ស្រុកស្អាង៖ បុរសម្នាក់មានជម្ងឺសសៃប្រសាទ បានធ្វើសកម្មភាពកាប់ប្រហារស្ដ្រីជាម្ដាយ ដោយកាំបិតបុ័ងតោ ខណៈនោះបុរសជាប្អូនឃើញហេតុការណ៍ស្ទុះចូលទៅឃាត់ ក៏ត្រូវបងប្រុសកាប់បណ្ដាលឲ្យរងរបួសដៃយ៉ាងធ្ងន់ធ្ងរ ។ ភ្លាមៗនោះប្អូនប្រុសក៏បានតបតវិញដោយដំបង បណ្ដាលឲ្យបុរសជាបងស្លាប់នៅនឹងកន្លែងកើតហេតុ ។
ករណីនេះបានកើតឡើងកាលពីវេលាម៉ោង៦និង៣០នាទីព្រឹក ថ្ងៃទី២១ ខែវិច្ឆិកា ឆ្នាំ២០១៦ ស្ថិតក្នុងភូមិព្រែករុនក្រោម ឃុំព្រែកគយ ស្រុកស្អាង ខេត្ដកណ្ដាល ។ ក្រោយពីមានហេតុការណ៏កើតឡើង ស្ដ្រីជាម្ដាយរងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យប្រតិបត្ដិស្រុកស្អាង តែដោយសារស្ថានភាពធ្ងន់ធ្ងរពេក ក្រុមគ្រូពេទ្យសម្រេចបញ្ជូនបន្ដទៅមន្ទីរពេទ្យកាលម៉ែត្ររាជធានីភ្នំពេញ ។
ចំណែកឯជនដៃដល់ជាប្អូនត្រូវបានសមត្ថកិច្ចនគរបាលស្រុកស្អាងចាប់ខ្លួនដើម្បីកសាងសំណុំរឿងចាត់ការតាមនីតិវិធីច្បាប់ ។
អធិការនគរបាលស្រុកស្អាងលោកវរសេនីយ៍ទោ សេង សុជាតិ បានឲ្យដឹងថា ជនដៃដល់ ដែលត្រូវបានចាប់ខ្លួនឈ្មោះ ហួត សុងតិច ភេទប្រុសអាយុ២៦ឆ្នាំ ជនជាតិខ្មែរ មុខរបរកម្មកររោងចក្រ ។ ចំណែកឯជនរងគ្រោះឈ្មោះ ភី សុខគីន ភេទស្រី អាយុ៦៨ឆ្នាំ ម្នាក់ទៀតឈ្មោះ ហួត លាងហេង ភេទប្រុស អាយុ៤៩ឆ្នាំ (ជាមនុស្សមានជម្ងឺសសៃប្រសាទ) ។
ជនល្មើសនិងជនរងគ្រោះត្រូវជាម្ដាយនិងកូនរស់នៅក្នុងភូមិព្រែករុនក្រោម ឃុំព្រែកគយ ស្រុកស្អាង ខេត្ដកណ្ដល ។ គ្រួសារនេះមានកូនចំនួន១០នាក់ ជនរងគ្រោះដែលមានជម្ងឺសសៃប្រសាទជាកូនច្បង រីឯជនល្មើសជាកូនពៅ ។
លោកសេង សុជាតិ បានបន្ដថា ជនរងគ្រោះឈ្មោះ ហួត លាងហេង ជាមនុស្សមានជំងឺសសៃប្រសាទ តែងតែផផឹកថ្នាំជារៀងរាល់ថ្ងៃតាមវិជ្ជបញ្ជារបស់គ្រូពេទ្យ ។ លុះមកដល់ប៉ុន្មានថ្ងៃមុនពេលកើតហេតុជន រងគ្រោះរូបនេះមិនព្រមផឹកថ្នាំសសៃប្រសាទនោះទេ រហូតដល់វេលាព្រឹកថ្ងៃទី២១ ខែវិច្ឆិកា ឆ្នាំ២០១៦ ជំងឺបានរើឡើង ធ្វើឲ្យជនរងគ្រោះរូបនេះលែងស្គាល់ម្ដាយ ឪពុក និងបងប្អូន ព្រមទាំងបញ្ចេញភាពកាចសាហាវ កាន់កាំបិតបុ័ងតោ កាប់ប្រហារទៅលើម្ដាយដែលមានវ័យចាស់ជរា រងរបួសក្បាលនិងលើក្បាលពោះយ៉ាងធ្ងន់ធ្ងរ ។ ឃើញដូច្នេះ ជនល្មើសជាប្អូនបានចូលទៅឃាត់ដើម្បីសង្គ្រោះស្ដ្រីជាម្ដាយ ក៏ត្រូវជនល្មើសកាប់មួយកាំបិតប៉័ងតោរងរបួសលើកដៃ ជនល្មើសក៏ព្យាយាមប្រតាយប្រតប់ រហូតទាញបានដំបងប្រវែងមួយម៉ែត្រ វាយសំពងទៅជនរងគ្រោះជាបងត្រូវចំក្បាល និងផ្ទៃមុខរងរបួសយ៉ាងធ្ងន់ធ្ងរ រហូតស្លាប់បាត់ជីវិតនៅកន្លែងកើតហេតុ ។
បច្ចុប្បន្ន សមត្ថកិច្ចនគរបាលស្រុកស្អាងកំពុងបន្ដនីតិវិធី ដើម្បីកសាងសំណុំរឿងបញ្ជូនខ្លួនជនដៃដល់ទៅកាន់សាលាដំបូងខេត្ដកណ្ដាលចាត់ការតាមច្បាប់ ។ ដោយឡែក សាកសពជនរងគ្រោះត្រូវបានសមត្ថកិច្ចនគរបាលប្រគល់ទៅឲ្យសាច់ញាតិចាត់ចែងធ្វើបុណ្យតាមប្រពៃណីបន្ទាប់ពីធ្វើកោសល្យវិច្ច័យរួច ៕
ដោយ ហុក វិបុល
