កំពត ៖ បន្ទាប់ពីមានសារព័ត៌មានក្នុងស្រុកសរសេររិះគន់ និងចោទប្រកាន់លើករណីមានការឃុបឃិតប្រព្រិត្តបទល្មើសក្នុងដែននេសាទសមុទ្ររួមនិងបទល្មើសផ្សេងៗទៀតក្នុងលំហសមុទ្រនោះ លោកឧត្តមសេនីយ៍ទោ ទូច ពលៈ ដែលជាប្រធាននគរបាលជើងទឹកកំពត-កែប បានប្រាប់អ្នកកាសែតនៅល្ងាចថ្ងៃទី៧ខែមីនា ឆ្នាំ២០១៧នេះថា បច្ចុប្បន្នអង្គភាពរបស់លោកមានតែខិតខំបំពេញកាតព្វកិច្ចដើម្បីការពារផលប្រយោជន៍សហគមន៍នេសាទក៏ដូចជាការពារដែននេសាទក្នុងលំហសមុទ្រដោយពុំឱ្យមានការរំលោភបំពានពីសំណាក់ភាគីណាមួយឡើយ ។ ជាងនេះទៅទៀត ការលើកឡើងពីសំណាក់សារព័ត៌មានចោទប្រកាន់ថា រូបលោកបានទទួលផលប្រយោជន៍ពីបទល្មើសនានាក្នុងដែនសមុទ្រនោះគឺមិនអាចទទួលយកបានទេ ព្រោះថា សម័យបច្ចុប្បន្ន មានស្ថាប័នពាក់ព័ន្ធជាច្រើនសំរាប់ធ្វើការទប់ស្កាត់រាល់បទល្មើសផ្សេងៗ ដូចជាទំនិញគេចពន្ធនានា ទោះជាមានចរាចរណ៍ក៏មានស្ថាប័នគយគេជាអ្នកឃ្លាំមើលក្នុងលំហសមុទ្រដូចគ្នា ហើយការនេសាទក្នុងសមុទ្រក៏មានជំនាញគ្រប់គ្រងច្បាស់លាស់ផងដែរ តើមានបទល្មើសកើតឡើងម្តេចកើតទៅ ។ ម្យ៉ាងទៀត នគរបាលជើងទឹកមានភារកិច្ចការពារសន្តិសុខ សណ្តាប់ធ្នាប់ ជូនដល់ក្រុមអ្នកនេសាទដោយគ្មានការឃុបឃិតក្នុងគោលបំណងទាញយកផលប្រយោជន៍ណាមួយពីអ្នកនេសាទនោះដែរ ។
លោកឧត្តមសេនីយ៍ទោ រូបនោះបានបញ្ជាក់ដ៏ម៉ឺងម៉ាត់ថា លោកកំពុងសាកសួររកប្រភព ចោទប្រកាន់លោកដែលពុំមានមូលដ្ឋានច្បាស់លាស់ ហើយក៏សូមឱ្យអ្នកសារព័ត៌មាននានា មុននឹងចុះផ្សាយគួររកហេតុផលណាមួយឱ្យបានប្រាកដប្រជាផង កុំចេះតែសរសេបង្ខូចកតិ្តយសតាមតែការឆ្កិះឆ្កៀលរបស់មនុស្សមួយក្តាប់តូចប៉ុណ្ណោះ ។
សូមបញ្ជាក់ថា ករណីមានបទល្មើសនេសាទគឺមានផ្នែកជំនាញជលផលជាអ្នកដោះស្រាយ ចំណែកនគរបាលជើងទឹកគឺមានតួនាទីការពារសន្តិសុខ សណ្តាប់ធ្នាប់ក្នុងលំហសមុទ្រប៉ុណ្ណោះ ។ ហើយចំពោះទំនិញគេចពន្ធ ហាក់ពុំមានចរាចរណ៍តាមផ្លូវទឹកនោះទេ ៕
