ទិវាមនុស្សចាស់៖ ប្រមុខរដ្ឋាភិបាលកម្ពុជាគាំទ្រដល់ការថែទាំសុខុមាលភាពមនុស្សចាស់
ក្នុងឱកាសទិវាមនុស្សចាស់អន្តរជាតិ១តុលាឆ្នាំនេះ ប្រមុខរាជរដ្ឋាភិបាលកម្ពុជាបានចេញសារលិខិតសម្ដែងនូវអំណរសាទរជាមួយលោកតា លោកយាយ ព្រឹទ្ធាចារ្យ និងជនរួមជាតិទាំងអស់ ព្រមទាំងប្រជាជាតិទូទាំងពិភពលោកក្នុងឱកាសនៃទិវាមនុស្សចាស់ឆ្នាំនេះ ។ ប្រធានបទនៃទិវាមនុស្សចាស់ឆ្នាំនេះ រៀបចំឡើងក្រោមប្រធាន «ចូលរួមគាំទ្រថែទាំសុខុមាលភាពមនុស្សចាស់ គឺជាកត្តាដ៏សំខាន់ក្នុង ការអនុវត្តប្រព័ន្ធគាំពារសុខុមាលភាពមនុស្សគ្រប់វ័យក្នុងសង្គមជាតិនៅកម្ពុជា»
ក្នុងសារលិខិតសម្តេចនាយករដ្ឋមន្ត្រី ហ៊ុន សែន បានបញ្ជាក់ថា ទិវានេះរៀបចំឡើងក្នុងគោលបំណងគុណដល់មនុស្សវ័យចាស់កម្ពុជា ក៏ដូចជាមនុស្សវ័យចាស់នៅទូទាំងពីភពលោក និងលើកកម្ពស់មនសិការទទួលខុសត្រូវក្នុងការចូលរួមកសាងសង្គមជាតិមួយដែលមានការយកចិត្តទុកដាក់កាន់តែខ្ពស់ចំពោះសុខុមាលភាពរបស់ប្រជាជនគ្រប់វ័យ ជាពិសេសមនុស្សវ័យចំណាស់ ។
ទោះបែបនេះក្ដី សម្ដេចនាយករដ្ឋមន្ត្រី ហ៊ុន សែន បានលើកឡើងថា ទិវាមនុស្សចាស់ក្នុងឆ្នាំ២០២១នេះ កម្ពុជាពុំបានរៀបចំកម្មវិធីជួបជុំគ្នា ដើម្បីប្រារព្ធទិវានេះ ឱ្យបានអធិកអធមបានឡើយ ។ មិនអាចក៏ដោយសារតែបញ្ហាជំងឺកូវីដ-១៩ ដែលនៅបន្តរីរាលដាលយ៉ាងស្រួលស្រាល់ ជាពិសេសនៅក្នុងព្រឹត្តិការណ៍សហគមន៍២០កុម្ភៈ ។
បើតាមប្រមុខរដ្ឋាភិបាល ការប្រតិបត្តិក្នុងសង្គមជាតិកម្ពុជា ប្រជាជនមិនត្រឹមតែមានទម្លាប់គោរពព្រឹទ្ធាចារ្យប៉ុណ្ណោះទេ ប៉ុន្តែថែមទាំងធ្វើឱ្យការគោរពនិងការដឹងគុណមនុស្សចាស់នេះ ក្លាយទៅជាគោនៃគុណធម៌ដែលបង្កើតបានជាវប្បធម៌នឹងជាប្រពៃណីដ៏ល្អសម្រាប់មនុស្សជំនាន់ក្រោយ ។
សម្ដេចនាយករដ្ឋមន្ត្រីបានថ្លែងថា៖ «កម្ពុជាយើងមានប្រពៃណី ទំនៀមទម្លាប់ដ៏ល្អ កេរមរតកសម្បត្តិវប្បធម៌ដែលសម្បូណ៍បែបនឹងសមិទ្ធផលទាំងឡាយ ហើយត្រូវបានរក្សាគងវង្សរហូតមកដល់សព្វថ្ងៃ ។ ទាំងអស់នេះកើតចេញពីស្នាដៃ គុណូបការៈ និងការអប់រំប្រៀនប្រដៅប្រកបដោយគតិបណ្ឌិតនៃបុព្វបុរសនិងចាស់ព្រឹទ្ធាចារ្យរបស់យើង ដែលអាចជាក្សត្រ ប្រជាជន មន្ត្រីរាជការ យុទ្ធជន បព្វជិត គ្រហស្ថ អ្នកអក្សរសាស្ត្រ ភាសាវិទូ សេដ្ឋកិច្ច អ្នកស្រាវជ្រាវ សិល្បករ អ្នកច្បាប់ និងអ្នកវិទ្យាសាស្ត្រជាដើម» ៕
