មណ្ឌលគិរី ៖ បុរសជាជនជាតិខ្មែរម្នាក់បានរងរបួសដោយគ្រាប់កាំភ្លើង និងត្រូវបញ្ជូនទៅសង្គ្រោះនៅមន្ទីរពេទ្យបង្អែកខេត្ត ភ្លាមៗ បន្ទាប់ពីត្រូវជនជាតិវៀតណាមឆ្លងដែន ខុសច្បាប់ ចូលមកក្នុងទឹកដីកម្ពុជា តាមច្រករបៀង ពាមអូរតាំកន បាញ់ប្រហារ ។
ហេតុការណ៍នេះបានកើតឡើង កាលពីវេលាម៉ោងជាង៣រសៀល ថ្ងៃទី២២ វិច្ឆិកា ២០១៦ ម្សិលមិញនេះ នៅចំណុច ពាមអូរតាំកន ប្រមាណ ២ គីឡូម៉ែត្រ ពីខ្សែបន្ទាត់ព្រំដែនកម្ពុជា-វៀតណាម ស្ថិតក្នុងភូមិពូចា ឃុំប៊ូស្រា ស្រុកពេជ្រាដា ខេត្តមណ្ឌលគិរី ។
លោក ព្រហ្ម សាវេន មេបញ្ជាការកងរាជអាវុធហត្ថស្រុកពេជ្រាដាបានឲ្យដឹងថា ជុំវិញករណីនេះ លោកពុំទាន់ហ៊ាន សន្និដ្ឋានថា ជាករណីគំនុំ ឬយ៉ាងណានោះ ប៉ុន្តែបើយោងតាមប្រភពនៅក្បែរទីតាំងកើតហេតុបាននិយាយថា ជនជាតិវៀតណាមរូបនោះបានឆ្លងដែនចូលមកក្នុងទឹកដីកម្ពុជា ដើម្បីបរបាញ់សត្វដោយសេរីតែម្ដង ហើយក៏ត្រូវចំបុរសជាជនជាតិខ្មែរ បណ្ដាលឲ្យរងរបួស ។
លោកមេបញ្ជាការកងរាជអាវុធហត្ថស្រុកបន្តថា ជនជាតិវៀតណាមរូបនោះ កម្លាំងសមត្ថកិច្ចមិនអាចកំណត់អត្តសញ្ញាណបានទេ ព្រោះក្រោយកើតហេតុភ្លាមៗ ជនសង្ស័យខាងលើនេះបានរត់គេចខ្លួនចូលទៅប្រទេសគេវិញ។
លោក ព្រហ្ម សាវេន បញ្ជាក់ថា ជនរងគ្រោះឈ្មោះ នេត ឡាវី ភេទប្រុស អាយុ៣៣ឆ្នាំ រសនៅក្បែរទីតាំងកើត ហេតុ មានមុខរបរជាបុគ្គលិកក្រុមហ៊ុនកូវីហ្វាម៉ា រងរបួសដោយគ្រាប់កាំភ្លើងវ៉ាងឡុង១គ្រាប់ ចំដៃខាងឆ្វេង បច្ចុប្បន្នកំពុងសម្រាកព្យាបាលនៅមន្ទីរពេទ្យ។
ជុំវិញករណីនេះ បើយោងតាមប្រភពពីសមត្ថកិច្ចមួយរូប សូមមិនបញ្ចេញអត្តសញ្ញាណបានឲ្យដឹងដែរថា ច្រករបៀងពាមអូរតាងកននេះ គឺស្ថិតក្រោមការគ្រប់គ្រងដោយមន្ត្រីយោធា និងមន្ត្រីនគរបាល ដោយខាងនគរបាលមានលោក ផុន មករា ជានាយប៉ុស្តិ៍នគរបាលការពារព្រំដែនគោកប៊ូស្រា ជាអ្នកគ្រប់គ្រង ចំណែកខាងយោធាមានលោក ថោង ដារ៉ារិទ្ធ ជាមបញ្ជាការកងអនុសេនាតូចលេខ០២ ជាអ្នកគ្រប់គ្រងផ្ទាល់ ហើយខ្សែបន្ទាត់ព្រំដែនស្ថិតក្រោមការគ្រប់គ្រងដោយ លោកទាំង០២នេះ គឺតែងមានជនជាតិវៀតណាមឆ្លងដែនចូលមកទឹកដីកម្ពុជា យ៉ាងសេរីពុំដែលមានការចាប់បង្ក្រាបនោះ ទេ និងតែងតែកើតមានបទល្មើសព្រៃឈើឆ្លងដែនចេញទៅប្រទេសវៀតណាម ខ្សែបន្ទាត់ព្រំដែននៅចំណុចនោះយ៉ាង គគ្រឹងគគ្រេងទៀតផង ។
ជុំវិញករណីនេះ នៅព្រឹកថ្ងៃទី២៣ វិច្ឆកា ២០១៦នេះ យើងមិនទំនាក់ទំនងសុំការបំភ្លឺបានទេ ពីលោក ផុន មករា និងលោក ថោង ដារ៉ារិទ្ធ ដែលគ្រប់គ្រងនៅច្រករបៀងនោះ ។
ចំណែកលោក ទិន ស៊ីន មេបញ្ជាការវរនគរបាលការពារ ព្រំដែនគោកលេខ៣០៣ យើងបានទំនាក់ទំនងតាមទូរស័ព្ទតែពុំមានអ្នកទទួល ។ ជាមួយគ្នានេះ លោក គង់ ដាំ មេបញ្ជា ការកងអនុសេនាធំលេខ១ បានថ្លែងថា ករណីនេះ លោក គឺកំពុងសហការជាមួយសមត្ថកិច្ចខាងវៀតណាមស្វែងរកជនល្មើស ៕
