លោក វង សូត ជួបសំណេះសំណាល និងផ្តល់ថវិកាលើទឹកចិត្តដល់សិស្សប្រឡងជាប់បាក់ឌុបចំនួន៦៧៦នាក់ នៅទូទាំងស្រុកពញាក្រែក ខេត្តត្បូងឃ្មុំ

(ត្បូងឃ្មុំ)៖ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមការងារថ្នាក់ជាតិ ចុះជួយស្រុកពញាក្រែក ខេត្តត្បូងឃ្មុំ និងឃុំជាច ស្រុកកំចាយមារ ខេត្តព្រៃវែង និងលោកស្រី នៅព្រឹកថ្ងៃទី២១ ខែមករា ឆ្នាំ២០២២ បានអញ្ជើញសំណេះសំណាលជាមួយសិស្សទូទាំងស្រុកពញាក្រែក ខេត្តត្បូងឃ្មុំ និងវិទ្យាល័យជាច ក្នុងស្រុកកំចាយមារ ខេត្តព្រៃវែង ដែលបានប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំសិក្សា២០២០-២០២១។

ក្នុងនោះដែរលោក វង សូត បានថវិកាជាការលើកទឹកចិត្តដល់សិស្សានុសិស្សចំនួន ៦៧៦នាក់ ដែលមានប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប)។

មានមតិសំណេះសំណាលជាមួយក្មួយៗសិស្សានុសិស្ស លោក វង សូត រដ្ឋមន្រ្តី បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់លោកនាយក នាយិកា លោកគ្រូ អ្នកគ្រូ គ្រប់កម្រិត ទាំងអស់ដែលបានលះបង់គ្រប់ បែបយ៉ាងដើម្បីបំពេញតួនាទីក្នុងស្មារតីទទួលខុសត្រូវខ្ពស់ជាអ្នកសាបព្រោះ អប់រំ ទូន្មាន បណ្តុះបណ្តាល ផ្សព្វផ្សាយទាំងចំណេះដឹង ចំណេះធ្វើទាំងបែបវិទ្យាសាស្រ្ត សង្គមសាស្រ្ត ប្រវត្តិសាស្រ្ត អក្សរសាស្រ្ត ភូមិសាស្រ្ត សេដ្ឋកិច្ច ប្រពៃណី វប្បធម៌ និងសីលធម៌។

លោករដ្ឋមន្ត្រី បានបន្តថា លទ្ធផលដែលយើងសម្រេចបាននាពេលនេះ គឺបានមកពីការខិតខំរបស់ក្មួយៗ មាតា បីតា លោកគ្រូ អ្នកគ្រូ អាជ្ញាធរមូលដ្ឋានគ្រប់លំដាប់ថ្នាក់ និងជាពិសេសរាជរដ្ឋាភិបាល ដែលមានសម្តេចតេជោ ជានាយរដ្ឋមន្រ្តី បានបង្កើតសន្តិភាព ស្ថិរភាព និងសុវត្ថិភាពសង្គមពេញលេញ បង្កលក្ខណល្អប្រសើរដល់ក្មួយៗបានចូលរៀនដើម្បីកសាងសមត្ថភាពខ្លួនឲ្យក្លាយជាកូនល្អ មិត្តល្អ សិស្សល្អ និងពលរដ្ឋល្អ ជាអ្នកសម្រេចជោគវាសនា ប្រទេសជាតិរបស់ខ្លួននាពេលអនាគត។

ឆ្លៀតយកឱកាសនេះ ប្រធានបានធ្វើការអប់រំ ណែនាំបន្ថែមដល់ក្មួយៗសិស្សានុសិស្ស ទាំងចំណេះដឹង និងបទពិសោធន៍ ទុកជាពុទ្ធិសម្រាប់យកទៅពង្រឹង និងពង្រីកសមត្ថភាពបន្ថែម នាពេលអនាគត។

ដោយឡែកសម្រាប់ស្រុកពញាក្រែក បេក្ខជនមកប្រឡងសរុបចំនួន ៩៨៤នាក់ បេក្ខជនប្រឡងជាប់ ៦៧៦នាក់ ស្មេីនឹង៦៨.៧០% បេក្ខជនប្រឡងធ្លាក់ចំនួន៣០៨នាក់ ស្មេីនឹង៣១.៣០%។ ក្នុងនោះបេក្ខជននិទ្ទេស A ចំនួន៨នាក់ និទ្ទេស B ចំនួន ២៩នាក់ និទ្ទេស C ចំនួន ១១៨នាក់ និទ្ទេស D ចំនួន ២៣១នាក់ និងនិទ្ទេស E ចំនួន ២៩០នាក់។

សូមជម្រាបជូនថា បេក្ខជនដែលប្រឡងជាប់និន្ទេស A ចំនួន១០នាក់ ក្នុងម្នាក់ៗទទួលបានថវិកា ៥០០ដុល្លារ, និទ្ទេស B ចំនួន៣៤ នាក់ ដោយក្នុងម្នាក់ៗ ទទួលបានទូរស័ព្ទ ដៃមួយគ្រឿង, និទ្ទេស C ចំនួន១២៩នាក់ ដោយក្នុងម្នាក់ៗទទួលបានថវិកា ៤០ម៉ឺនរៀល និងនិទ្ទេស D និងនិទ្ទេស E ដោយក្នុងម្នាក់ៗទទួលបាន ថវិកា១០ម៉ឺន រៀល៕