនសភាពការណ៍ឆ្នាំ២០១៦ក៏មានអំពើភេវកម្មកើតឡើងជាញឹកញាប់នៅក្នុងប្រទេសនានា ដោយសារក្រុមជ្រុលនិយម ISISនោះពិតជាធ្វើឲ្យពិភពលោកមានភាពវឹកវរផងដែរ ហើយយើងមិនដឹងថាក្រុមនេះអាចជ្រៀតជ្រែកចូលដល់ប្រទេសណាមួយឲ្យប្រាកដឡើយ ដូច្នរះគួរតែយើងប្រុងប្រយត្នឲ្យបានខ្ពស់បំផុត ម្យ៉ាងទៀតយើងត្រូវប្រយត្នការធ្វើបដិវត្តន៍ពណ៌ សំដៅលើសមត្ថកិច្ចគឺនគរបាលជាតិតែម្តង។លោកបានបញ្ជាក់ទៀតថា ការកំណើនទេសចរណ៍មិនសំដៅតែលើខេត្តកែបនេះទេ ហើយលោកក៏ឯកភាពទាំស្រុងនូវការខិតខំយកចិត្តទុកដាក់ អនុវត្តន៍ការងារត្រីមាសទី១បានទទួលសមិទ្ធផលដ៏គាប់ប្រសើរដោយសង្ឃឹមថា ទិសដៅអនុវត្តក្នុងត្រីមាសបន្តខាងមុខនឹងមានភាពលេចធ្លោជាងនេះទៅទៀត។
ក្នុងនោះដែរ គណៈអធិបតីក៏បានបំពាក់ឋានន្តរសកិ្ត ផ្ទេរភាកិច្ចនិងជូនប័ណ្ណសរសើរដល់នគរបាលនិងមន្ត្រីរាជការមានស្នាដៃក្នុងកិច្ចការងារកន្លងមក ៕
ណារិទ្ធ
