ខេត្តសៀមរាប ៖ កម្លាំងកងរាជអាវុធហត្ថខេត្តសៀមរាប បានសហការជាមួយនឹងកម្លាំងមន្ត្រីរដ្ឋបាលព្រៃឈើខេត្តសៀមរាប បានធ្វើការស្ទាក់ចាប់រថយន្តស៊ីទែនដឹកហ្គាសបង្កប់ឈើគ្រញូងមួយគ្រឿងលោតឆ័ត្រ មកពីខេត្តឧត្តរមានជ័យ ក្នុងនោះដែលបានធ្វើការឃាត់ខ្លួនមនុស្សចំនួន០៥នាក់ កាលពីព្រឹកថ្ងៃទី២០ ខែវិច្ឆិកា ឆ្នាំ២០១៦ នៅមុខទីស្នាក់ការរដ្ធបាលព្រៃឈើកន្ទួតខ្នាក្រៅ ក្នុងឃុំឃុនរាម ស្រុកបន្ទាយស្រី ខេត្តសៀមរាប។
លោក ទា គឹមសុទ្ធ នាយខណ្ឌរដ្ធបាលព្រៃឈើខេត្តសៀមរាប បានប្រាប់ភ្នាក់ងារព័ត៌មានថា រថយន្តបង្កប់ឈើនេះ កម្លាំងរដ្ឋបាលព្រៃឈើ និងកម្លាំងសមត្ថកិច្ចកងរាជអាវុធហត្ថខេត្តសៀមរាប តាមដានយូរមកហើយ ទើបនឹងចាប់បាន ហើយឈើប្រណីតទាំងនេះ ដឹកចេញពីភូមិសាស្ត្រស្រុកត្រពាំងប្រាសាទ ខេត្តឧត្តរមានជ័យ ។
លោកបានបន្តទៀតថា ឈើគ្រញូងទាំងអស់នេះ មានរហូតដល់ជិត០៩តោន ក្នុងនោះ លោកបានបន្ថែមថា បច្ចុប្បន្នខាងរដ្ឋបាលព្រៃឈើកំពុងរកកន្លែងទុកដាក់ និងរាប់ជាក់ស្តែង ដើម្បីចាត់ការតាមច្បាប់ ហើយជនសង្ស័យទាំង០៥ កំពុងកសាងសំណុំរឿងបញ្ជួនខ្លួន ទៅកាន់តុលាការសាលាដំបូងខេត្តសៀមរាប ។ ក្នុងរឿងនេះ មានប្រភពមួយបានលួចខ្សឹបប្រាប់ថា ម្ចាស់រថយន្តដឹកឈើនេះធ្លាប់មកនិយាយចរចា ជាមួយមន្ត្រីរដ្ធបាលព្រៃឈើច្រើនដងមកហើយ តែនិយាយអត់ត្រូវថ្លៃគ្នា ទើបពេលនេះត្រូវមេព្រៃចាប់ជាប់ សង្ស័យមកពីនិយាយថ្លៃគ្នាអត់ត្រូវ ទើបចាប់តែម្តងទៅ កុំអោយបែកការ ។
សូមបញ្ជាក់ដែលថា ម្ចាស់ឈើគ្រញូងនេះ គឺរបស់ជនជាតិវៀតណាមឈ្មោះយាយ ម៉ាយ នឹងយាយដឿង ជាអ្នកប្រមូលទិញឈើដ៏ល្បីឈ្មោះនៅខេត្តឧត្តរមានជ័យ ៕
