ខេត្តប៉ៃលិន៖ អ្នកកាសែតម្នាក់ បំរើការឲ្យស្ថាប័នកាសែតកម្ពុជាថ្មី ត្រូវបានបុរសម្នាក់ ដែលគេស្គាល់ថាជាមេគ ប្រចាំការនៅច្រកបឹងឆ្នាំង ចំណុះឲ្យកងការពារព្រំដែនលេខ៥០៤ (ស្រែម្អម) ស្រុកសាលាក្រៅ ខេត្តប៉ៃលិន បានទាញយកទូរស័ព្ទដៃ ដែលកំពុងថតបទល្មើសគ្រឿងចក្រកាយដីភ្នំ យកទៅលុបរូបចោល ព្រមទាំងនិយាយថាមកថតរូប ដើម្បីយកទៅធ្វើអាជីវកម្ម ដែលដីនៅចំណុចគ្រឿងចក្រកាយនេះ វាមិនមែនជាកម្មសិទ្ធ របស់បុរសខាងលើនោះឡើយ ។ ហេតុការណ៍ខាងលើនេះ បានកើតឡើងកាលពីវេលាម៉ោង៩ និង៥០ នាទីព្រឹក ថ្ងៃទី១ ខែមេសា ឆ្នាំ២០១៧ ស្ថិតនៅចំណុចជើងភ្នំកុយ ក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
អ្នកសារព័ត៍មានម្នាក់បានចុះទៅកន្លែងគ្រឿងចក្រកាយដីជិតជើងភ្នំកុយ ថតរូបភាព ត្រូវបានទាហានម្នាក់(ជាមេ គ) បានដកយកទូរស័ព្ទឈ្មោះ សេង សុវណ្ណារិទ្ធ ភេទប្រុស អាយុ៣៨ឆ្នាំ បំរើការឲ្យស្ថាប័នសារព័ត៍មានកម្ពុជាថ្មី ប្រចាំខេត្តប៉ៃលិន រស់នៅភូមិចំការកាហ្វេ សង្កាត់ទូលល្វា ក្រុងប៉ៃលិន ខេត្តប៉ៃលិន ហើយទូរស័ព្ទដែលទាហានម្នាក់(ជាមេ,គ)ដកយកម៉ាកSAMSUNG S5 ពណ៌ស ស៊ីមមួយ ។ ចំណែកទាហាន(ជាមេ,គ) ត្រូវបានគេស្គាល់ឈ្មោះ ប៉ាន់ សុធា ភេទប្រុស អាយុប្រហែលជិត៤០ឆ្នាំ ប្រចាំការនៅច្រកបឹងឆ្នាំង ស្រុកកំរៀង ខេត្តបាត់ដំបង បច្ចុប្បន្នរស់នៅភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
ប្រភពពីជនរងគ្រោះឈ្មោះ សេង សុវណ្ណារិទ្ធ អ្នកយកព័ត៌មានកម្ពុជាថ្មី ប្រចាំខេត្តប៉ៃលិន បានឲ្យដឹងថា៖ មុនពេលកើតហេតុ ជនរងគ្រោះបានចុះទៅយកព័ត៌មានពាក់ព័ន្ធដំណាំស្រូវ ក្នុងភូមិភ្នំកុយ តែនៅពេលជិះម៉ូតូបានប្រហែល១០០ម៉ែត្រ ស្រាប់តែឃើញរថយន្តដឹកដី ក្រពុកលើផ្លូវយ៉ាងច្រើន ពេលនោះជនរងគ្រោះក៍ចាប់ផ្តើមថតរូបដីធ្លាក់លើផ្លូវ និងបន្តទៅទីតាំង ដែលរថយន្តនិងគ្រឿងចក្របានកាយដីទាំងនោះ ។ ជនរងគ្រោះ បានបន្តថា៖ បន្ទាប់ពីដឹងកន្លែងដែលគ្រឿងចក្រកាយដី រួចហើយ ជនរងគ្រោះក៍បានទៅថត ដើម្បីយករូបភាព ស្របពេលដែលកំពុងថតរូប ស្រាប់តែមានបុរសម្នាក់ ដែលគេស្គាលថាជាទាហាន បានមកនិយាយថា តើរូបលោកមកពីខាងណា ម្តេចមិនសួរនាំគេ ដូចជាខ្វះសីលធម៌ម្លេះ ព្រមទាំងនិយាយបន្តថាមកថតនិង ដើម្បីយកធ្វើអាជីវកម្មហើយ ។
ជនរងគ្រោះ បានបន្តថា ៖បន្ទាប់ពីនិយាយរួច នៅវេលាម៉ោង៩ និង៥០នាទី មេទាហាននោះ បានទាញយកទូរស័ព្ទពីលោក(ជនរងគ្រោះ) ដើម្បីលុបរូបចេញ ចំណែកជនរងគ្រោះ បានចេញពីកន្លែងកើតហេតុ រួចក៍ទំនាក់ទំនងទៅអភិបាលស្រុកសាលាក្រៅ និងមន្ត្រីជំនាញផ្សេងៗ ដើម្បីជួយអន្តរាគមន៍យកទូរស័ព្ទមកវិញ លុះនៅវេលាម៉ោង១០ និង៣៥នាទីព្រឹកថ្ងៃដដែល បានឃើញមេការគ្រឿងចក្រយកទូរស័ព្ទមកឲ្យជនរងគ្រោះវិញ ដើម្បីបញ្ចាប់រឿង ។ ចំណែកជនសង្ស័យមានឈ្មោះ ប៉ាន់ សុធា ជាទាហាន(ជាមេ,គ) និងជាអ្នកដកយកទូរស័ព្ទពីជនរងគ្រោះ បានឲ្យដឹងថា៖ ដីនៅចំណុចដែលកើតហេតុ មិនមែនជាដីលោក(ជនសង្ស័យ)នោះទេ វាជាដីរដ្ឋ(ដីភ្នំ) ហើយគ្រឿងចក្រដែលកំពុងកាយដីជើងភ្នំនេះគឺជនសង្ស័យ បានជួលមកកាយ ដើម្បីពង្រីកធ្វើស្រះទឹក ។ ជនសង្ស័យ បានបន្តថា៖ ករណីដែលជនសង្ស័យ ទាញយកទូរស័ព្ទពីអ្នកកាសែតនោះ ព្រោះតែលោកខឹងថា មុននិងមកថតមិនចេះសួរនាំគេ ហើយជនសង្ស័យ បានលុបតែបីទៅបួនរូបតែប៉ុណ្ណោះ ហើយជនសង្ស័យ បានប្រគល់ឲ្យជនរងគ្រោះ វិញហើយ ។ ចំណែកដីដែលគ្រឿងចក្រកំពុងកាយនេះ លោកបានប្រាប់លោក អាន់ សំអាត មេឃុំសាលាក្រៅរួចហើយដែរ ។
ពាក់ព័ន្ធករណីខាងលើ ត្រូវបានលោក សំ សារ៉េត អភិបាលស្រុកសាលាក្រៅ មានប្រសាសន៍ថា៖ ទីតាំងដែលគ្រឿងចក្រកំពុងកាយដីខាងលើ លោកមិនបានដឹងនោះទេ តើហេតុអ្វីបានជាដកយកទូរស័ព្ទពីអ្នកសារព័ត៍មានដូច្នោះ ។
ចំណែកលោក សុខ សួន អនុប្រធានមន្ទីររ៉ែ និងថាមពលខេត្តប៉ៃលិន បានឲ្យដឹងថា៖ ករណីនេះលោកមិនបានដឹងនោះទេ តែក្រោយពីលោកដឹង ខាងមន្ត្រីលោក បានចុះទៅដល់កន្លែងកើតហេតុ ដោយលោកបញ្ជាក់យ៉ាងខ្លីថា គ្រឿងចក្រដែលកាយដីខាងលើ វាមិនមានច្បាប់អនុញ្ញាតនោះទេ ។
ដោយឡែកមន្ត្រីនៃមន្ទីរបរិស្ថានខេត្តប៉ៃលិន នៅពេលដែលដឹងរឿងខាងលើនេះ បានទៅសុំលុយថ្លៃក្បាលរថយន្តទៅវិញ ដោយមិនរវល់រឿងបាត់បង់ធនធានធម្មជាតិឡើយ ។
បើតាមលោក ពេជ្រ សំបូរ ប្រធានការិយាល័យកិច្ចការច្បាប់ សាលាខេត្តប៉ៃលិន បានឲ្យដឹងថា៖ ករណីខាងលើ វាជារឿងខុសធ្ងន់ធ្ងរ ការដែលយើងជាអ្នកសារព័ត៌មាន វាជាស្ថាប័នមួយ មិនមានអ្នកណាម្នាក់អាចដកហូតយកសម្ភារៈ និងបំផ្លាញឯកសារអ្វីមួយពីយើងបានឡើយ លុះត្រាតែមានការបញ្ជារពីស្ថាប័នតុលាការដូច្នោះយើងអាចដាក់ពាក្យបណ្តឹងមកស្ថាប័នមានសមត្ថកិច្ចនិងតុលាការបានពីបទបំផ្លិចបំផ្លាញឯកសារអ្នកសារព័ត៌មាន ៕ស សារ៉េត
