ខេត្តប៉ៃលិន ៖ បន្ទាប់ពីមានសេចក្តីរាយការណ៍ចេញពីពន្ធនាគារខេត្តប៉ៃលិនថា អនុប្រធានពន្ធនាគារខេត្តប៉ៃលិនម្នាក់ បានប្រព្រឹត្តិរឿងមិនត្រឹមត្រូវ ដោយហៅអ្នកទោសស្រី ជាអតីតតារាចម្រៀងម្នាក់ ទៅអង្គុយផឹកស៊ីជាមួយគ្នា ហើយឱបថើបនៅមុខអ្នកទោស និង មន្ត្រីពន្ធនាគារមួយចំនួននៅមុខពន្ធនាគារខេត្ត ក្នុងភូមិទឹកចេញ ឃុំស្ទឹងកាច់ ស្រុកសាលាក្រៅ ។ តែខាងសាម៉ីខ្លួន បានអះអាងថា គឺមានគេមួលបង្កាច់រូបលោក ដោយខ្លួនមិនបានប្រព្រឹត្តដូចការចោទប្រកាន់អ្វីនោះទេ ។
ក្រោយពីមានព័ត៌មានលេចឮថា លោក អ៊ុយ វិចិត្រ អនុប្រធានពន្ធនាគារខេត្តប៉ៃលិ ន បានហៅទណ្ឌិតស្រីម្នាក់ ឈ្មោះ អ៊ូ រស្មី ជាអតីតតារាចម្រៀង ទៅអង្គុយផឹកស៊ីជាមួយនៅអាគារខាងលើ ហើយបានប្រព្រឹត្តិអំពើមិនគួរគប្បីជាមួយនឹងនាង ។ លោក អ៊ុយ វិចិត្រ បានបដិសេធទាំងស្រុងនឹងព័ត៌មានចចាមអារ៉ាមខាងលើនេះ ដោយលោកទទួលស្គាល់ថា ពេលនោះមានការផឹកស៊ីជាមួយនឹងអ្នកទោស ដោយមានមន្ត្រីអនុរក្សពន្ធនាគារចូលរួមជាច្រើននាក់ផងដែរ ហើយលោកអត់បានធ្វើដូច្នោះទេ ។
លោកបន្តទៀតថា ក្នុងកម្មវិធីនោះគេបានចាប់ផ្តើមនៅវេលាម៉ោង១២ថ្ងៃទ្រង់ ថ្ងៃទី១៨ ខែវិច្ឆិកា រហូតដល់ម៉ោង៤ និង៣០នាទីរសៀល ថ្ងៃដដែល ទើបចប់ តែរូបលោកបានទៅចូលរួមក្រោយគេ ហើយមានការប៉ះពាល់បន្តិចបន្តួចដែរ ជាមួយនឹងនាង អ៊ូ រស្មី ដោយសារពេលនោះ លោក ផឹកស៊ីទៅស្រវឹង ហើយក៏មានការប៉ះពាន់បន្តិចបន្តួច មិនធ្ងន់ធ្ងរដូចគេអះអាងនោះទេ ពីព្រោះរូបលោកចូលចិត្តការ ច្រៀងសប្បាយ ។
គួររំលឹកថា មូលហេតុដែលនាងសុំប្តូរចេញពីពន្ធនាគារព្រៃស មក រស់នៅក្នុងពន្ធនាគារខេត្តប៉ៃលិន ដោយសារនាងមានទំនាក់ទំនងស្នេហាជាមួយអ្នកទោសម្នាក់ទៀត ឈ្មោះ យ៉េន ការ៉ាត់ ដែលជាអនិកជន រស់នៅប្រទេសអូស្ត្រាលី ជាប់ទោសពាក់ព័ន្ធនឹងគ្រឿងញៀន បន្ទាប់ពីស្រឡាញ់គ្នារួច ទើបសុំប្តូរមកប៉ៃលិននេះតែម្តង ។
ពាក់ព័ន្ធទៅនឹងបញ្ហានេះ ភ្នាក់ងារយើងមិនអាចទាក់ទងទៅលោក អ៊ុយ វិចិត្រ បំភ្លឺ បានទេ ។ លោក សុខ សារូ អនុប្រធានពន្ធនាគារ បានឱ្យដឹងថា ពាក់ព័ន្ធនឹងបញ្ហាខាងលើ នេះ ខាងលោក អត់បានដឹងរឿងនោះទេ ហើយលោកក៏អត់បានចូលរួមផឹកស៊ីជាមួយអ្នក ស្រីម្នាក់នោះដែរ ។ ចំណែក លោក នៅ ធឿង ប្រធានពន្ធនាគារ ខេត្តប៉ៃលិន បានឱ្យដឹងថា នៅក្នុងពន្ធនាគារខេត្តប៉ៃលិន អត់មានរឿងឱបថើបគ្នាបែបនេះទេ ហើយនេះជារឿងបំផ្លើស ប៉ុណ្ណោះ ។
សូមបញ្ជាក់ថា ក្រោយបើកសវនការកាលពីថ្ងៃទី២១ ខែសីហា ឆ្នាំ២០១៤ នាង អ៊ូ រស្មី អតីតតារាចម្រៀងប្រចាំផលិតកម្មឆ្លងដែន និង រៃមាស ត្រូវបានកំណត់ទោសចំនួន៧ឆ្នាំ ពីបទសញ្ចារកម្ម ដែលមានស្ថានទម្ងន់ទោស និង ពីបទការជួញដូរមនុស្សខុសច្បាប់ ។ នាងត្រូវសាលាឧទ្ទររាជធានីភ្នំពេញ ប្រកាសសម្រាលទោសពី៧ឆ្នាំ មកត្រឹម៥ឆ្នាំ កាលពី ខែកុម្ភៈ ឆ្នាំ២០១៦ មុននេះ និងត្រូវគេបញ្ជូនចេញពីគុកព្រៃស តែមិនមានដំណឹងថាយកទៅឃុំនៅឯណានោះឡើយ ៕ ដោយ ៖ នីយ៉ា
