ខេត្តបន្ទាយមានជ័យ ៖ នៅព្រឹកថ្ងៃទី៣១ ខែមីនា ឆ្នាំ២០១៧នេះ លោកអនុសេនីយ៍ទោ ឌូ បូរ៉ា នាយការិយាល័យផែនការ នៃបញ្ជាការដ្ឋានកងរាជអាវុធហត្ថខេត្តបន្ទាយមានជ័យ បានដឹកនាំកម្លាំងចំនួន២នាក់សហការជាមួយកម្លាំងមន្ទីររ៉ែនិងថាមពលខេត្តបន្ទាយមានជ័យ ដឹកនាំដោយលោក សុត វឌ្ឍនា ប្រធានមន្ទីររ៉ែនិងថាមពល ខេត្តបន្ទាយមានជ័យ ដោយមានការចូលរួម លោក យឹម សំណាង អភិបាលស្រុកភ្នំស្រុក និងជនជាតិចិនមើលការដ្ឋានជីករ៉ែមាសចំនួន២នាក់តំណាងអោយក្រុមហ៊ុនហ្វាយថៃហ្គ័របានចុះត្រួតពិនិត្យទីតាំងរបស់ក្រុមហ៊ុនហ្វាយថៃហ្គ័រដែលមានអាជ្ញាប័ណ្ណស្រាវជ្រាវរករ៉ែមាសនៅក្នុងភូមិសាស្ត្រភ្នំកូនខ្លែង ស្ថិតក្នុងភូមិធ្មេញត្រី ឃុំប៉ោយចារស្រុកភ្នំស្រុក ខេត្តបន្ទាយមានជ័យ ។
លោក សុត វឌ្ឍនា ប្រធានមន្ទីររ៉ែនិងថាមពលខេត្តបាននិយាយប្រាប់អ្នកយកព័ត៌មានឲ្យដឹងថាក្រុមហ៊ុនហ្វាយថៃហ្គ័រកំពង់ធ្វើការស្រាវជ្រាវរុករករ៉ែមាសនៅភ្នំខ្លែងយ៉ាងគគ្រឹកគ្រេងគឺក្រុមហ៊ុនបានធ្វើការឃួងរករ៉ែចំនួន៥រណ្តៅ និង២រណ្តៅទៀតកំពង់ជីក ។
លោក សុត វឌ្ឍនាបានបញ្ជាក់ឲ្យដឹងទៀតថា រណ្តៅនីមួយៗមានជំរៅដល់ទៅ៣០ម៉ែត្រ រណ្តៅខ្លះមានជម្រៅដល់ទៅ១៨០ម៉ែត្រឯណោះ និងមុខកាត់ប្រវែង៣០ម៉ែត្រ ការរុករករ៉ែមាសរបស់ក្រុមហ្វាយថៃហ្គ័រពុំទាន់ស្រាវជ្រាវរកឃើញរ៉ែមាសអ្វី ដែលគួរឲ្យកត់សំគាល់នោះឡើយ ។
ប្រជាពលរដ្ឋនៅម្តុំភ្នំខ្លែងនោះ មានការសោកស្តាយយ៉ាងខ្លាំងដោយមើលឃើញទង្វើរបស់ក្រុមហ៊ុមមកជីកយករ៉ែមាសដែលជាកេរដំណែលរបស់ដូនតាបន្សល់ទុកឲ្យរាប់រយឆ្នាំមកហើយហើយនៅក្នុងតំបន់នោះក្រោយពីក្រុមហ៊ុនហ្វាយថៃហ្គ័រជីកយករ៉ែអស់ចិត្តហើយដីនៅម្តុំនោះចោលទទេព្រោះមិនអាចធ្វើអ្វីទៀតឡើយបានដោយសារតែវណ្តៅជីកយកមាសនោះមានទំហំធំៗពេក ៕
