ខេត្តបាត់ដំបង ៖ ប្រជាពលរដ្ឋជាច្រើននៅក្នុងក្រុងបាត់ដំបង និងពលរដ្ឋដែលរស់នៅតាមតំបន់ព្រំដែនបានរិះគន់ចំៗថា មន្ត្រីនគរបាលអន្តោប្រវេសន៍ប្រចាំច្រកទ្វារអន្តរជាតិដូងថា បានបំពានយកថ្លៃសេវាធ្វើ(វ៉តដ័រផាស់)ដែលមានសុពលភាព ត្រឹមតែ ១អាទិត្យម្តង ថ្លៃផ្ទុយពីការកំណត់របស់រដ្ឋនេះ ។
ប្រជាពលរដ្ឋបានបន្តទៀតថា មន្ត្រីនគរបាលអន្តោប្រវេសន៍ប្រចាំច្រកទ្វារអន្តរជាតិដូង ក្នុងស្រុកកំរៀង ខេត្តបាត់ដំបងថា បានយកសេវាក្នុងការធ្វើលិខិតឆ្លងដែនហៅ (វ៉តដ័រផាស់)ថ្លៃលើសពីកិច្ចព្រមព្រៀងក្នុងការកំណត់ទ្វេគុណ នៃចំនួនថវិកាដែលបានកំណត់ក្នុងកិច្ចព្រមព្រៀងរវាងភាគីកម្ពុជា-ថៃ គឺខេត្តបាត់ដំបង និងខេត្តចាន់បូរី ។
បើយោងតាមកិច្ចព្រមព្រៀងរវាងអាជ្ញាធរខេត្តជាប់ព្រំដែនគ្នា គឺខេត្តបាត់ដំបង និងខេត្តចាន់បូរី ដែលបានកំណត់លើ តម្លៃលើកលែងឱ្យប្រជាពលរដ្ឋក្នុងខេត្តរៀងៗខ្លួនមានសិទ្ធិបំពេញបែបបទចេញចូលបាន ដោយស្របច្បាប់ ហើយប្រជាពលរដ្ឋ ត្រូវបង់សេវាត្រឹមតែ ២០០០០រៀលប៉ុណ្ណោះ ក្នុងការធ្វើបែបបទ ប៉ុន្តែជាក់ស្តែងអង្គភាពនគរបាលអន្តោប្រវេសន៍ប្រចាំច្រក ទ្វារអន្តរជាតិដូង មិនបានអនុវត្តតាមការកំណត់របស់ក្រសួងមហាផ្ទៃទេ បែរជាបំពានអនុញ្ញាតឱ្យពលរដ្ឋក្រៅខេត្តធ្វើបែបបទ ចេញចូលបានយ៉ាងងាយគ្រាន់តែចំណាយលុយច្រើនបន្តិចជាការស្រេច ។
ជាងនេះទៅទៀត ចំពោះប្រជាពលរដ្ឋក្នុងខេត្តបាត់ដំបង លើសេវាដែលត្រូវបង់តាមកំណត់ជាផ្លូវការត្រឹមតែ ២០០០០រៀលប៉ុណ្ណោះ បែរជាមន្ត្រីជំនាញអន្តោប្រវេសន៍យកពីពលករឆ្លងដែនរហូតដល់ ៣៥០០០រៀល ។ ចំណែកប្រជាពលរដ្ឋក្រៅខេត្តដែលមិនមានការលើកលែងតែត្រូវមន្ត្រីជំនាញបំពានទាំងខុសកិច្ចព្រមព្រៀងសម្រូលធ្វើបែប បទចេញចូលបានហើយយកថ្លៃសេវារហូតដល់ ៧៣៥០០រៀល ។
ប្រជាពលរដ្ឋបានលើកឡើងថា កាលពីថ្ងៃទី ១៩ ខែវិច្ឆិកា ឆ្នាំ២០១៦ កន្លងទៅនេះថា ការធ្វើបែបបទលិខិតឆ្លងដែន ប្រចាំសប្តាហ៍ក្នុងគោលបំណងចូលទៅធ្វើការងារបេះផ្លែឈើ នៅក្នុងទឹកដីថៃ ខេត្តចាន់បុរី ដែលមានចម្ងាយប្រមាណជាង ៤០គីឡូម៉ែត្រ ពីតំបន់ព្រំដែនប្រទេសកម្ពុជា ។ ហើយក្នុងការធ្វើលិខិតឆ្លងដែនអាទិត្យនេះ ត្រូវបង់ថ្លៃសេវាដល់មន្ត្រីនគរ បាលអន្តោប្រវេសន៍ប្រចាំច្រកដូង ចំនួនរហូតដល់ ៣៥០០០រៀលឯណោះ ។
មហាជនបានរិះគន់លោក សៅ ប៊ុនរិទ្ធ ប្រធានការិយាល័យនគរបាលអន្តោប្រវេសន៍ច្រកទ្វារអន្តរជាតិដូង បានបំភ្លឺថា ចំពោះប្រជាពលរដ្ឋមកពីខេត្តផ្សេងៗក្រៅពីខេត្តបាត់ដំបង ប្រសិនបើមានការបញ្ជាក់ពីអាជ្ញាធរមូលដ្ឋាន ទើបមន្ត្រីលោកចេញ និងធ្វើបែបបទឱ្យបាន រីឯថ្លៃសេវាដែលត្រូវបង់តែ ២០០០០រៀលប៉ុណ្ណោះ ក្រៅពីហ្នឹងលើសេវាថតរូប ឬសេវាឱ្យក្រៅពីអង្គភាពរបស់លោកជារឿងផ្សេងៗ ។
ប្រជាពលរដ្ឋ និងប្រជាពលរដ្ឋឆ្លងដែនទៅធ្វើការនៅប្រទេសថៃទាំងអស់ បានសំណូមពរដល់ ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង ព្រមទាំងឯកឧត្តម នាយឧត្តមសេនីយ៍ សុខ ផល អគ្គនាយកដ្ឋានអន្តោប្រវេសន៍ ជួយពិនិត្យ និងសម្រួលឱ្យតម្លៃនេះធ្លាក់មកដូចដើមវិញ ចំពោះពលករក្នុងខេត្តបាត់ដំបងផង ៕
ដោយ ៖ សារ៉េត
