កែប ៖ ប្រជាពលរដ្ឋគ្រប់តំបន់នៃភូមិសាស្ត្រខេត្តកែប ពិសេសពលរដ្ឋដែលរស់នៅចំណុចភ្នំពោននៃភូមិភ្នំលាវ ឃុំពងទឹក ស្រុកដំណាក់ចង្អើរ បាននិងកំពុងមានក្តីរីករាយ បន្ទាប់ពីអាជ្ញាធរខេត្តកែប ជម្រុញឱ្យមានបណ្តាញអគ្គិសនីប្រើប្រាស់ក្នុងតំបន់ដែលពួកគាត់រស់នៅ ក្នុងតំបន់ទីជនបទ ហើយក៏ជាមោទនភាពមួយដែលមិនធ្លាប់មានក្នុងប្រវត្តិសាស្ត្រផងដែរ។
ថ្លែងក្នុងពិធីផ្សព្វផ្សាយនៃការតភ្ជាប់បណ្តាញចរន្តអគ្គិសនីស្ថិតក្នុងភូមិភ្នំលាវ ចំណុច(ភ្នំពោន)នាព្រឹកថ្ងៃទី១៨ខែមីនា ឆ្នាំ២០១៧ ឯកឧត្តម កែន សត្ថា អភិបាលខេត្តកែប បានលើកឡើងថា ការតភ្ជាប់បណ្តាញអគ្គិសនីនេះគឺជាការឆ្លើយតបពីតម្រូវការរបស់ប្រជាពលរដ្ឋក្នុងតំបន់ ដែលពួកគាត់ត្រូវការចំបាច់បំផុតក្នុងការប្រើប្រាសបណ្តាញនេះ សំរាប់ធ្វើអាជីកម្មផ្សេងៗ ពិសេសបំភ្លឺក្នុងគេហដ្ឋាន ដូចដឹងស្រាប់ហើយសម័យបច្ចុប្បន្នជាសម័យបច្ចេកវិទ្យាសំបូរបែបសម្ភារៈទំនើបប្រើដោយចរន្តអគ្គិសនី(AC) ស្ទើតែទាំងអស់ ដូចជា វិទ្យុ ម៉ាញេ ទូរទស្សន៍ ទូទឹកកកនិងសម្ភារៈទំនើបៗជាច្រើនរាប់មិនអស់ទៀត។លោកបានបញ្ជាក់ទៀតថា ការកំណត់ឱ្យមានបណ្តាញអគ្គិសនីប្រើប្រាស់នេះ មិនមែនមានតែនៅក្នុងតំបន់ភ្នំលាវនេះទេ ដោយតាមភូមិសាស្ត្រនានានៃតំបន់ខេត្តកែបនឹងត្រូវមានចរន្តភ្លើងប្រើប្រាស់ទាំងអស់ ព្រោះថាតំបន់ណាមានដងផ្លូវគឺត្រូវតែមានបណ្តាញចរន្តអគ្គិសនី គ្រប់កន្លែង ។ ម្យ៉ាងទៀត ក្នុងភូមិសាស្ត្រនិមួយតម្រូវការដ៏ចាំបាច់របស់ប្រជាពលរដ្ឋ គឺបណ្តាញទឹក ភ្លើងនេះហើយ ក្រៅពីនោះត្រង់ចំណុចភូមិភ្នំលាវនេះ ក៏មានការអភិវឌ្ឍន៍ស្ទើគ្រប់វិស័យទៅហើយ ដូចជា ផ្លូវថ្នល់ ផ្លូវលំ សាលារៀន វត្តអារាមជាដើម ។
ឯកឧត្តម ក៏បានក្រើនរំឭកដល់ប្រជាពលរដ្ឋក្នុងតំបន់ឱ្យចេះជួយថែរក្សារាល់ធនធានទាំងអស់មិនថាជារបស់រដ្ឋឬឯកជន ចូរចេះគ្រប់គ្រងជួយថែរក្សាទាំងអស់គ្នា ដើម្បីជួយលើកដំកើងខេត្តយើងឱ្យកាន់តែមានការរីកចម្រើន ព្រោះតំបន់របស់យើងជាកន្លែងទេសចរណ៍ដ៏សំខាន់។
ឯកឧត្តមក៏បានជម្រុញដល់ពលរដ្ឋសូមទៅចុះឈ្មោះនិងដាក់ពាក្យស្នើសុំប្រើប្រាស់បណ្តាញ នៅក្រុមហ៊ុនអគ្គិសនីខេត្តកែប និងសូមឱ្យបងប្អូនប្រជាពលរដ្ឋរួមសហការក្នុងការជួយថែរក្សា និងជួយបង្កាទប់ស្កាត់រាល់ការតភ្ជាប់ណ្តាញដោយគ្មានបច្ចេកទេសនិងគ្មានគុណភាព ខ្លាចបង្កឱ្យមានករណីកើតឡើងដោយប្រការណាមួយដែលអាចប៉ះពាល់ដល់អាយុជីវិត។
ក្នុងនោះដែរ លោកយស មន្នី ប្រធានមន្ទីររ៉ែនិងថាមពល ខេត្តកែបបានឱ្យដឹងថា ក្នុងតំបន់ភូមិសាស្ត្រទូទាំងខេត្ត បានកំណត់តុងស្យុងភ្លើងប្រើប្រាសមានកំរិត២២មេកាវ៉ាត់ ផ្តល់ថាមពលដោយក្រុមហ៊ុនអគ្គិសនីខេត្តកែប។ដោយឡែកលោក ម៊ិច សុធី ដែលជាតំណាងឱ្យក្រុមហ៊ុនអគ្គិសនីខេត្តកែប ក៏បានលើកឡើងក្នុងន័យអប់រំដល់បងប្អូនប្រជាពលរដ្ឋ ទាក់ទិននឹងផលអវិជ្ជមានដែលអាចមានហានិភ័យកើតឡើងដោយប្រការផ្សេងៗក្នុងខណៈដែលបងប្អូនប្រជាពលរដ្ឋមិនបានស្វែងយល់អំពីគ្រោះថ្នាក់ដោយសារចរន្តអគ្គិសនីនេះ ។ ដូច្នេះលោកក៏បានធ្វើការណែនាំដល់អាណាព្យាបាលក៏ដូចជាកុមារទាំងឡាយគួរកុំប៉ះពាល់ ឬទៅកាន់សម្ភារៈដែលផ្ទុកដោយចរន្ត ពិសេសក៏អំពាវនាវដល់ពលរដ្ឋ ដែលមានលំនៅដ្ឋាននៅទីនោះមកដាក់ពាក្យ និងចុះឈ្មោះក្នុងបញ្ជីឱ្យបានរួសរាន់ផងដែរ ព្រោះបណ្តាញអគ្គិសនីនេះ នឹងតភ្ជាប់បានប្រើប្រាសនៅមុនថ្ងៃចូលឆ្នាំប្រពៃណីជាតិខ្មែរខាងមុខនេះហើយ៕ ណារិទ្ធ
